غزہ میں اسرائیلی افواج کی جانب سے زمینی اور فضائی حملوں کے خلاف یورپ، مشرق وسطیٰ اور ایشیا کے کئی شہروں میں لاکھوں لوگوں نے احتجاجی ریلی نکالی۔
لندن میں فلسطینیوں کے حق میں بڑا مظاہرہ کیا گیا جس کی فضائی فوٹیج میں لوگوں کے بڑے ہجوم کو دارالحکومت کے وسط سے مارچ کرتے ہوئے دکھایا گیا ہے جو وزیر اعظم رشی سانک کی حکومت سے جنگ بندی میں کردار ادا کرنے کا مطالبہ کررہا تھا۔
مظاہرین میں شامل کیملی ریویلٹا کا کہنا تھا کہ سپر پاورز اپنا کردار ادا نہیں کر رہی ہیں۔ یہی وجہ ہے کہ ہم لوگ یہاں ہیں اور ہم جنگ بندی کے ساتھ ساتھ فلسطینیوں کے حقوق، ان کے وجود کا حق، جینے کا حق، انسانی حقوق اور اپنے تمام حقوق کا مطالبہ کر رہے ہیں۔
انھوں نے کہا کہ یہ احتجاجی ریلی حماس کے لیے نہیں ہے بلکہ یہ فلسطینیوں کی جانوں کے تحفظ کے لیے ہے۔
واشنگٹن کے موقف اپناتے ہوئے سانک کی حکومت نے جنگ بندی کا مطالبہ کو روک دیا ہے اور اس کے بجائے غزہ میں لوگوں تک امداد پہنچانے کے لیے انسانی بنیادوں پر وقفے کی حمایت کی ہے۔
ملائیشیا میں بھی مظاہرین کے ایک بڑے مجمع نے کوالالمپور میں امریکی سفارت خانے کے باہر نعرے لگائے۔
استنبول میں ایک بہت بڑی ریلی میں لاکھوں حامیوں سے خطاب کرتے ہوئے ترک صدر طیب اردگان نے کہا کہ اسرائیل ایک غاصب ہے۔ انھوں نے حماس کے دہشت گرد تنظیم نہ ہونے کے اپنے موقف کو دہرایا۔
عراقیوں نے بغداد اور اسرائیل کے زیر قبضہ مغربی کنارے میں ایک ریلی میں حصہ لیا جبکہ ہیبرون میں فلسطینی مظاہرین نے اسرائیلی مصنوعات کے عالمی بائیکاٹ کا بھی مطالبہ کیا۔ نعرے لگاتے ہوئے ان کا کہنا تھا کہ فلسطینی بچوں کے قتل میں کردار ادا نہ کریں۔
یورپ میں کوپن ہیگن، روم اور اسٹاک ہوم کی سڑکوں پر بھی وہاں کے شہریوں نے احتجاج کیا۔ پیرس میں پابندی کے باوجود ہفتے کو ایک چھوٹی سی ریلی نکالی گئی۔ جنوبی شہر مارسیلے میں بھی کئی سو افراد نے مارچ کیا۔
نیوزی لینڈ کے دارالحکومت ویلنگٹن میں ہزاروں افراد نے فلسطینی پرچم اور پلے کارڈز اٹھا رکھے تھے جن پر ’’آزاد فلسطین‘‘ لکھا ہوا تھا، مظاہرین نے پارلیمنٹ ہاؤس کی طرف مارچ کیا۔
لندن میں اسرائیلی سفارتخانے کے گرد احتجاجی مظاہروں کو روکنے کے لیے خصوصی پابندیاں لگائی گئی تھیں۔
واضح رہے کہ فلسطینی وزارت صحت کی جانب سے ہفتے کو جاری ہونے والی یومیہ رپورٹ کے مطابق، تین ہفتے قبل اسرائیل کی بمباری شروع ہونے کے بعد سے غزہ میں مرنے والوں کی تعداد سات ہزار 650 تک پہنچ گئی ہے، جن میں زیادہ تر عام شہری ہیں۔
