کراچی : سندھ ہائی کورٹ کے آئینی بینچ نے اسسٹنٹ کمشنرز کیلئے 138 ڈبل کیبن کی خریداری کیخلاف درخواست مسترد کردی۔
تفصیلات کے مطابق سندھ ہائی کورٹ کے آئینی بینچ میں اسسٹنٹ کمشنرز کے لئے 138 ڈبل کیبن کی خریداری کے خلاف درخواست پر سماعت ہوئی۔
حکومت کی جانب سیایڈووکیٹ جنرل جواد ڈیرو، درخواست گزار رکن سندھ اسمبلی محمد فاروق عدالت میں پیش ہوئے۔
عدالت نے اسسٹنٹ کمشنرز کے لئے 138 ڈبل کیبن کی خریداری کے خلاف درخواست مسترد کردی ،درخواست جماعت اسلامی کے رکن سندھ اسمبلی محمد فاروق و دیگر نے دائر کی تھی۔
عدالت نے وکیل درخواست گزار سے استفسار کیا کہ بتائیں آپ لوگ اس سے اسکیم سے کیسے متاثر ہوئے ہیں تو درخواست گزار کے وکیل نے کہا کہ درخواست گزار رکن سندھ اسمبلی ہے درخواست گزار نے اسیمبلی میں بھی مخالفت کی تھی لیکن اس کے باوجود گاڑیوں کی خریداری کی منظوری دی گئی۔
عدالت نے استفسار کیا کہ لیکن یہ معاملہ اسمبلی میں کیسے گیا ہوگا یہاں درخواست پر تو کسی بل یا ایکٹ نظر نہیں آرہا، جس پر درخواست گزار کا کہنا تھا کہ درخواست گزار نے گاڑیوں کی خریداری کے خلاف قراداد پیش کی تھی، بحیثیت شہری ڈبل کیبن گاڑیاں خریدی جائیں گی تو میں بھی متاثر ہوں گا۔
عدالت نے استفسار کیا کہ آپ کیسے متاثر ہو سکتے ہیں تو درخواست گزار نے کہا کہ بجٹ اور پیسہ سندھ حکومت کا ہی خرچ ہوگا لگژری گاڑیوں کے بجائے 1000 سی سی کی گاڑیاں خریدی جائیں۔
عدالت نے درخواست گزار سے مکالمہ کیا کہ آپ کو گاڑیوں کی سی سی پر مسئلہ ہے، آپ بتائیں کونسے رولز اور پالیسی کی خلاف ورزی ہوئی ہے۔
جس پر وکیل درخواست گزار عثمان فاروق نے کہا کہ بنیادی حقوق متاثر ہوتے ہیں تو عدالت نے ریمارکس دیے کونسے حقوق متاثر ہوئے آپکے کونسے قانون کی خلاف ورزی ہورہی ہے۔
درخواست گزار نے کہا کہ کہ مجھے وقت دے دیں میں رولز اور پالیسی کی خلاف ورزی سے متعلق تفصیلات دے دوں گا۔
جس پر عدالت کا کہنا تھا کہ وقت نہیں دے سکتے پہلے ہی کیس کئی ماہ سے زیر التوا ہے، ایڈووکیٹ جنرل نے کہا کہ عوامی مفادات کو سیاسی مفادات نا بنایا جائے یہ صرف پبلسٹی کیلئے کر رہے ہیں یہ لگڑری گاڑیاں نہیں بلکہ ضرورت ہیں درخواست کو مسترد کی جائے، اسسٹنٹ کمشنرز کے لئے گاڑیوں کی خریداری غیر ضروری نہیں نا ہی گاڑیوں کے لئے فنڈز کا غلط استعمال کیا جارہا ہے۔
ایڈووکیٹ جنرل جواد ڈیرو نے کہا کہ اسسٹنٹ کمشنرز کے پاس بہت اہم ذمہ داریاں ہوتی ہیں گاڑیوں کی خریداری ضروری ہے تاکہ افسران ذمہ داریاں احسن طریقے سے انجام دے سکیں اسسنٹنٹ کمشنرز کے لئے آخری بار خریداری 2010 اور 2012 میں ہوئی تھی سوزوکی کلٹس کی اوسط عمر چھ سال یا ایکسپریس لاکھ ساٹھ ہزار کلومیٹر ہے ،حکومت سندھ نے جواب میں کہنا تھا کہ بیشتر گاڑیاں اپنی میعاد پوری کر چکی ہیں۔
