Tag: اسرائیلی جارحیت

غزہ : فلسطین میں جاری اسرائیلی جارحیت کا سلسلہ نہ تھم سکا،  اسرائیلی بربریت کا سلسلہ ساتویں روز میں داخل ہوگیا، اسرائیلی بمباری میں ایک سو چوہتر فلسطینی شہید اور بارہ سو سے زائد زخمی ہوگئے۔مشرقی پٹی پر فضائی حملوں کے بعد زمینی کارروائیوں کا آغاز بھی کردیا گیا۔

 نہتے فلسطینیوں کے خلاف اسرائیلی بربریت رکنے کا نام نہیں لے رہی، غزہ میں اسرائیلی فوج کی ظالمانہ کارروائیاں ساتویں روز بھی جاری ہیں،تازہ حملوں میں اسرائیلی فضائیہ نے غزہ میں تین مختلف مقامات کونشانہ بنایا، اسرائیل کی شمالی غزہ کو خالی کرنے کی دھمکی کے بعد ہزاروں فلسطینی مرد ،عورتوں اور بچوں کو بے سروسامانی کی حالت میں گھربارچھوڑ کرامدادی کیمپوں میں منتقل ہونا پڑا۔

اسرائیل نے زمینی کاروائی سے قبل خبردار کیا ہے کہ فلسطینی اپنے گھربار چھوڑدیں، اسرائیلی انتباہ کے بعد چار ہزار سے زائد فلسطینی شمالی غزہ میں اپنے گھر بار چھوڑ کر دوسرے علاقوں کی طرف نقل مکانی کرچکے ہیں جبکہ مزید ہزاروں افراد کی نقل مکانی کا سلسلہ جاری ہے۔

سات روزمیں غزہ میں ایک ہزار سے زائد مقامات اسرائیلی بمباری سے ملبے کا ڈھیربن گئے ہیں، ایک سو سے زائد فلسطینیوں کی شہادت کے برعکس کوئی اسرائیلی زخمی تک نہیں ہوا، اسرائیل کی وحشیانہ بمباری کے خلاف عالمی برادری بدستور خاموش تماشائی کا کردار ادا کررہی ہے۔ اس رویے کو دیکھتے ہوئے اسرائیل کے وزیراعظم نتن یاہو نے ایک بار پھر ہٹ دھرمی کا مظاہرہ کرتے ہوئے بے گناہ اور نہتے فلسطینیوں کے خلاف جارحیت کا سلسلہ غیرمعینہ مدت تک جاری رکھنے کا اعلان کیا ہے۔

 ایک طرف غزہ پربمبوں کی بارش ہور ہی ہےتو دوسری طرف اقوام متحدہ اور امریکا زبانی جمع خرچ میں مصروف ہیں، بان کی مون نے اسرائیلی دہشت گردی پرصرف اظہار تشویش ہی کیا ہے جبکہ امریکی وزیرخارجہ نےاسرائیلی وزیراعظم کوفون کرکے محض حملوں پرتشویش کا اظہار کیا۔