اسلام آباد: وزیر خزانہ اسد عمر نے کہا ہے کہ ایک آپشن دیوالیے کا اور دوسرا آئی ایم ایف پروگرام لینے کا ہے، دیوالیہ ہوتے ہیں تو روپے کی قدر بہت کم ہوجائے گی، آئی ایم ایف کے پاس جاکر اصلاحات لائیں گے۔
تفصیلات کے مطابق وفاقی وزیر خزانہ اسد عمر نے کہا ہے کہ پرائیویٹ سیکٹر میں کاروبار بڑھ رہا ہے، حکومتی وسائل وہاں لگائیں گے جہاں روزگار پیدا ہو، حکومتی کوشش ہے کمزور طبقے پر بوجھ نہ ڈالا جائے۔
وزیر خزانہ نے کہا کہ معاشی ٹیم اچھی ہے یا بری ذمہ داری حکومت کی ہے، ایمنسٹی اسکیم آئی تو پبلک آفس ہولڈر کے لیے نہیں ہوگی، 7 ماہ میں ڈالر 105 سے 127 روپے تک گیا، 19 ہزار ارب کے خسارے کے باعث ڈالر کی قدر بڑھی۔
مزید پڑھیں: حکومت بجٹ سے پہلے ٹیکس ایمنسٹی اسکیم متعارف کرائے گی، اسد عمر
انہوں نے کہا کہ گراس روٹ پر سب سے مشکل کام اصلاحات ہوتا ہے، تعلیم کے شعبے اور پولیس میں بہتری لائے ہیں، صحت کے شعبے میں مشکلات آئیں مگر بہتری بھی ہوگی۔
اسد عمر نے کہا کہ معاشی بحالی کی طرف بڑھے ہیں آہستہ آہستہ بہتری آئے گی، جون کے بجٹ میں اکنامی سیکٹر سے مثبت صورت حال سامنے آئے گی، معیشت 7 فیصد پر نہیں ہوگی تو 20 لاکھ نوکریاں بھی پیدا نہیں ہوں گی۔
وزیر خزانہ نے کہا کہ سمندر سے تیل نکالنے کے منصوبے پر کام جاری ہے، زیر سمندر ڈرلنگ ایک ہائی رسک آپریشن ہے، زیر سمندر 3500 میٹر تک ڈرلنگ ہوچکی ہے، 5000 میٹر ڈرلنگ کے بعد تیل ذخائر کے حجم کا اندازہ ہوگا، اگر زیر سمندر تیل نکل آیا تو بہت بڑی دریافت ہوگی۔
