Tag: اسلام آباد ہائی کورٹ

اسلام آباد :اسلام آباد ہائی کورٹ نے پی ٹی آئی فارن فنڈنگ کیس 30 روز میں مکمل کرنے کا حکم آئندہ سماعت تک معطل کردیا۔

تفصیلات کے مطابق اسلام آباد ہائی کورٹ میں تحریک انصاف کی سنگل رکنی بنچ کے فیصلے کے خلاف انٹراکورٹ اپیل پر سماعت ہوئی، چیف جسٹس اسلام آباد ہائی کورٹ اور جسٹس بابر ستار نے سماعت کی۔

تحریک انصاف کے وکیل نے بتایا کہ فیصلے میں کہاگیااسی نوعیت کی درخواستوں کافیصلہ عدالت نےپہلے کیا، الیکشن کمیشن نے انکشاف کیا اکبر ایس بابر شکایت ثابت کرنے میں ناکام رہے۔

شاہ خاور ایڈووکیٹ کا کہنا تھا کہ دستاویزات اسکروٹنی کمیٹی سےحاصل مواد ہےجو شکایت کا حصہ نہیں بنتا ،مواداکبر ایس بابر کے ساتھ شیئر نہیں کیا جا سکتا،اسکروٹنی کمیٹی کے سامنے کارروائی زیر التوا ہے۔

وکیل پی ٹی آئی نے کہا کہ سنگل رکنی بنچ نے کہا الیکشن بذات خود ایک آئینی ادارہ ہے، ہائی کورٹ کاالیکشن کمیشن پرنگرانی کادائرہ اختیار نہیں ، سنگل رکنی بنچ کا فیصلہ اعلیٰ عدالتوں کے فیصلوں کے منافی ہے۔

شاہ خاور نے مزید کہا کہ الیکشن کمیشن ایک انتظامی اتھارٹی ہے، سنگل رکنی بنچ نے زیر التواشکایت کی کارروائی 30 دن میں مکمل کرنے کا حکم دیا ، حکم الیکشن کمیشن کےدائرہ کار میں دخل اندازی کےمترادف ہو سکتا ہے۔

عدالت میں تحریک انصاف کے وکیل کا کہنا تھا کہ ہائی کورٹ آرٹیکل199کےتحت ہی متاثرہ شخص کی درخواست پراختیاراستعمال کرسکتی ہے، الیکشن کمیشن کے سامنے زیر التواکارروائی تفتیشی نوعیت کی ہے۔

وکیل نے بتایا کہ فیصلے میں کہا فنڈنگ ممنوع ذرائع سے ہونے پر پارٹی اور چیئرمین پراثرپڑےگا، درخواست گزار سیاسی جماعت ہونے کے ناطے اپناوقار برقرار رکھنے کا پابند ہے، مذکورہ پیرا میں الفاظ کے انتخاب کی قانون میں کوئی ضمانت نہیں۔

شاہ خاور ایڈووکیٹ کا کہنا تھا کہ بینچ نےایسے معاملات پربحث کی جودرخواستوں کا حصہ نہیں تھے، سنگل رکنی بنچ کامن گھڑت فیصلہ قانون کے لحاظ سے قابل عمل نہیں ، اسلام آباد ہائیکورٹ کاڈویژن بنچ سنگل رکنی بنچ کا فیصلہ کالعدم قرار دے۔

فارن فنڈنگ کی دو درجہ بندی ہیں، ایک وہ جوپاکستانی نژاد فنڈز دیں، دوسرا وہ جو غیر ملکی فنڈزدیں، جس پر چیف جسٹس نے ریمارکس دیئے کہ یہ مناسب نہیں ہم الیکشن کمیشن کو ہدایات جاری کریں، الیکشن کمیشن ایک آئینی ادارہ ہے، الیکشن کمیشن کے کسی حکم سے آپ متاثر ہیں تو بتائیں۔

اسلام آباد ہائیکورٹ نے پی ٹی آئی فارن فنڈنگ کیس 30 روز میں مکمل کرنےکا حکم معطل کردیا ، سنگل رکنی بینچ کا فیصلہ آئندہ سماعت تک معطل کیا گیا۔

خیال رہے اسلام آباد ہائی کورٹ کے سنگل رکنی بینچ نے الیکشن کمیشن کو فارن فنڈنگ کیس کا فیصلہ 30 دن میں کرنے کا حکم دیا تھا۔

اسلام آباد : اسلام آباد ہائی کورٹ نے عمران خان کو ملنے والے تحائف کی تفصیل عام کرنے کا حکم دے دیا۔

