Tag: اسدعمر

اسلام آباد : تحریک انصاف کےرہنماء اسد عمرکہتے ہیں کہ عمران خان نےاٹھارہ سال تک جدوجہد فوج کیلئے نہیں کی، کبھی نہیں سنا کہ پی ٹی آئی کوفوج سے کوئی ہدایت آئی ہو۔

اے آر وائی نیوز کی خصوصی ٹرانسمیشن میں گفتگو کرتے ہوئے پاکستان تحریک انصاف کے رہنما اسد عمر نے کہا ہے کہ مجھے جاوید ہاشمی کے الزامات سن کر حیرانگی ہوئی ہے کیونکہ میں نے کبھی نہیں سنا کہ تحریک انصاف کو کبھی فوج کی جانب سے کوئی ہدایات آئی ہوں، پارٹی میں ہمیشہ جمہوریت کے تسلسل اور بقاءکی بات کی جاتی رہی ہے، عمران خان ہمیشہ فوج سے متعلق کردار کی نفی کرتے رہے ہیں۔

اسد عمر کا کہنا تھا کہ میں نے کبھی بھی نہیں سنا کہ ہماری مرضی کا جج لگ جائے گا یہ کسی جج کی جانب سے عمران خان کو کوئی یقین دہانی کروائی گئی ہے یا فوج نے کوئی پیغام بھجوایا ہے، عمران خان ہمیشہ سے ہی فوج کے سیاسی کردار کے مخالف رہیں ہیں اور ان کی اٹھارہ سالہ جدوجہد ہر گز فوج کے لئے نہیں ہے، بہت سے سینئر لوگوں کو شک ہے مگر ایسا کچھ نہیں ہے، پاکستان کا اصل مستقبل جمہوریت کے ساتھ جڑا ہے، موجودہ جمہوریت پاکستان کے عوام کی خواہشوں کے مطابق نہیں ہے۔

ایک سوال کے جواب میں ان کا کہنا تھا کہ تمام فیصلے پارٹی اجلاس میں مشاورت کے بعد اور اتفاق رائے سے کئے جاتے ہیں، جاوید ہاشمی کی جانب سے شیخ رشید کے کردار کو بھی غلط رنگ دیا گیا، وہ ایک الگ پارٹی سے ہیں اور فیصلہ سازی میں ان کا کوئی کردار نہیں ہے، بہت سے لوگوں کا خیال ہے کہ شیخ رشید اور ہمارے ایجنڈے میں مماثلت نہیں ہے، تاہم ریڈ زون میں جانے کے فیصلے کے وقت پارٹی اجلاس میں کچھ لوگوں نے تحفظات کا اظہار کیا مگر آخر میں حتمی فیصلہ اتفاقِ رائے سے ہی کیا گیا تھا۔

ان کا کہنا تھا کہ کہ مجھے نہیں پتا پی ٹی وی پر حملہ کرنے والے کون تھے، ہقین ہے کہ مسئلے کا حل مذاکرات سے ہی نکلے گا ۔