اسلام آباد پنڈی سمیت گرد ونواح میں موسلا دھار بارش جاری ہے سید پور میں برساتی نالے کا پُل ٹوٹنے سے وفاقی دارالحکومت میں سیلاب آ گیا۔
پاکستان کے بیشتر علاقے شدید بارشوں کی لپیٹ میں ہیں اور کئی علاقوں میں موسلادھار بارش سے نظام زندگی مفلوج ہو گیا ہے۔ جڑواں شہر اسلام آباد اور پنڈی بھی آج صبح سے تیز بارش کی زد میں ہیں جس سے سیلابی صورتحال پیدا ہو گئی ہے۔
موسلادھار بارش سے سیدپور کے علاقے میں پانی کے تیز بہاؤ سے نالے کا پل ٹوٹ گیا اور وفاقی دارالحکومت میں سیلاب آ گیا۔
پُل ٹوٹنے اور پانی کے بہاؤ میں اضافے کے باعث ایک گاڑی نالے میں گر گئی جب کہ کئی گاڑیاں سیلابی پانی میں ڈوب گئیں۔
متعلقہ حکام کا کہنا ہے کہ بارش رکنے کے بعد نالے کے اطراف غیر قانونی تعمیرات کو مسمار کیا جائے گا۔
جڑواں شہروں راولپنڈی اور اسلام آباد میں موسلادھار بارش کے بعد رین ایمرجنسی نافذ کر دی گئی ہے۔ ایم ڈی واسا کے مطابق اسلام آباد میں سب سے زیادہ بارش سید پور کے مقام پر 124 ملی میٹر ریکارڈ کی گئی ہے۔
موسلادھار بارش کی صورتحال کے باعث نشیبی علاقوں میں عملہ ہیوی مشینری کے ساتھ تعینات ہے اور واسا کے مطابق نالہ لئی کی نگرانی جاری ہے۔
تازہ ترین اطلاعات کے مطابق نالہ لئی میں کٹاریاں کے مقام پر 14 فٹ بلند ہو چکی ہے، جس کے بعد علاقے میں ہنگامی سائرن بجا دیے گئے ہیں۔
دوسری جانب جڑواں شہروں اسلام آباد اور راولپنڈی میں ہونے والی طوفانی بارش کے باعث وفاقی دارالحکومت کے تمام ڈیمز میں تیراکی پر پابندی عائد کر دی گئی ہے جب کہ کشتی رانی پر بھی پابندی عائد کی جا رہی ہے۔
https://urdu.arynews.tv/pakistan-braces-for-more-rains-as-monsoon-death-toll-rises-to-216/