تفصیلات کے مطابق اسلام آباد ہائی کورٹ میں توشہ خانہ کے تحائف کی تفصیلات سے متعلق کیس کی سماعت ہوئی ، جسٹس میاں گل حسن اورنگزیب نے کیس کی سماعت کی۔

دوران سماعت وفاق کی جانب سے ہائی کورٹ میں کیس ملتوی کرنے کا استدعا کی گئی ، ڈپٹی اٹارنی جنرل ارشد محمود کیانی نے کہا کہ نئی حکومت آئی ہے ان سے ہدایت لینی ہے ، عدالت سے استدعا ہے کیس ایک ماہ کیلئےملتوی کیا جائے۔

جسٹس میاں گل حسن اورنگزیب نے ریمارکس دیے کہ توشہ خانہ کا حساب دینا ہو گا، عوام کی دلچسپی کا کیس ہے، اپیل فائل کرنے سے کیس ختم نہیں ہوگا ، قانون سے بالا تر کوئی نہیں۔

وکیل درخواست گزار نے بتایا کہ توشہ خانہ گفت فروخت کر دیئے گئے ہیں، جس پر جسٹس گل حسن اورنگزیب نے کہا 20 فیصد ادا کرکے گفٹ فروخت کرنا عجیب ہے۔

ڈپٹی اٹارنی جنرل نے بتایا کہ اٹارنی جنرل مستعفی ہوگئے ہیں ، وقت دیاجائے،جس پر عدالت کا کہنا تھا کہ دیکھیں پالیسی واضح ہے اس کو کابینہ کے سامنے اٹھایاجائے ، جو کچھ توشہ خانہ سے لیا گیا وہ سب کچھ آئندہ سماعت پر بتانا ہے۔

ڈپٹی اٹارنی جنرل نے کہا کہ سیکریٹری کابینہ ڈویژن نےنئی حکومت کیساتھ معاملہ اٹھایا ہے، جس پر جسٹس گل حسن اورنگزیب نے استفسار کی ہم باہر جاتے ہیں تو واپسی پر پوچھا جاتا ہے کیا سیکھا؟ انصاف ہر کسی کے ساتھ ہونا چاہیے،یہ پبلک انٹرسٹ کا کیس ہے بتایا جائے توشہ خانہ سے کیا ملا ؟

عدالت نے ڈپٹی اٹارنی جنرل کو کابینہ ڈویژن سے ہدایات لینے کی ہدایت کرتے ہوئے کہا جو چیزیں گھر لے گئے وہ واپس لیں چاہے 20سال پرانامعاملہ کیوں نہ ہو، ہم اس معاملے کو متنازع نہیں بنا رہے، تحائف صرف وزیر اعظم نہیں سب سے واپس لانا چاہیے۔

جسٹس میاں گل حسن اورنگزیب نے ڈپٹی اٹارنی جنرل سے مکالمہ میں کہا کہ ایک حد تک پیسے دیکر تحفہ رکھ لیناکوئی بات نہیں ، پالیسی بنائیں جو تحفہ آئے گا وہ خزانےمیں جمع ہو۔

جسٹس میاں گل حسن کا کہنا تھا کہ تحائف صرف ملتےنہیں بیرون ملک لوگوں کودیئےبھی جاتےہیں ، بیرون ملک جانیوالےتحائف قومی خزانےسےخریدےجاتے ہیں اور باہرسےآئےسب تحائف بھی نمائش کیلئے رکھے جانے چاہئیں۔

ڈپٹی اٹارنی جنرل نے استدعا کی کہ مجھے تازہ ہدایات لینےکیلئے وقت چاہیے، جس پر عدالت نے کہا آپ ہدایات لیں مگرتب تک انفارمیشن کمیشن کےحکم پرعمل کریں، انفارمیشن کمیشن نے کہاتحائف کی معلومات شہری کودیں تودیں۔

اسلام آباد ہائی کورٹ نے عمران خان کو ملنے والے تحائف کی تفصیل عام کرنے کا حکم دیتے ہوئے کہا ڈپٹی اٹارنی جنرل کی استدعا منظور کرلی اور کہا آپ بیرون ممالک جائیں توپاکستانی تحائف میوزیم میں لگےنظرآئیں گے۔

بعد ازاں عدالت نے کیس کی سماعت دو ہفتوں تک کے لئے ملتوی کردی۔

اسلام آباد : اسلام آباد ہائی کورٹ نے بھارت کو کلبھوشن یادیو کیلئے وکیل مقرر کرنے کا آخری موقع دے دیا ، چیف جسٹس نے ریمارکس دیئے کہ انسان ہونے کے ناطے شفاف ٹرائل کلبھوشن کا حق ہے۔

