اسلام آباد: وفاقی دارالحکومت اسلام آباد کی پولیس کو شہریوں کی فوری شناخت کے لیے فنگر پرنٹ ٹیکنالوجی فراہم کر دی گئی۔
تفصیلات کے مطابق انسپکٹر جنرل (آئی جی) اسلام آباد عامر ذوالفقار کی خصوصی ہدایت پر پولیس ناکوں کے لیے جدید سافٹ ویئر تیار کرلیا گیا، پولیس اصلاحات کے تحت ناکوں پر فنگر پرنٹ سافٹ ویئر متعارف کروا دیا گیا۔
عامر ذوالفقار کا کہنا ہے کہ بائیو میٹرک نظام کی مدد سے ہر شہری کا ریکارڈ ناکوں پر میسر ہوگا، پولیس کو تصدیق کے لیے کسی شخص کو تھانے لے جانے کی ضرورت نہیں ہوگی۔
انہوں نے کہا کہ جدید ٹیکنالوجی سے ناکے کو مزید بہتر سے بہتر بنایا جارہا ہے، شہریوں کے جان و مال کا تحفظ کرنا ہمارا اولین فرض ہے۔
خیال رہے کہ اسلام آباد پولیس نے حال ہی میں یونیفارم پر لگے کیمروں کا استعمال بھی شروع کردیا ہے۔ یہ کیمرے ناکے پر تعینات پولیس اہلکاروں نے مکمل ٹریننگ کے بعد استعمال کرنے شروع کیے ہیں۔
اہلکاروں کی وردی پر نصب شدہ ویڈیو کیمرے اندھیرے میں بھی ویڈیو بنانے کی مکمل صلاحیت رکھتے ہیں جبکہ یہ کیمرے شہریوں اور ڈیوٹی پر مامور پولیس اہلکار کے درمیان ہونے والی گفتگو ریکارڈ کریں گے۔
