ARYNews.tv | Urdu – Har Lamha Bakhabar

Tag: اسلام آباد ایئر پورٹ

  • معمولی بارش کے بعد اسلام آباد ایئر پورٹ کے ٹرمنل کی چھت ٹپکنے لگی

    معمولی بارش کے بعد اسلام آباد ایئر پورٹ کے ٹرمنل کی چھت ٹپکنے لگی

    اسلام آباد: گزشتہ شب شہر میں ہونے والی معمولی بارش کے بعد اسلام آباد ایئر پورٹ کے ٹرمنل کی چھت ایک بار پھر ٹپکنے لگی جس سے مسافر مشکلات کا شکار ہوگئے۔

    تفصیلات کے مطابق معمولی بارش نے سول ایوی ایشن اتھارٹی کا بھانڈا پھوڑ دیا، کل رات ہونے والی بارش کے بعد اسلام آباد ایئر پورٹ کے ٹرمنل کی چھت ایک بار پھر ٹپکنے لگی۔

    پانی ٹپکنے کا سی اے اے نے انوکھا حل ڈھونڈ لیا، ٹپکتی چھت کے نیچھے تین لوہے کے ڈسٹ بن رکھ دیے گئے۔

    ٹرمنل کے فرش پر پانی گرنے سے مسافروں کو شدید مشکلات کا سامنا ہے، اس حوالے سے اسلام آباد ایئر پورٹ کے مینیجر مؤقف دینے سے گریزاں ہیں۔

    ترجمان سول ایوی ایشن اتھارٹی اسلام آباد کا کہنا ہے کہ بلڈنگ کی فارسیلنگ کی پٹی طوفانی ہواؤں کے باعث ہٹ گئی تھی جس کی وجہ سے چھت ٹپکنا شروع ہوگئی۔ کنٹریکٹرز سے مرمت کا کام شروع کروا دیا گیا ہے۔

    سول ایوی ایشن اتھارٹی کی غفلت و لاپرواہی کے باعث اسلام آباد ایئرپورٹ پر پہلے بھی مسافروں کو مختلف مشکلات پیش آتی رہی ہیں۔

    گزشتہ برس مون سون کی بارشوں کے دوران ائیرپورٹ کے رن وے پر بے تحاشہ پانی کھڑا ہوگیا جس کے باعث رن وے کسی جھیل کا منظر پیش کرنے لگا۔

    بارش کے پانی کی نکاسی کا کام دو سے 3 روز تک نہ ہوسکا جس کی وجہ سے اندرون و بیرون ملک جانے والی پروازیں متاثر ہوئیں۔

  • اسلام آباد ایئر پورٹ کے بورڈنگ برج کا انہدام، ٹھیکے دار کمپنی کے خلاف کارروائی کا حکم

    اسلام آباد ایئر پورٹ کے بورڈنگ برج کا انہدام، ٹھیکے دار کمپنی کے خلاف کارروائی کا حکم

    کراچی: اسلام آباد ایئر پورٹ کے بورڈنگ برج کےانہدام کی تحقیقات مکمل کر لی گئیں، سی اے اے کی جانب سے ٹھیکے دار کمپنی کے خلاف کارروائی کا حکم دے دیا گیا۔

    تفصیلات کے مطابق بورڈ آف انکوائری نے ڈائریکٹر جنرل سی اے اے کو اسلام آباد ایئر پورٹ کے بورڈنگ برج کے انہدام سے متعلق رپورٹ جمع کرا دی۔

    [bs-quote quote=”حادثے کے ذمہ دار اہل کاروں کے خلاف بھی سخت کارروائی کا حکم” style=”style-7″ align=”left” color=”#dd3333″][/bs-quote]

    ڈی جی سول ایوی ایشن اتھارٹی نے بورڈنگ برج کے ٹھیکے دار ایڈلٹے کمپنی کے خلاف کارروائی کی ہدایات جاری کرتے ہوئے کہا کہ کمپنی بغیر اضافی معاوضے کے برج کو دوبارہ تعمیر کرے۔

    ڈی جی سی اے اے نے حادثے کے ذمہ دار اہل کاروں کے خلاف بھی سخت کارروائی کا حکم دے دیا۔

    انکوائری کمیٹی نے اسلام آباد ائیر پورٹ پروجیکٹ کے منیجمنٹ کنسلٹنٹ کی کارکردگی پر بھی تشویش کا اظہار کیا، کمیٹی نے تجویز دی کہ ملک کے تمام ائیر پورٹس کے بورڈنگ برجز کا از سرِ نو معائنہ کیا جائے۔

