اسلام آباد : وفاقی دارالحکومت میں حالیہ بارشوں کے بعد مارگلہ ہلز کے ٹریل عوام کیلئے بند کردیا گیا۔
اسلام آباد کی ضلعی انتظامیہ کے نوٹیفکیشن کے مطابق ٹریل 2، 3، 4، 5 اور سیدپور گاؤں کے پیچھے والا ٹریل بند ہے جب کہ فیصلہ شہریوں اور ہائیکرز کی حفاظت کے پیش نظر کیا گیا ہے۔
نوٹیفکیشن میں مزید بتایا گیا ہے کہ یکم ستمبر سے ٹریل بند اور مزید احکامات تک عوامی رسائی پر پابندی ہے، ضلعی انتظامیہ کا اقدام شہریوں کی جان و مال کے تحفظ کیلئے اٹھایا گیا۔
محکمہ موسمیات کی شدید بارش کی وارننگ کے پیش نظر ہائیکرز اور وزیٹرز کو محتاط رہنے کی ہدایت کی گئی ہے۔ مارگلہ ہلز جانے والے شہری کل کسی بھی ٹریل پر جانے سے گریز کریں۔
اسلام آباد : بھارت کیخلاف شاندار فتح کی یاد میں ’’معرکہ حق ‘‘یادگار کی تعمیر کا آغاز کردیا گیا، یادگار کا تھیم قرآن پاک کی آیت "بنیان مرصوص” سے لیا گیا ہے۔
تفصیلات کے مطابق بھارت کے خلاف شاندار فتح کی یاد میں اسلام آباد کے سیکٹر ایچ-8 میں قومی یادگار ’’معرکہ حق‘‘ کی تعمیر کا آغاز کر دیا گیا۔ یہ یادگار زیرِ استعمال پارک میں تعمیر کی جارہی ہے جسے جدید اور پرکشش عوامی مقام میں تبدیل کیا جائے گا۔
یادگار کا تھیم قرآن پاک کی آیت "بنیان مرصوص” سے لیا گیا ہے جس کا مفہوم "سیسہ پلائی ہوئی دیوار” ہے۔ یہ علامت قوم کے اجتماعی غیر متزلزل عزم اور اتحاد کو ظاہر کرتی ہے۔
منصوبے کے ڈیزائن اور تعمیر کی ذمہ داری فرنٹیئر ورکس آرگنائزیشن (ایف ڈبلیو او) کو سونپی گئی ہے جبکہ کیپیٹل ڈویلپمنٹ اتھارٹی (سی ڈی اے) نے یادگار کے لیے مختص جگہ ایف ڈبلیو او کو فراہم کر دی ہے۔ وزیراعظم کی خصوصی ہدایت اور حکومتی مالی معاونت سے منصوبے پر عملی کام شروع کر دیا گیا ہے۔
وزیراعظم نے 13 اور 14 اگست کی درمیانی شب اس یادگار کے ڈیزائن کی نقاب کشائی کی تھی، منصوبے پر تیزی سے عمل درآمد جاری ہے جبکہ تعمیر میں عالمی معیار کے مٹیریل اور اعلیٰ بین الاقوامی تعمیراتی تقاضوں کو مدنظر رکھا جا رہا ہے۔
’’معرکہ حق‘‘ یادگار کا مقصد قومی اتحاد و یکجہتی کو خراجِ تحسین پیش کرنا ہے، جو عوامی شعور، فخر اور اجتماعی قربانیوں کی علامت کے طور پر سامنے آئے گی۔ یہ یادگار اسلام آباد کے منظرنامے میں باوقار قومی اضافہ اور قوم کے اتحاد کا مظہر ہوگی۔
اسلام آباد: شورومز کی غیرقانونی پارکنگ کے خلاف بڑا کریک ڈاؤن کیا گیا، شورومز انتظامیہ اور مارکیٹ یونین کو بھی اعتماد میں لیا گیا۔
تفصیلات کے مطابق دارلحکومت میں قائم شورمز کی سڑک پر غیرقانونی پارکنگ کےخلاف آپریشن کیا گیا، پولیس نے بتایا کہ آپریشن سیکٹر جی نائن اور جی ایٹ کے شورومز کے خلاف کیا گیا، شورومز انتظامیہ اور مارکیٹ یونین سے بھی ملاقات کی گئی۔
اسلام آباد: ویڈیو بنا کر دھمکیاں دینے والے فتنہ الخوارج کے 4 دہشت گردوں کو گرفتار کرلیا گیا ، جبکہ زیر استعمال گاڑی بھی برآمد کرلی گئی ہے۔
