Tag: اسلام آباد ہائیکورٹ

اسلام آباد: وفاقی دار الحکومت کے ہائی کورٹ میں آج ریاستی اداروں کے خلاف ہرزہ سرائی اور اکسانے کے کیس کی سماعت ہوئی، عدالت نے پی ٹی ایم کے رہنماؤں کو نوٹسز جاری کر دیے۔

تفصیلات کے مطابق اسلام آباد ہائی کورٹ میں ریاستی اداروں کے خلاف ہرزہ سرائی کیس کی سماعت ہوئی، عدالت میں پشتون تحفظ موومنٹ (پی ٹی ایم) پر پابندی کے لیے درخواست دی گئی تھی۔

وکیل درخواست گزار نے عدالت سے کہا کہ پی ٹی ایم رہنماؤں کے سوشل میڈیا اکاؤنٹس بند کرنے کا حکم جاری کیا جائے۔

بیرسٹر شعیب نے عدالت کو بتایا کہ پی ٹی ایم رجسٹرڈ سیاسی جماعت نہیں ہے، اور استدعا کی کہ اس پر پابندی عائد کی جائے۔

یہ بھی پڑھیں:  چند لوگ فاٹا میں امن اور ترقی کا عمل سبوتاژ کرنا چاہتے ہیں، شوکت یوسفزئی

عدالت نے سیکرٹری داخلہ، دفاع، اور قانون و انصاف کو نوٹسز جاری کر دیے، عدالت کی جانب سے پیمرا اور پی ٹی اے کو بھی نوٹسز کے ذریعے جواب طلب کر لیا گیا۔

اسلام آباد ہائی کورٹ نے پی ٹی ایم کے رہنماؤں منظور پشتین، ایم این اے محسن داوڑ، اور ایم این اے علی وزیر کو بھی نوٹس جاری کر دیے اور ان سے تحریری جواب طلب کر لیا۔

اسلام آباد ہائی کورٹ نے کیس کی سماعت 2 ہفتے تک ملتوی کر دی۔

اسلام آباد: ہائی کورٹ نے ہریش کمپنی کیس میں پی پی شریک چیئرمین آصف علی زرداری کی عبوری ضمانت 13 جون تک منظور کر لی۔

تفصیلات کے مطابق اسلام آباد ہائی کورٹ نے 13 جون تک آصف زرداری کی ضمانت قبل از گرفتاری منظور کر لی، عدالت نے انھیں 5 لاکھ کے مچلکے جمع کرانے کا حکم دیا۔

تاہم سابق صدر کے وکیل فاروق ایچ نائیک نے عدالت سے استدعا کی کہ مچلکے 5 لاکھ نہیں 2 لاکھ کیے جائیں۔

جس پر جسٹس محسن اختر کیانی نے کہا کہ کیوں، کیا آصف زرداری کا کیش ختم ہو گیا ہے؟ وکیل نے کہا کہ مؤکل کی جانب سے اتنے کیسز میں کیش جمع کرایا گیا ہے کہ کیش تو ختم ہوگا نا۔

یہ بھی پڑھیں:  احتساب عدالت میں جعلی اکاؤنٹس کیس کی سماعت 30 مئی تک ملتوی

عدالت نے وکیل کی استدعا منظور کرتے ہوئے آصف زرداری کو 2 لاکھ کے مچلکے جمع کرانے کا حکم دے دیا۔

خیال رہے کہ آج سابق صدر آصف زرداری کی طرف سے ضمانت قبل از گرفتاری کی ایک اور درخواست دائر کی گئی تھی، جس میں کہا گیا تھا کہ نیب نے کال آف نوٹس 16 مئی کو جاری کیا تھا، نیب نے مجھے انکوائری کے لیے بلایا ہے اور گرفتاری کا خدشہ ہے۔

درخواست میں استدعا کی گئی کہ کیسز کی سماعت مکمل ہونے تک ہائی کورٹ ضمانت دے۔

یاد رہے نیب نے سابق صدر آصف علی زرداری کے خلاف ہریش کمپنی کیس میں ضمنی ریفرنس دائر کرنے اور ملزم نامزد کرنے کا فیصلہ کیا تھا اور کہا آصف زرداری کو نیب تحقیقات میں تعاون نہ کرنے پر ملزم بنایا جا رہا ہے۔

اسلام آباد: ہائی کورٹ نے گھوٹکی، سندھ سے تعلق رکھنے والے دو مسلم بہنوں کے کیس میں تحریری حکم نامہ جاری کرتے ہوئے کہا ہے کہ عدالتی حکم کے باوجود وفاق نے نو مسلم بہنوں کے معاملے میں انکوائری رپورٹ پیش نہیں کی۔

