Tag: اسلام آباد ہائیکورٹ

اسلام آباد : اسلام آباد ہائیکورٹ نے 18 افغان شہریوں کی ملک بدری روک دی اور وزارت داخلہ، نادرا، ڈی جی امیگریشن، ایف آئی اے اور پولیس کو نوٹس جاری کرتے ہوئے جواب طلب کر لیا۔

تفصیلات کے مطابق اسلام آباد ہائیکورٹ کے چیف جسٹس سرفراز ڈوگر نے افغان شہریوں کی جانب سے دائر درخواست پر تحریری حکمنامہ جاری کردیا، درخواست گزاروں کی جانب سے وکیل عادل عزیز قاضی اور دیگر عدالت میں پیش ہوئے۔

تحریری حکمنامے میں کہا گیا کہ حکومت نے 4 اگست کو درخواست گزاروں کے پی او آر کارڈز منسوخ کرتے ہوئے انہیں واپس بھجوانے کا حکم دیا تھا۔

وکیل نے مؤقف اپنایا کہ درخواست گزار مرحوم فضل الرحمان کے خاندان سے تعلق رکھتے ہیں، فضل الرحمان مرحوم نے 2008 میں تمام قانونی تقاضے پورے کرنے کے بعد شہریت کے لیے درخواست دی تھی، تاہم تاحال اس درخواست پر کوئی فیصلہ نہیں کیا گیا۔

عدالت نے فریقین کو ہدایت کی ہے کہ آئندہ سماعت پر پیراوائز کمنٹس جمع کرائیں اور تحریری حکمنامے میں کہا گیا ہے کہ آئندہ سماعت تک درخواست گزاروں کے خلاف کسی بھی قسم کی کارروائی نہ کی جائے۔

اسلام آباد ہائیکورٹ نے 18 افغان شہریوں کو واپس بھجوانے کی کارروائی آگے بڑھانے سے روک دیا۔

عدالت نے وزارت داخلہ، نادرا، ڈی جی امیگریشن، ایف آئی اے اور پولیس کو نوٹس جاری کرتے ہوئے جواب طلب کرلیا اور کیس کی مزید سماعت 18 ستمبر کو مقرر کردی۔

اسلام آباد : اسلام آباد ہائیکورٹ نے ڈاکٹر عافیہ صدیقی کیس میں وزیر اعظم اور کابینہ کے خلاف توہین عدالت کی کارروائی کا انتباہ دے دیا۔

تفصیلات کے مطابق ڈاکٹر عافیہ صدیقی سےمتعلق کیس کی اسلام آباد ہائیکورٹ میں سماعت ہوئی ، جسٹس سردار اعجاز اسحاق نے ڈاکٹر فوزیہ صدیقی کی درخواست پر سماعت کی۔

درخواست گزار کی جانب سے وکیل عمران شفیق اور وفاق کی جانب سے ایڈیشنل اٹارنی جنرل راشدحفیظ اور دیگرعدالت میں پیش ہوئے۔

اسلام آبادہائیکورٹ نے وفاق کی جانب سے پھر رپورٹ پیش نہ کرنے پر اظہاربرہمی کرتے ہوئے کہا کہ ڈاکٹر عافیہ کے معاملے پر معاونت سے انکار کی وجوہات پررپورٹ مانگی تھی۔

جسٹس اعجازاسحاق خان نے ریمارکس دیئے وفاق کی رپورٹ پیش نہیں کی گئی توپوری کابینہ کو بلاؤں گا، کیوں نہ وفاقی کابینہ کے وزرا کیخلاف توہین عدالت کارروائی کی جائے؟ عدالت صرف کابینہ نہیں وزیراعظم کیخلاف بھی توہین عدالت کارروائی کرے گی۔

جسٹس سردار اعجاز اسحاق کا کہنا تھا کہ جون میں عدالت نے جواب مانگا تھا مگر کوئی رپورٹ نہیں آئی، 3 روز دے رہا ہوں رپورٹ پیش کی جائے۔