تفصیلات کے مطابق وفاقی دارلحکومت اسلام آباد میں حساس ادارے نے کارروائی کرتے ہوئے فتنہ الخوارج کے چار دہشتگردوں کو راولپنڈی اور حسن ابدال سے گرفتار کرلیا۔
ذرائع نے بتایا کہ ملزمان نے 11 اگست کو راولپنڈی اور حسن ابدال میں دہشتگردی کی کارروائیوں کی دھمکیاں دی تھیں۔
ذرائع کا کہنا ہے کہ دہشت گردوں نے ایک ویڈیو بھی تیار کی تھی جس میں حملوں کی دھمکیاں دی گئیں، بعد ازاں یہ ویڈیو سوشل میڈیا پر پھیلائی گئی۔
کارروائی کے دوران ویڈیو بنانے کے لیے دہشتگردوں کے زیر استعمال گاڑی بھی برآمد کرلی گئی ہے اور گرفتار ملزمان سے مزید تفتیش جاری ہے۔
یاد رہے راولپنڈی میں کاؤنٹر ٹیررازم ڈیپارٹمنٹ (سی ٹی ڈی) اور حساس ادارے نے کامیاب خفیہ کارروائی کے دوران فتنہ الخوارج سے تعلق رکھنے والا انتہائی خطرناک دہشت گرد گرفتار کیا تھا۔
ترجمان کا کہنا تھا کہ گرفتار دہشت گرد حساس مقامات کی ریکی مکمل کر چکا تھا اور کسی بڑے حملے کی منصوبہ بندی کر رہا تھا جبکہ ملزم متعدد بار افغانستان جا کر دہشتگردی کی تربیت حاصل کر چکا ہے اور فتنہ الخوارج کے ایک اہم کمانڈر کے ساتھ رابطے میں تھا۔
دہشت گرد کو راولپنڈی کے ایک علاقے سے گرفتار کیا گیا جہاں وہ کارروائی کے لیے تیاری میں مصروف تھا۔
اسلام آباد: وفاقی دارلحکومت میں ایک اور جواں سالہ لڑکی غیرت کے نام پر قتل کردیا گیا، مقتولہ نے اپنی مرضی سے شادی کی تھی، جس پر اس کے بھائی کو سخت رنج تھا۔
تفصیلات کے مطابق وفاقی دارلحکومت اسلام آباد میں تھانہ شمس کالونی کی حدود میں غیرت کے نام پر ایک اور افسوسناک واقعہ پیش آیا، جہاں حقیقی بھائی نے بہن کو فائرنگ کرکے قتل کردیا۔
پولیس نے بتایا کہ مقتولہ نے اپنی مرضی سے شادی کی تھی، جس پر اس کے بھائی کو سخت رنج تھا، ملزم نے بہن کے سر پر گولی ماری جس کے نتیجے میں وہ موقع پر ہی جاں بحق ہوگئی۔
پولیس کا کہنا تھا ملزم کی شناخت عادل حسین کے نام سے ہوئی ہے، جو سی ڈی اے کا سابق ملازم ہے۔
واقعے کی اطلاع ملتے ہی پولیس جائے وقوعہ پر پہنچ گئی اور شواہد اکٹھے کرنے کے بعد مقدمہ درج کرلیا گیا اور ملزم کو گرفتار کر کے مزید تحقیقات کی جارہی ہیں۔
یاد رہے چند ہفتے قبل پنجاب کے شہر تھانہ تاندلیانوالہ میں غیرت کے نام پر ایک اور قتل کا واقعہ پیش آیا تھا ، جہاں بھائی نے بہن کو فائرنگ کر کے قتل کردیا تھا
پولیس کا کہنا تھا کہ مقتولہ علینہ طلاق کے بعد بھائی کے گھر میں رہائش پذیر تھی، پولیس نےکارروائی کر کے ملزم مہتاب کو گرفتار کرلیا تھا۔
اسلام آباد (21 اگست 2025): غیر مقامی کرایہ داروں کے حوالے سے اسلام آباد پولیس نے اہم ہدایت جاری کی ہے۔
تفصیلات کے مطابق ڈی آئی جی جواد طارق کی زیر صدارت جرائم کے انسداد سے متعلق اجلاس منعقد ہوا، جس میں غیر مقامی کرائے داروں کی بائیو ڈیٹا تصدیق اور رجسٹریشن یقینی بنائے جانے کی اہم ہدایت جاری کی گئی۔
