تل ابیب(15 اگست 2025): اسرائیلی وزیر نے راتوں رات مشرقی بیت المقدس کو مغربی کنارے سے الگ کرنیکی منظوری دے دی۔
غیر ملکی میڈیا رپورٹ کے مطابق اسرائیل نے ایک اور گھناؤنا اقدام کرتے ہوئے راتوں رات مشرقی بیت المقدس کو مغربی کنارے سےالگ کرنیکی منظوری دے دی، اس منصوبے کے تحت مغربی کنارے اور مقبوضہ بیت المقدس کے درمیان تین ہزار چار سو گھر اسرائیلی آباد کاروں کے لیے تعمیر کیے جائیں گے۔
اسرائیلی وزیر خزانہ کے ترجمان کا کہنا ہے کہ جلد آباد کاروں کیلئے مکانات کی تعمیر سے متعلق بتایا جائے گا، اسرائیلی وزیر خزانہ کے مطابق اس اقدام سے فلسطینی ریاست بننے کا خیال دفن کردیا جائے گا۔
دوسری جانب اسرائیلی وزیراعظم نیتن یاہو نے گریٹر اسرائيل کے منصوبے سے متعلق بیان دیا جس نے ہل چل مچادی، نیتن یاہو نے کہا گریٹر اسرائیل کا منصوبہ میرے بہت قریب ہے ہم اس حوالے سے ایک تاریخی اور روحانی مشن پر ہیں۔
واضح رہے کہ گریٹر اسرائیل میں فلسطینی علاقوں کے علاوہ اردن اور مصر کے بھی کچھ حصے شامل ہوں گے، کئی عرب ممالک سے بے گھر فلسطینیوں کو پناہ دینے سے متعلق بات چیت ہورہی ہے۔
چند ماہ پہلے اسرائیل کی صیہونی حکومت نےگریٹر اسرائیل کا نقشہ جاری کیا تھا اور اس نقشے میں مقبوضہ فلسطینی علاقوں کے علاوہ اردن، شام، لبنان اور دیگر عرب ممالک کو صیہونی ریاست کا حصہ دکھایا گیا تھا۔
https://urdu.arynews.tv/hamas-calls-for-global-marches-to-protest-against-israels-war-on-gaza/