تفصیلات کے مطابق اسلام آباد ہائی کورٹ میں کلبوشن یادیو کیلئے سرکاری وکیل مقرر کرنے کی درخواست پر سماعت ہوئی ، چیف جسٹس اطہر من اللہ کی سربراہی میں لارجر بینچ نے سماعت کی۔

وفاق کی جانب سے اٹارنی جنرل آف پاکستان خالد جاوید خان عدالت میں پیش ہوئے اور بتایا کہ بھارتی سفارت خانے نے ابھی تک کوئی وکالت نامہ جمع نہیں کرایا۔

عدالت نے اٹارنی جنرل سے استفسار کیا کہ اس کا کوئی ایکٹ پاس ہوگیا ہے؟ جس پر اٹارنی جنرل نے بتایا کہ آرڈیننس میں کچھ چیزیں نہیں تھیں جو ایکٹ میں ترامیم کی گئی۔ ایکٹ کے سیکشن 2 میں ہائیکورٹ میں نظر ثانی اپیل دائر کرنے کی اجازت دی گئی۔ واضح ہے کہ بھارت اس کیس میں دلچسپی نہیں لے رہا، اور بین الاقوامی عدالت انصاف جانا چاہتا ہے۔

چیف جسٹس اطہرمن اللہ نے ریمارکس دیے کہ بین الاقوامی عدالت انصاف نے تو پشاور ہائیکورٹ کے فیصلوں کا حوالہ دیا تھا۔ بین الاقوامی عدالت انصاف نے تو ہماری عدالتی نظام کو مانا تھا آپ نے تو مزید بھی ترمیم کی۔

اٹارنی جنرل کا کہنا تھا کہ بھارت اس کیس میں خود کو انگیج نہیں کرنا چاہتا۔ بھارت صرف یہی چاہتا ہے کہ پاکستان کو کسی طرح سے بین الاقوامی عدالت انصاف پہنچایا جائے جبکہ پارلیمنٹ نے کوشش کی کہ ملزم کو وکیل کرنے کا موقع فراہم کیا جائے۔

ٹارنی جنرل نے مزید کہا کہ بین الاقوامی عدالت انصاف کے فیصلے میں پاکستانی عدالتوں میں اپیل دائر کرنے کا کہا گیااور کلبھوشن یادیو کو پاکستان نے کونسلر رسائی بھی دی ہے۔

چیف جسٹس اطہرمن اللہ نے ریمارکس میں کہا بین الاقوامی عدالت انصاف کا فیصلہ شاید بھارت نے پڑھا نہیں یا غلط تشریح کررہے ہیں، اگر بھارت اس کیس میں نہیں آنا چاہتا تو کیس کو کیسے آگے لیکر چلیں؟ اٹارنی جنرل نے بتایا کہ بھارت نے آئی سی جے کا فیصلہ پڑھا ہے مگر غلط تشریح کررہے، اگر بھارت نہیں چاہتا تو عدالت کلبھوشن یادیو کے لیے نمائندہ مقرر کرے۔

جسٹس میاں گل حسن اورنگزیب نے استفسار کیا کہ وزارت قانون ہی اس کے لیے نمائندہ مقرر کرے گی، مگر کیس آگے کیسے لیکر جانا ہے؟ جس پر اٹارنی جنرل نے کہا کہ بھارت کو نہ کلبھوشن یادیو کیس میں کوئی دلچسپی ہے اور نہ ہی ایکٹ آف پارلیمنٹ میں ہیں۔

چیف جسٹس اطہرمن اللہ کا کہنا تھا کہ کلبھوشن یادیو کیس کو بنیادی انسانی حقوق حاصل ہیں اور ہونا چاہیے، کمانڈر کلبھوشن یادیو کو فئر ٹرائل کا حق حاصل ہے، بھارتی حکومت کو اس فیصلے پر نظر ثانی کی ضرورت ہے، کلبھوشن یادیو کو بھارتی شہری کی طرح ٹریٹ نہیں کرنا چاہیے۔

اٹارنی جنرل نے کہا کہ شروع دن سے اس عدالت نے غیر جانبدار اور بڑے قانون دانوں کو عدالتی معاون بنائے ہیں۔ عدالت اگر سمجھتی ہے کہ ایک اور موقع فراہم کیا جائے تو بہتر فیصلہ ہے۔

اسلام آباد ہائیکورٹ نے بھارت کو کلبھوشن کیلئے وکیل مقرر کرنے کا آخری موقع دیتے ہوئے سماعت 13 اپریل تک ملتوی کر دی۔