ڈی آئی جی اسلام آباد نے ہدایت کی کہ اشتہاری اور سابقہ ریکارڈ یافتہ مجرمان کی گرفتاری یقینی بنائی جائے، پٹرولنگ مؤثر بنائی جائے اور ہر افسر فیلڈ میں نظر آئے، انھوں نے ہدایت کی کہ متحرک گینگز کے خلاف کریک ڈاؤن کیا جائے۔
جواد طارق نے یہ ہدایت بھی کی کہ غیر قانونی اسلحہ اور منشیات فروشوں کے خلاف کارروائیوں میں تیزی لائی جائے اور جرائم کی روک تھام کے لیے تمام وسائل بروئے کار لائے جائیں، اس لیے افسران اپنے علاقوں میں سرچ آپریشنز جاری رکھیں۔
ان کا کہنا تھا کہ شہریوں کی جان و مال کا تحفظ پولیس کی اوّلین ترجیح ہے۔
اسلام آباد (21 اگست 2025): حکومت طالب علموں کی مقروض نکلی، وفاقی کالج آج ایجوکیشن کے طلبہ کی جانب سے جمع کرائے گئے 13 ملین روپے یوٹیلٹی بلز کی مد میں خرچ کر دیے گئے۔
تفصیلات کے مطابق وفاقی کالج آف ایجوکیشن اسلام آباد کی سرکاری آڈٹ رپورٹ میں انکشاف ہوا ہے کہ طلبہ کی فلاح و بہبود کے لیے جمع کرائی گئی بھاری رقم سرکاری طور پر استعمال کیا گیا۔
آڈٹ رپورٹ کے مطابق حکومت نے وفاقی کالج آف ایجوکیشن اسلام آباد کے اسٹوڈنٹس فنڈ کے 12.9 ملین روپے خلاف ضابطہ خرچ کر ڈالے، اسٹوڈنٹس فنڈ سے کالج کی گاڑیوں میں خلاف ضابطہ پٹرول ڈلوایا جاتا رہا، بجلی، گیس اور انٹرنیٹ کے بل خلاف ضابطہ دیے گئے۔
رپورٹ میں کہا گیا ہے کہ طلبہ فنڈ سے آئیسکو، ایس این جی پی ایل، پی او ایل اور نیاٹیل کو بھی ادائیگیاں کی گئیں، طلبہ فنڈز سے یہ ادائیگیاں قواعد و ضوابط کے بر خلاف کی گئیں۔
آڈٹ رپورٹ میں یہ بھی کہا گیا ہے کہ 12.9 ملین روپے کی رقم 10 برس کے دوران بطور قرض لی گئی ہے، اور 12.9 ملین میں سے 7.9 ملین روپے واپس کیے گئے لیکن 5 ملین اب بھی بقایا ہیں۔
اسلام آباد (18 اگست 2025): وفاقی دارالحکومت میں عوامی نیشنل پارٹی (اے این پی) کی آل پارٹیز کانفرنس کے اعلامیے کو ملک کی دو مرکزی سیاسی جماعتوں نے مسترد کر دیا۔
تفصیلات کے مطابق اے این پی کی آل پارٹیز کانفرنس میں جاری اعلامیہ ن لیگ اور پیپلز پارٹی کے بغیر جاری کیا گیا، نون لیگ اور پیپلز پارٹی نے اعلامیے پر دستخط نہیں کیے۔
عرفان صدیقی نے کہا یہ ہمارے نہیں آپ کے مطالبات ہیں، نیر بخاری، طارق فضل چوہدری اور عرفان صدیقی اعلامیہ پڑھنے کے دوران اٹھ کر چلے گئے۔
اعلامیے میں کیا تھا؟
اعلامیے میں کہا گیا کہ خیبرپختونخوا اور بلوچستان میں جاری تمام آپریشن فوری بند کیے جائیں، دہشتگردی اور آپریشن سے متاثرہ علاقوں کی فوری بحالی کی جائے، سیلاب متاثرہ علاقوں کو آفت زدہ قرار دے کر فوری امدادی پیکیج کا اعلان کیا جائے، اور ضم اضلاع میں تمام اختیارات سول انتظامیہ کے حوالے کیے جائیں۔
اعلامیے میں کہا گیا کہ جانی و مالی نقصانات کی غیر جانب دارانہ تحقیقات کے لیے عدلیہ کی نگرانی میں ٹروتھ کمیشن بنایا جائے، نام نہاد ڈیتھ اسکواڈ، غیر قانونی مسلح جتھوں کا فوری خاتمہ کیا جائے۔ معدنیات اور وسائل پر صوبوں کے آئینی حقوق تسلیم کیے جائیں، نیشنل فنانس کمیشن ایوارڈ پر آئین کے تحت عمل کیا جائے اور میڈیا پر پابندیاں ختم کی جائیں۔