    یہ بھی پڑھیں:  نیواسلام آباد ایئرپورٹ کے تمام بورڈنگ برج خطرناک قرار دے دیئے گئے

    یاد رہے کہ رواں سال 9 اکتوبر کو اسلام آباد ائیر پورٹ کا ایک بورڈنگ برج گر گیا تھا۔ ایک غیر ملکی ایئر لائن کے طیارے کے ساتھ پسنجر برج لگایا جا رہا تھا کہ اچانک گرگیا جس کے نتیجے میں آپریٹر زخمی ہوا جسے طبی امداد کے لیے اسپتال منتقل کر دیا گیا۔

    دو ماہ قبل 21 اکتوبر کو ڈائریکٹر انجینئرنگ نے نیو اسلام آباد ایئرپورٹ پر پسنجر برج گرنے کے بعد ایئر پورٹ کے تمام بورڈنگ برج خطرناک قرار دے دیے تھے۔ رپورٹ میں کہا گیا کہ ایئر پورٹ کے تمام پسنجر بورڈنگ برج پہلے دن ہی سے خراب اور نقائص کا شکار ہیں۔

  • پاکستان کی حدود میں اسرائیلی طیارے کی اڑان، اسرائیلی صحافی اپنے ٹویٹ سے پِھر گیا

    پاکستان کی حدود میں اسرائیلی طیارے کی اڑان، اسرائیلی صحافی اپنے ٹویٹ سے پِھر گیا

    اسلام آباد: پاکستان کی حدود میں اسرائیلی طیارے کی اڑان اور پھر لینڈنگ کی خبروں پرسخت حکومتی ردِ عمل سامنے آنے پر اسرائیلی صحافی اپنے ہی ٹویٹ سے پِھر گیا۔

    تفصیلات کے مطابق اسرائیلی صحافی اپنے اس بیان سے پِھر گیا ہے کہ اسرائیلی طیارے نے پاکستان میں لینڈنگ کی ہے، اس سے قبل اس نے کہا تھا کہ اسرائیلی طیارہ مبینہ طور پر اسلام آباد ایئر پورٹ پر اترا تھا۔

    [bs-quote quote=”فلائٹ اسلام آباد کے اوپر چالیس ہزار فٹ کی بلندی سے بیس ہزار پر آئی، پتا نہیں کہ لینڈنگ ہوئی یا نہیں: صحافی” style=”style-7″ align=”left” color=”#dd3333″][/bs-quote]

    اسرائیلی صحافی کہتا ہے کہ فلائٹ اسلام آباد کے اوپر چالیس ہزار فٹ کی بلندی سے بیس ہزار پر آئی، پھر طیارہ ٹریک سے غائب ہوگیا، یہ نہیں پتا کہ لینڈنگ ہوئی یا نہیں۔

    خیال رہے کہ دو دن قبل اسرائیلی صحافی ایوی شارف نے سماجی رابطوں کی ویب سائٹ ٹویٹر پر پیغام میں کہا کہ ایک اسرائیلی طیارے نے تل ابیب سے اڑان بھر کر عمان میں لینڈ کیا اور پھر وہاں سے اران بھر کر اسلام آباد میں لینڈ کیا۔

    یہ ٹویٹ سامنے آتے ہیں پاکستان میں اپوزیشن بھی متحرک ہوگئی، مسلم لیگ ن کے رہنما احسن اقبال نے ٹویٹ کیا کہ حکومت کو معاملے کی وضاحت کرنا ہوگی۔ احسن اقبال کے ٹویٹ پر وزیرِ اطلاعات فواد چوہدری نے کہا ’آپ جعلی فکر نہ کریں، پاکستان محفوظ ہاتھوں میں ہے۔‘

    یہ بھی پڑھیں:  وزیر خارجہ نے اسرائیلی طیارے کی پاکستان آمد کی خبر کو بے بنیاد قرار دے دیا

    دوسری طرف سول ایوی ایشن نے مبینہ اسرائیلی طیارے کی اسلام آباد آمد کی تمام افواہوں کی تردید کرتے ہوئے کہا اسرائیلی طیارے کی پاکستان آمد سے متعلق افواہوں میں صداقت نہیں۔

  • منی لانڈرنگ کی روک تھام، سیکریٹری داخلہ کی زیرِ صدارت اسلام آباد ایئر پورٹ پر اہم اجلاس

    منی لانڈرنگ کی روک تھام، سیکریٹری داخلہ کی زیرِ صدارت اسلام آباد ایئر پورٹ پر اہم اجلاس

    اسلام آباد: منی لانڈرنگ کی روک تھام کے لیے سیکریٹری داخلہ کی زیرِ صدارت اسلام آباد ایئر پورٹ پر اہم اجلاس منعقد ہوا۔

