Tag: اسد قیصر

چکوال: اسپیکر قومی اسمبلی اسد قیصر نے کہا ہے کہ ملک کو اندرونی و بیرونی خطرات سمیت بیشتر چیلنجز کا سامنا ہے مگر اللہ کے فضل و کرم اور دیانت دار مخلص قیادت کی بدولت ہمارا مستقبل روشن اور محفوظ ہے۔

تفصیلات کے مطابق اسپیکر قومی اسمبلی اسد قیصر نے تقریب سے خطاب کرتے ہوئے کہا کہ پاکستان کو ایسا ملک بنانا ہے جس پر ہر پاکستانی فخر کرے، خارجہ پالیسی میں حکومت کو حاصل ہونے والی کامیابیاں عالمی برادری کا پاکستان پر اعتماد کا مظہر ہے۔

انہوں نے کہا کہ تاریخ میں پہلی بار غربت سے پسے طبقات کے بارے میں کسی حکومت نے سنجیدگی سے ناصرف سوچنا شروع کیا ہے بلکہ عملی اقدامات کا بھی آغاز کردیا ہے، اس سلسلے میں وزیراعظم نے غربت کے خاتمے کے لیے جامع پروگرام کا باقاعدہ اعلان کردیا ہے۔

مزید پڑھیں: حکومت کی اوّلین ترجیح ملک کو معاشی بحران سے نکالنا ہے، اسپیکر اسد قیصر

اسپیکر قومی اسمبلی نے کہا کہ ہم نے اب یہ عہد کرنا ہے کہ ہم نے معاشرے کے محروم طبقات کو بے آسرا نہیں چھوڑنا بلکہ ان کا سہارا بننا ہے تاکہ وہ ملک کی تعمیر و ترقی میں اپنا کردار ادا کرسکیں۔

ان کا کہنا تھا کہ ہم نے محروم طبقوں کے لیے ماڈل ولیجز کے لیے کام کی ابتدا کردی ہے جہاں تعلیم، خوراک، رہائش جیسے بنیادی حقوق سے محروم طبقوں کو ایک ہی چھت کے نیچے تمام سہولیات فراہم کی جائیں گی۔

اسد قیصر نے کہا کہ کاشتکاروں کے مسائل حل کرنے کے لیے اسپیشل کمیٹی تشکیل دی ہے جس میں ان کے مسائل حل کیے جائیں گے، کاشتکاروں کے حقوق کا تحفظ کرنا ہمارا فرض ہے۔

صوابی: اسپیکر قومی اسمبلی اسد قیصر نے نیوزی لینڈ میں دہشت گردی کے خوف ناک واقعے کی مذمت کرتے ہوئے کہا ہے کہ انھوں نے نیوزی لینڈ کے ہم منصب کو تعزیتی خط لکھا ہے۔

تفصیلات کے مطابق صوابی میں میڈیا سے گفتگو کرتے ہوئے اسپیکر قومی اسمبلی نے کہا ’میں نیوزی لینڈ میں دہشت گردانہ واقعے کی مذمت کرتا ہوں، نیوزی لینڈ کے اسپیکر اسمبلی کو تعزیتی خط بھیجا ہے۔‘

اسد قیصر کا کہنا تھا کہ دنیا پر یہ واضح ہونا چاہیے کہ دہشت گردی کا کوئی مذہب نہیں ہوتا، خطرہ ہے یورپ میں لوگ انتہا پسندی کی طرف بڑھ رہے ہیں، عالمی رہنماؤں کو اس بارے میں سوچنا ہوگا۔

واضح رہے کہ ڈپٹی ہائی کمشنر معظم شاہ کے مطابق نیوزی لینڈ کے شہر کرائسٹ چرچ میں ہونے والی دہشت گردی کے واقعے میں 6 پاکستانی شہید، ایک زخمی، اور 3 لاپتا ہیں۔

یہ بھی پڑھیں:  کرائسٹ چرچ حملہ: بین الاقوامی میڈیا کی متعصبانہ رپورٹنگ

معظم شاہ کا کہنا تھا کہ نیوزی لینڈ کے عوام کی جانب سے بہت مدد کی جا رہی ہے، شاہ محمود قریشی کا کہنا تھا کہ نیوزی لینڈ کے حکام سے پاکستانی ہائی کمشنر کا مسلسل رابطہ ہے، شہدا کے لواحقین کے لیے ویزا سسٹم میں آسانی کریں گے۔

وزیر خارجہ شاہ محمود قریشی نے کہا کہ دیکھنا یہ ہوگا اس دہشت گردی کے واقعے کے پیچھے کیا محرکات ہیں، پاکستان اور ترکی او آئی سی کا ہنگامی اجلاس بلائیں گے۔