قبل ازیں، کانفرنس سے خطاب میں عرفان صدیقی نے اصل صورت حال کو نظر انداز کرتے ہوئے اعتراض ’بے اثر‘ کرنے کی کوشش کرتے ہوئے کہا کہ کچھ لوگ کہتے ہیں اس حکومت میں شہری حقوق نہیں ہیں، مارشل لا لگا ہوا ہے، مارشل لا ہوتا تو کیا ہم یہاں بیٹھے ہوتے۔
کانفرنس کے دوران میزبان ایمل ولی خان نے پی ٹی آئی کے جمہوری کردار پر سوالیہ نشان لگاتے ہوئے پہلے تو بیرسٹر گوہر کی اے پی سی میں عدم شرکت کا شکوہ کیا، اور پھر کہا موجودہ ہو یا سابقہ کسی حکومت نے آئین پر عمل نہیں کیا۔
اسلام آباد (13 اگست 2025): قومی اسمبلی میں اپوزیشن رکن شیخ وقاص اکرم کی نشست خالی قرار دینے کا فیصلہ کیا گیا ہے۔
تفصیلات کے مطابق قومی اسمبلی کا اجلاس آج صبح 11 بجے ہوگا، اسپیکر ایاز صادق اجلاس کی صدارت کریں گے، قومی اسمبلی سیکرٹریٹ نے اجلاس کا 16 نکاتی ایجنڈا جاری کر دیا۔
شیخ وقاص اکرم کی نشست خالی قرار دینے کی تحریک بھی ایجنڈے میں شامل کی گئی ہے، اپوزیشن رہنما کی نشست خالی قرار دینے کی تحریک ایوان میں پیش ہوگی، جسے حکومتی رکن سیدہ نوشین افتخار پیش کریں گی، ایوان کی منظوری سے شیخ وقاص کی اسمبلی رکنیت ختم کر دی جائے گی۔
آج کے اجلاس میں اہم قانون سازی بھی ایجنڈے میں شامل ہے، آسان کاروبار بل 2025 آج منظوری کے لیے پیش کیا جائے گا، نیشنل اسکول آف پبلک پالیسی 2025 بھی ایجنڈے میں شامل ہے، انسداد دہشت گردی ترمیمی بل 2025، پٹرولیم ترمیمی بل 2025 بھی منظوری کے لیے پیش ہوگا۔
امریکی صدر کے تیل ذخائر سے متعلق بیان پر حکومتی خاموشی پر توجہ دلاؤ نوٹس پیش کیے جانے کا بھی امکان ہے، اسلام آباد کے نجی اسپتالوں اور لیبارٹریوں میں زائد چارجز پر بھی توجہ دلاؤ نوٹس ایجنڈے کا حصہ ہے۔
اسلام آباد : وفاقی دارالحکومت میں 13 اگست کو تعطیل کا اعلان کر دیا گیا ہے ، اس طرح شہری 13 اور 14 اگست کی دو چھٹیوں سے لطف اندوز ہوسکیں گے۔
تفصیلات کے مطابق وفاقی دارالحکومت میں 13 اگست 2025 بروز بدھ مقامی تعطیل کا اعلان کر دیا گیا۔
ضلعی مجسٹریٹ کے دفتر سے 12 اگست کو جاری نوٹیفکیشن میں کہا گیا کہ چھٹی کا اطلاق وفاقی دارالحکومت میں قائم تمام سرکاری و نجی دفاتر، تعلیمی اداروں اور دیگر متعلقہ اداروں پر ہوگا، تاہم ضروری خدمات فراہم کرنے والے ادارے اس سے مستثنیٰ ہوں گے تاکہ عوامی سہولیات کی فراہمی متاثر نہ ہو۔
نوٹیفکیشن میں واضح کیا گیا ہے کہ میٹروپولیٹن کارپوریشن اسلام آباد (ایم سی آئی)، کیپیٹل ڈویلپمنٹ اتھارٹی (سی ڈی اے)، آئی سی ٹی ایڈمنسٹریشن، آئی سی ٹی پولیس، اسلام آباد الیکٹرک سپلائی کمپنی (آئیسکو)، سوئی ناردرن گیس پائپ لائنز لمیٹڈ (ایس این جی پی ایل) اور ہسپتال معمول کے مطابق کام کریں گے۔