    تفصیلات کے مطابق سیکریٹری داخلہ کی زیرِ صدارت منی لانڈرنگ کی روک تھام کے لیے اسلام آباد ایئر پورٹ پر اہم اجلاس میں تمام ایئر پورٹس پر تعینات اداروں کو بھرپور کردارا دا کرنے کی ہدایت کر دی گئی۔

    [bs-quote quote=”ادارے بیرون ملک جانے والے مسافروں پر کڑی نگاہ رکھیں گے” style=”style-7″ align=”left” color=”#dd3333″][/bs-quote]

    اجلاس میں ایف آئی اے، سی اے اے، اے این ایف اور کسٹمز حکام نے شرکت کی، ایئر پورٹس سیکورٹی فورس کو بھی منی لانڈرنگ کی روک تھام کا ٹاسک دے دیا گیا۔

    اجلاس میں ایئر پورٹس پر بیرون ملک جانے والے مسافروں پر کڑی نگاہ رکھنے کا فیصلہ کیا گیا، ادارے بیرون ملک جانے والے مسافروں پر کڑی نگاہ رکھیں گے۔

    مسافروں کے سامان کی چیکنگ کے ساتھ ساتھ انسدادِ منی لانڈرنگ کے لیے اے ایس ایف کو فعال کر دیا گیا، متعلقہ اہل کاروں کو انسدادِ منی لانڈرنگ کورس کے لیے نامزد کرنے کی ہدایت کی گئی۔

     یہ بھی پڑھیں:  منی لانڈرنگ کیس: اومنی گروپ کا چیف فنانشل افسر سعودی عرب میں گرفتار

    نامزد اہل کاروں کو ملکی و غیر ملکی ماہرین انسدادِ منی لانڈرنگ پر تربیت دیں گے، ذرائع کا کہنا ہے کہ فیصلے کا مقصد ملک کو ایف اے ٹی ایف کی پابندیوں سے بچانا ہے۔

    یاد رہے کہ دو دن قبل منی لانڈرنگ کیس میں اہم پیش رفت ہوئی ہے، اومنی گروپ کے چیف فنانشل افسر اسلم مسعود کو سعودی عرب میں حراست میں لے لیا گیا۔

  • پہلی حج پرواز 325 حجاج کو لے کر اسلام آباد پہنچ گئی

    پہلی حج پرواز 325 حجاج کو لے کر اسلام آباد پہنچ گئی

    اسلام آباد: فریضۂ حج کی ادائیگی کے بعد پی آئی اے نے سعودی عرب سے پاکستان کے لیے حج پروازوں کا آغاز کر دیا، 325 حجاج کرام کو لے کر پہلی حج پرواز پی کے 3002 اسلام آباد بر وقت پہنچ گئی ہے۔

    تفصیلات کے مطابق سعودی عرب سے پہلی حج پرواز 325 حجاج کو لے کر اسلام آباد پہنچ گئی، پرواز کی آمد پر پی آئی اے اعلیٰ حکام نے حجاج کا استقبال کیا۔

    صدر پاکستان انٹرنیشنل ایئر لائن اور چیف ایگزیکٹو آفیسر مشرف رسول نے اسلام آباد ایئر پورٹ پر استقبال کرتے ہوئے حجاج کرام کو مبارک باد دی۔

    پی آئی اے حج ٹیم کے ارکان کو ہدایت کی گئی ہے کہ فریضۂ حج کی ادائیگی کرکے وطن لوٹنے والے حجاج کو ہر ممکن سہولتیں فراہم کی جائیں۔

    قومی ایئر لائن حکام کا کہنا ہے کہ پی آئی اے جدہ اور مدینہ منوّرہ سے 225 خصوصی اور شیڈول پروازیں چلائے گی۔ خیال رہے کہ پی آئی اے 68 ہزار سے زائد حجاج کرام کو اسلام آباد، کراچی اور دیگر شہروں میں پہنچائے گی۔

    دریں اثنا کراچی کے لیے بھی حج پروازوں کا آغاز ہوگیا ہے، پہلی حج پرواز پی کے 3006 کراچی ایئر پورٹ پہنچ گئی جس کے ذریعے 390 حجاج کرام وطن واپس پہنچے۔

    کراچی کے لیے پہلی حج پرواز کی آمد پر پی آئی اے کے چیف کارپوریٹ سیکرٹری محمد شعیب اور پی آئی اے کے اعلیٰ حکام نے حجاج کرام کا استقبال کیا۔