ایڈیشنل اٹارنی جنرل نے استدعا کی اگلے ہفتے کی مہلت دے دیں توجسٹس اعجاز اسحاق نے کہا کہ اگلے ہفتے سے میری سالانہ چھٹیاں ہوں گی۔

عدالت نے ایڈیشنل اٹارنی جنرل کی آئندہ ہفتےتک کیلئے مہلت کی استدعا منظور کرلی اور سماعت 21 جولائی تک کیلئے ملتوی کردی۔

اسلام آباد : اسلام آباد ہائیکورٹ کے ججز کی جولائی اور اگست کے دوران تعطیلات کا شیڈول جاری کردیا گیا۔

تفصیلات کے مطابق اسلام آباد ہائیکورٹ میں جولائی اور اگست میں تعطیلات کا شیڈول جاری کردیا گیا۔

آفس آرڈر میں کہا گیا کہ چیف جسٹس سرفراز ڈوگر 2ماہ تعطیلات کے دوران چھٹی نہیں کریں گے جبکہ جسٹس طارق جہانگیری، جسٹس بابرستار کی جولائی میں چھٹی ہوگی ، وہ اگست میں کیسز سنیں گے۔

آفس آرڈر میں کہنا ہے کہ جسٹس خادم حسین ، جسٹس اعظم خان اور جسٹس ارباب طاہر اگست میں چھٹی پرہوں گے ،جولائی میں دستیاب ہوں گے۔

آفس آرڈر کے مطابق جسٹس اعجاز اسحاق 21 جولائی سے30اگست تک چھٹی پر ہوں گے اور یکم سے 20 جولائی دستیاب ہوں گے۔

اس کے علاوہ جسٹس انعام امین منہاس 20 جولائی سے 20 اگست تک اور جسٹس ثمن رفعت امتیاز14 سے 18جولائی پھر 4 سے 22 اگست چھٹی پر ہوں گی۔

جسٹس محسن کیانی اور جسٹس محمد آصف کی چھٹیوں کے شیڈول کا انتظار ہے۔

آرڈر میں کہا گیا کہ ہائیکورٹ میں ضمانت کے کیسز ، حبس بے جامیں رکھنےاور کورٹ کے فکس کیسز چھٹیوں میں سنے جائیں گے۔

اسٹے آرڈر سے متعلقہ ودیگر ارجنٹ کیسز مقرر ہوسکیں گے اور دائری برانچ کیسز فائلنگ کے لیے کھلی رہے گی۔

اسلام آباد : پاکستان تحریک انصاف ( پی ٹی آئی ) کی آج احتجاج کی کال کے پیش نظر اسلام آباد ہائیکورٹ کے باہر سیکیورٹی ہائی الرٹ کردی گئی۔

تفصیلات کے مطابق پی ٹی آئی نے اسلام آباد ہائی کورٹ کی عدلیہ کے ساتھ اظہار یکجہتی کیلئے آج کال دے رکھی ہے۔

پاکستان تحریک انصاف کی عدلیہ کے حق میں احتجاج کے موقع پر سکیورٹی ہائی الرٹ کردی گئی ہے، ہائی کورٹ کے اطراف میں پولیس اور ایف سی کی اضافی نفری تعینات کی گئی ہے جبکہ قیدی وین اور بکتر بند گاڑی بھی پہنچا دی گئیں۔

پی ٹی آئی ارکان قومی صوبائی اسمبلی آج اسلام آباد ہائی کورٹ کے باہر جمع ہوں گے، رکان اسمبلی و کارکن عدلیہ سے اظہار یکجہتی کریں گے۔