تفصیلات کے مطابق اسلام آباد ہائی کورٹ نے اپنے حکم نامے میں کہا ہے کہ وفاق کی جانب سے عدالت میں کوئی انکوائری رپورٹ پیش نہیں کی گئی، جو افسر عدالت آئے ان کا کہنا تھا کہ کوئی انکوائری میں پیش نہیں ہوا، جب کہ 26 مارچ کو عدالت نے انکوائری کر کے رپورٹ پیش کرنے کا حکم دیا تھا۔

ہائی کورٹ نے کہا کہ عدالت میں کمشنر سکھر اور سندھ حکومت کے نمائندے پیش ہوئے تھے، معاملہ حساس ہے، وفاقی حکومت ٹاسک فورس قائم کرے اور وزیر ہیومن رائٹس شیریں مزاری عدالت میں رپورٹ جمع کرائیں۔

اسلام آباد ہائی کورٹ نے دونوں بہنوں نادیہ اور آسیہ کو بھی آئندہ سماعت میں عدالت میں پیش ہو کر بیان ریکارڈ کرانے کا حکم دیا۔

یہ بھی پڑھیں:  نومسلم بہنوں کی عمر کے تعین اور حقائق کیلیے 5 رکنی کمیشن قائم کرنے کا حکم

عدالت نے کہا کہ آئین اقلیتوں کو حقوق دیتا ہے، سیکریٹری داخلہ کمیشن ممبران کی معاونت کریں اور انھیں سہولت فراہم کریں، کمیشن اس بات کی تحقیقات کرے کہ لڑکیوں کے ساتھ زبردستی تو نہیں کی گئی، سندھ اور وفاقی حکومت بھی کمیشن کو سہولت فراہم کریں۔

ہائی کورٹ نے وفاقی حکومت کو میڈیکل بورڈ تشکیل دینے کا بھی حکم دیا، کہا پمز اسپتال کے سینئر اسپیشلسٹ ڈاکٹرز پر مبنی بورڈ بنایا جائے، جس کا کام لڑکیوں کی عمر اور شادی پر رپورٹ جمع کرانا ہوگا، رپورٹ آئندہ سماعت پر جمع کرائی جائے۔

اسلام آباد: سابق وزیراعظم نواز شریف کی طبی بنیادوں پر رہائی کا فیصلہ آج اسلام آباد ہائیکورٹ میں سنایا جائے گا۔

تفصیلات کے مطابق سابق وزیراعظم نواز شریف کی طبی بنیادوں پر رہائی کا فیصلہ آج اسلام آباد ہائیکورٹ میں سنایا جائے گا، ہائیکورٹ میں پولیس کے اضافے دستے، سادہ لباس اہلکار تعینات ہوں گے۔

جسٹس عامر فاروق، جسٹس محسن اختر کیانی پر مشتمل اسلام آباد ہائیکورٹ کا کا دو رکنی بینچ نواز شریف کی سزا معطلی کی درخواست پر محفوظ کردہ فیصلہ سنائے گا۔

رپورٹ کے مطابق کل اسلام آباد ہائیکورٹ میں غیرمتعلقہ افراد کے داخلے پر پابندی ہوگی، 25 فروری کو جن سائل کا کیس لگا ہوا ہے ان کو ہائیکورٹ میں داخل ہونے کی اجازت ہوگی۔

مزید پڑھیں: اپنے ہی گراتے ہیں نشیمن پہ بجلیاں، نواز شریف، مریم نواز کی بھارت نوازی پھر بے نقاب

واضح رہے کہ مجرم نواز شریف العزیزیہ کیس میں کوٹ لکھپت جیل میں قید ہیں احتساب عدالت نے نواز شریف کو 7 سال قید اور جرمانے کا حکم سنایا تھا۔

نیب نے نواز شریف اور ان کے بچوں کے خلاف العزیزیہ اسٹیل ملز، فلیگ شپ انویسٹمنٹ اور ایون فیلڈ ریفرنسز احتساب عدالت میں دائر کیے۔

احتساب عدالت نے ایون فیلڈ ریفرنس کا فیصلہ سناتے ہوئے نواز شریف کو 10 سال، ان کی صاحب زادی مریم نواز کو 7 اور داماد کیپٹن (ر) صفدر کو ایک سال قید کی سزا سنائی جسے بعدازاں اسلام آباد ہائیکورٹ نے معطل کردیا تھا۔

یاد رہے کہ احتساب عدالت نے 24 دسمبر 2018 کو العزیزیہ ریفرنس میں نواز شریف کو 7 سال قید اور فلیگ شپ ریفرنس میں انہیں بری کیا تھا۔