غزہ میں اسرائیلی فوج کی جانب سے اسپتال پر کیے جانے والے حملے کے نتیجے میں 500 سے زائد افراد کی شہادت کے بعد دنیا بھر میں اظہار افسوس کیا جارہا ہے۔
اس حوالے سے اسرائیل کی جانب سے حملے کیے جانے کے الزام کو مسترد کردیا ہے اس کا کہنا ہے کہ اسرائیل کی فوج نے غزہ میں کسی اسپتال کو نشانہ نہیں بنایا۔
اسرائیل کی جانب سے تردید کے بعد اقوام متحدہ میں فلسطین کے مندوب ریاض منصور نے اسپتال پر اسرائیلی حملے کی حقیقت بیان کردی۔
انہوں نے بتایا کہ حملے بعد اسرائیلی وزیراعظم بنجمن نیتن یاہو کے ترجمان نے ٹویٹ کیا کہ اسرائیل نے اسپتال پر یہ سوچ کر حملہ کیا کہ اسپتال کے آس پاس حماس کا اڈہ ہے اور پھر بعد ازاں وہ ٹویٹ ڈیلیٹ کر دیا گیا۔
ریاض منصور نے بتایا کہ ہمارے پاس اس ٹویٹ کی کاپی موجود ہے، اب انہوں نے فلسطینیوں کو مورد الزام ٹھہرانے کے لیے کہانی کو بدلنے کی کوشش کی ہے، ان کا مزید کہنا تھا کہ اسرائیلی فوج کے ترجمان نے تقریباً ایک ہفتہ قبل ایک بیان بھی دیا تھا جس میں انہوں نے کہا تھا کہ اسپتالوں کو خالی کرو، اسپتال نشانے پر ہیں۔
اقوام متحدہ میں فلسطینی مندوب ریاض منصور نے اسرائیلی کارروائیوں کی سخت مذمت کرتے ہوئے امریکی صدر بائیڈن سے مطالبہ کیا ہے کہ وہ فوری طور پر جنگ بندی کروائیں، اسرائیل کو یہ بتائیں کہ بس بہت ہو چکا۔ آپ کو غزہ کی پٹی میں فلسطینی عوام کے خلاف اس قتل عام کو روکنا ہوگا۔
ریاض منصور نے کہا کہ بیس لاکھ فلسطینیوں کو بے گھر نہ کریں اورانہیں اردن کی جانب نہ دھکیلیں، آپ کو غزہ کی پٹی میں فلسطینی عوام کے خلاف اس قتل عام کو روکنا ہوگا۔