    مزید پڑھیں:  پی آئی اے حج آپریشن : حجاج کرام کی وطن واپسی کا عمل آج سے شروع ہوگا

    ترجمان قومی ایئر لائن نے کہا ہے کہ پی آئی اے کا بعد از حج آپریشن کا اختتام 25 ستمبر کو ہوگا۔

  • عدالت نے اسلام آباد ایئر پورٹ کی لاگت کا ریکارڈ طلب کرلیا

    عدالت نے اسلام آباد ایئر پورٹ کی لاگت کا ریکارڈ طلب کرلیا

    اسلام آباد: سپریم کورٹ نے اسلام آباد میں  تعمیر کیے جانے والے بین الاقوامی ایئر پورٹ پر آنے والی لاگت کا مکمل ریکارڈ 13 جون کو طلب کرلیا۔

    تفصیلات کے مطابق گزشتہ دنوں پنجاب کے مختلف شہروں میں طوفانی بارشوں کے نتیجے میں اسلام آباد ایئر پورٹ پر پانی کھڑا ہوگیا تھا، جس پر چیف جسٹس نے از خود نوٹس لے لیا۔

    از خود نوٹس کیس کی سماعت کرتے ہوئے چیف جسٹس ثاقب نثار نے کہا کہ آئندہ سماعت پر ایئر پورٹ پر پانی بھرنے کی سی سی ٹی وی فوٹیج لائی جائے۔ چیف جسٹس نے پی آئی اے کے ایم ڈی اور اسٹیشن منیجراسلام آباد کو بھی آئندہ سماعت پر طلب کرلیا۔

    سول ایوی ایشن اتھارٹی کے نمائندے نے عدالت کو بتایا کہ ویڈیوز پرانی ہیں، سوشل میڈیا پر وائرل ہونے والی ویڈیوز ڈیڑھ سال قبل کی ہیں۔

    اسلام آباد ایئرپورٹ کا رن وے جھیل میں تبدیل

    چیف جسٹس نے اس پر افسوس کا اظہار کرتے ہوئے کہا کہ سوشل میڈیا اکاؤنٹس سرحد پار سے چلائے جا رہے ہیں، ریاستی اداروں پر حملے ہو رہے ہیں اور عوام کوگم راہ کیا جا رہا ہے۔

    چیف جسٹس نے انتظامیہ پر تنقید کرتے ہوئے کہا کہ دنیا میں جو ایئرپورٹ بنتے ہیں ان پر بہ یک وقت دو دو جہاز لینڈ اور ٹیک آف کر سکتے ہیں جب کہ آپ نے اربوں لگا دیے اور اس ایئر پورٹ پر صرف ایک جہاز لینڈ کرسکتا ہے۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • قومی ایئرلائن کی بدنظمی انتہا کو پہنچ گئی

    قومی ایئرلائن کی بدنظمی انتہا کو پہنچ گئی

    لاہور: ایئرپورٹ پر قومی ایئرلائن کی پرواز منسوخ ہونے پر مسافروں نے شدید احتجاج کیا اور گو نواز گو کے نعرے لگائے۔

    لاہور ایئرپورٹ پر پی آئی اے کی بار سلونا جانے والی پرواز سیون نائن فائیو کو منسوخ کرکے مسافروں کو طیارے سے آف لوڈ کر دیا گیا، جس پر مسافروں نے ایئرپورٹ پر احتجاج کیا اور گو نواز گو اور پی آئی اے کیخلاف نعرے لگائے۔

    دوسری جانب اسلام آباد ایئر پورٹ پر پی آئی اے کے طیارے کے ہائیڈرولک سسٹم میں فنی خرابی کے باعث اسلام آباد ائیرپورٹ کو عارضی طور پر بند کردیا گیا تاہم طیارے کو رن وے سے ہٹانے کے بعد ائیرپورٹ کو دوبارہ کھول دیا گیا ہے۔

    کراچی ایئرپورٹ پر بھی لاہور جانے والی پرواز بدنظمی کا شکار ہوگئی، پی آئی اے نے جہازکے مسافروں کی اورلوڈنگ کردی، جہاز کے پائلٹ نے اوور لوڈنگ پر پرواز لے جانے سے انکار کردیا۔

    اداکارہ روبینہ اشرف بھی طیارے میں سوار تھیں، روبینہ اشرف نے اے آر وائی نیوز سے خصوصی گفتگو کرتے ہوئے کہا کہ مسافروں کو جہازسے اتار دیا گیا اور کچھ دیر میں روانگی کا کہا ہے، پی آئی کی بدنظمی کی وجہ سے مسافروں کی پریشانی کا سامنا کرنا پڑ رہا ہے۔