استنبول : اسلامی ممالک کی عالمی تنظیم نے بیت المقدس کو آزاد فلسطین کا دارالحکومت قرار دیتے ہوئے امریکی فیصلے کو خطے کے لیے خطرناک قرار دیتے ہوئے مسترد کردیا ہے۔

عرب میڈیا کے مطابق اس بات کا فیصلہ بدھ کے روز مسلمان قائدین نے او آئی سی کے اہم اجلاس میں کیا جہاں فلسطین کو بہ طور آزاد ریاست اور مشرقی یروشلم (بیت المقدس) کو اس کا دارالحکومت قرار دینے کا متفقہ فیصلہ کیا گیا جب کہ ڈونلڈ ٹرمپ کے فیصلے کی سخت الفاظ میں مذمت کی گئی۔

ترجمان او آئی سی نے اپنے ایک بیان میں کہا ہے کہ 57 اسلامی ممالک نے پائیدار امن کے لیے علیحدہ علیحدہ دو ریاست کے فارمولے کی بنیاد پرتصفیے کے پُرامن حل پر اتفاق کیا گیا ہے جس کے لیے مشترکہ لائحہ عمل اور حکمت عملی وضع کرنے کی ضرورت پر زور دیا گیا ہے۔

ترجمان او آئی سی کا مزید کہنا تھا کہ اجلاس کے شرکاء نے اقوام متحدہ سے پُر زور مطالبہ کیا کہ اسرائیلی قبضہ ختم کرانے کے لیے اپنا اثر و رسوخ اور استعمال کرے اور ڈونلڈ ٹرمپ کو اپنے فیصلے پر نظر ثانی کے لیے مجبور کرے۔

اسی سے متعلق :  آزاد فلسطینی ریاست کے لیے مسلم ممالک کو جدوجہد کرنا ہوگی، شاہد خاقان

او آئی سی اجلاس میں شرکاء کا کہنا تھا کہ سلامتی کونسل بیت المقدس کے معاملے پر منصفانہ کردار ادا کرے اور اگر اس ضمن میں کوئی اقدام نہ کیا گیا تو عالمی ادارے کا کردار سوالیہ نشان بن جائے گا۔

خیال رہے گزشتہ ہفتے امریکا کی جانب سے یروشلم کو فلسطین کا دارالحکومت تسلیم کیے جانے پر ترک صدر طیب اردگان نے مسلمان ممالک کی عالمی تنظیم کا اجلاس طلب کیا تھا.

جدہ : اسلامی ممالک کی تنظیم نے کہا ہے کہ کشمیریوں کی جدو جہد حق خود ارادیت کے حصول کے لیے ہے جسے دہشت گردی کہنا نامناسب بات ہے اور ہم کشمیریوں کی جدوجہد کی مکمل حمایت کا اعادہ کرتے ہیں.

اس عزم کا اعادہ اسلامی ممالک کی بین الاقوامی تنظیم ( او آئی سی) کے سیکٹری جنرل ڈاکٹر یوسف بن احمد نے ایک سیمینار سے خطاب کرتے ہوئے کیا.

غیر ملکی میڈیا کے مطابق سیمینار سے خطاب کرتے ہوئے سیکرٹری جنرل ڈاکٹر یوسف بن احمد نے کہا کہ بھارت کشمیری عوام کے خلاف طاقت کے استعمال کو ترک کر دے اور کشمیریوں کو اقوام متحدہ کی قراردادوں کے تحت حقوق دیئے جائیں.

انہوں نے مزید کہا کہ او آئی سی اپنے کشمیری بھائیوں کے حقوق کے لیے عالمی سطح پر آواز اٹھاتی رہے گی اور دستیاب وسائل کے ساتھ حق کشمیریوں کی ہر ممکن مدد و معاونت بھی کرتی رہے گی.

دنیا بھرمیں کشمیریوں نے یوم شہدائے جموں کشمیر منایا

اس موقع پر سیمینار کے شرکاء کوکشمیری عوام کے نمائندے سید فیض نقشبندی نے مقبوضہ کشمیر میں جاری بھارتی افواج کے غیر انسانی سلوک اور ظلم و بربریت سے متعلق آگاہ کرتے ہوئے پیلٹ گنوں سے شہید و زخمی ہونے والے کشمیریوں کی تفصیلات بتائیں.

یاد رہے مذکورہ سیمینار 1947 میں جموں اور کشمیر میں بھارت کے غیر قانونی داخلے اور پاکستان جانے والے کشمیری مہاجرین پر کشمیری راجہ اور بھارتی فوجوں کے دستوں کی جانب سے فائرنگ میں شہداء کی یاد میں منعقد کی گیا تھا.

اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