مزید پڑھیں : مجھے امید ہے بانی پی ٹی آئی عید سے پہلے رہا ہوں گے ، بیرسٹر گوہر

پی ٹی آئی قیادت کا بھی ہائیکورٹ کے باہر جمع ہونے کا امکان ہے، 190 ملین پاؤنڈ نیب کیس میں بانی اور بشری بی بی کی سزا معطلی کیس تاحال مقرر نہ ہو سکا، تحریک انصاف کی قیادت آج پھر کیس مقرر کروانے کے لیے ہائیکورٹ آئے گی۔

اس حوالے سے خیبر پختونخوا حکومت کے ترجمان بیرسٹر سیف نے کہا کہ اسلام آباد ہائیکورٹ کے باہر آج بھرپور احتجاج ہوگا، احتجاج میں تمام اپوزیشن جماعتوں کو دعوت دی گئی ہے۔

ترجمان کا کہنا تھا کہ 26ویں آئینی ترمیم کی زنجیریں توڑ کر عمران خان کےکیسز سنے جائیں، مقدمات کی سماعت میں تاخیرثابت کرتی ہے کیسز جھوٹے ہیں۔

انھوں نے مزید کہا کہ مقدمات میں تاخیرکا مقصد عمران خان کو قید میں رکھناہے، ان کی رہائی سے جعلی حکومت اپنا انجام دیکھ رہی ہے۔

اسلام آباد : اسلام آباد ہائیکورٹ میں سیکٹر ای الیون زمین خرد برد نیب کیس میں بنچ تبدیلی پر ڈویژن بنچ کا اہم حکم آگیا، جس کے بعد قائم مقام چیف جسٹس کی ہدایت پر نیا ججز روسٹر جاری ہوگیا۔

تفصیلات کے مطابق اسلام آباد ہائیکورٹ میں ایک اور بنچ تبدیلی پر نیا تنازعہ کھڑا ہو گیا، سیکٹر ای الیون زمین خرد برد نیب کیس بنچ تبدیلی پر ڈویژن بنچ کا اہم حکم آگیا

ڈویژن بنچ نے حکم دیا کہ جسٹس محسن اختر کیانی اور جسٹس سردار اعجاز اسحاق کے بینچ میں کیس مقرر کیا جائے۔

دو رکنی بینچ کے آرڈر کے بعد قائم مقام چیف جسٹس کی ہدایت پر نیا ججز روسٹر جاری ہوگیا ، نئے ججز ڈیوٹی روسٹر میں جسٹس محسن اختر کیانی کا ڈویژن بنچ ہی ختم کردیا گیا۔

اب آئندہ ہفتے روسٹر میں جسٹس محسن اختر کیانی کا ڈویژن بنچ ہی موجود نہیں۔

نیب کے خلاف کیس جسٹس محسن اختر کیانی اور جسٹس سردار اعجاز اسحاق کے ڈویژن بینچ میں زیر سماعت تھا۔

28 اپریل کو سماعت کے روز بینچ کی عدم دستیابی کے باعث کیس کی کازلسٹ منسوخ ہوئی جبکہ 22 مئی کے لیے کیس جسٹس محسن کیانی اور جسٹس سردار اعجاز اسحاق کے پاس مقرر ہوا۔

28 اپریل کو ہی قائم مقام چیف جسٹس کی ہدایت پر نیا ججز روسٹر جاری ہوا ، نئے روسٹر میں جسٹس محسن اختر کیانی کے ساتھ جسٹس ثمن رفعت کا بینچ بنا دیا گیا۔

8 مئی کو سیکٹر ای الیون زمین خرد برد کیس کی متفرق درخواست نئے بینچ کے سامنے مقرر ہوئی تھی ، وکیل نے بتایا کہ پہلے یہ کیس جسٹس محسن کیانی اور جسٹس سردار اعجاز اسحاق سن چکے۔

جسٹس محسن اختر کیانی اور جسٹس ثمن رفعت نے کیس دوبارہ پرانے بینچ میں مقرر کرنے کے لیے آرڈر جاری کردیے گئے۔