اسرائیلی میڈیا نے اپنی رپورٹ میں دعویٰ کیا ہے کہ اسرائیل نے ایران کو پیغام دیا ہے کہ وہ جنگ کو چند دنوں میں ختم کرنا چاہتا ہے اور وہ بہت جلد حملے کرنا بند کردے گا۔
اس حوالے سے ٹائمز آف اسرائیل کی رپورٹ میں انتہائی معتبر سیکیورٹی حکام کے حوالے سے خبر دی ہے کہ اسرائیل ایران کی حکومت کا تختہ اُلٹنے اور اس کا موجودہ نظام تبدیل کرنے میں ناکام رہا ہے اور اب وہ جنگ ختم کرنے کو بھی تیار ہے۔
رپورٹ کے مطابق اسرائیل کے سینیئر حکام کا کہنا ہے کہ اسرائیل اپنے جنگی اہداف کے قریب پہنچ چکا ہے، لیکن اگر ضرورت پڑی تو وہ جنگ کو مزید بڑھا بھی سکتا ہے۔
اسرائیلی دفاعی مبصرین کے مطابق اسرائیل ’چند دنوں‘ میں ایران کے خلاف جنگ ختم کرنے کا ارادہ تو رکھتا ہے لیکن ساتھ ہی یہ دعویٰ بھی کیا گیا ہے کہ سپریم لیڈر آیت اللّٰہ علی خامنہ ای کو ہٹانے کے لیے ایرانی اپوزیشن جماعت سے مکمل تعاون کیا جائے گا۔
رائٹرز کی رپورٹ کے مطابق اسرائیل اب یہ طے کرنے کی کوشش کر رہا ہے کہ اس جنگ کو کیسے ختم کیا جائے تاکہ ایران کی جانب سے بھی میزائل اور ڈرون حملوں کا سلسلہ بند ہو۔
واضح رہے کہ اسرائیل نے 13 جون سے ایران پر اچانک حملے شروع کیے، جن میں کئی اہم ایرانی جنرل، ایٹمی سائنسدان، دفاعی نظام اور بیلسٹک میزائل تنصیبات کو نشانہ بنایا گیا۔
ایران، اسرائیل اور امریکی تنازع سے متعلق تمام خبریں جاننے کے لیے کلک کریں
ایران نے بھی اتوار اور پیر کو اسرائیل پر کئی بیلسٹک میزائل داغے جن سے 24 عام شہری ہلاک، سیکڑوں عمارتیں تباہ اور کئی ہزار لوگ بےگھر ہوگئے۔
