Tag: اسلام آباد ہائیکورٹ

اسلام آباد (17 اگست 2025): اسلام آباد ہائیکورٹ نے اسپیشل بنچز تشکیل دے دیے ہیں اور اس حوالے سے نوٹیفکیشن بھی جاری کر دیا گیا ہے۔

اے آر وائی نیوز کے مطابق اسلام آباد ہائیکورٹ کے چیف جسٹس سرفراز ڈوگر کی منظوری سے مختلف بنچز تشکیل دے دیے گئے ہیں۔ اس حوالے سے جاری نوٹیفکیشن میں بنچز کی تفصیل اور ہر بنچ کے دائرہ کار سے آگاہ کیا گیا ہے۔

نوٹیفکیشن کے مطابق جسٹس بابر ستار اور جسٹس سردار اعجاز اسحاق پر مشتمل بنچ کمرشل کیسز سنے گا جب کہ جسٹس اربارب محمد طاہر کا بنچ تعلیمی اداروں سے متعلق کیسز کی سماعت کرے گا۔

اس کے علاوہ جسٹس طارق جہانگیری اور جسٹس ثمن رفعت امتیاز پر مشتمل پر مشتمل خصوصی بنچ فائننشل انسٹی ٹیوشن آرڈیننس کے تحت دائر کیسز سنے گا۔

اسلام آباد ہائیکورٹ نے لارجر بنچ بھی تشکیل دیا ہے۔ اس بنچ میں چیف جسٹس سرفراز ڈوگر، جسٹس محسن اختر کیانی، جسٹس ثمن رفعت امتیاز شامل ہیں۔ یہ بنچ کمپنیز ایکٹ کے تحت کیسز کی سماعت کرے گا۔

اسلام آباد : اسلام آباد ہائیکورٹ  نے جج ہمایوں دلاور کے خلاف سوشل میڈیا مہم کیس میں ایف آئی اے کی رپورٹ غیر تسلی بخش قرار دے دی۔

تفصیلات کے مطابق اسلام آباد ہائیکورٹ میں جج ہمایوں دلاور کے خلاف مبینہ سوشل میڈیا مہم کیس میں ڈائریکٹر اینٹی کرپشن کے پی صدیق انجم کی اخراج مقدمہ کی درخواست پر سماعت ہوئی۔

وکیل ایف آئی اے نے کہا کہ ڈی جی ایف آئی اےکی جانب سے رپورٹ جمع کروا دی گئی ہے، ڈی جی ایف آئی اے کی رپورٹ ہمارے موقف کی تائید ہے، ایف آئی اےرپورٹ کے مطابق جج کےخلاف سوشل میڈیا پر مہم شروع کی گئی۔

اسلام آباد ہائیکورٹ نے ایف آئی اے رپورٹ غیرتسلی بخش قرار دیتے ہوئے دوبارہ رپورٹ جمع کرانے کا حکم دیا اور ایف آئی اے کی خصوصی عدالت میں مقدمے کا ٹرائل روکنے کا حکم امتناع برقرار رکھا

جسٹس بابرستار نے ایف آئی اے رپورٹ پر برہمی کا اظہار کرتے ہوئے کہا کہ رپورٹ میں کس طرح کی زبان لکھی گئی ہے؟ ایف آئی اے کو معلوم نہیں عدالت میں رپورٹ کس طرح فائل کی جاتی ہے؟

عدالت کے استفسار پر ایف آئی اے کے وکیل نے بتایاکہ شکایت جج  نے نہیں ان کے بھانجے نے درج کروائی تھی۔

جسٹس بابر ستار نے ریمارکس دیے ایف آئی اے کی پوری رپورٹ ہی جج کے تحفظات پر ہے، کوئی جج کی طرف سے کیسے شکایت درج کروا سکتا ہے؟ ایف آئی اے رپورٹ میں مہم سے عدلیہ کا وقار ختم کرنے کا لکھا ہے، آپ کو پتہ ہے اس ہائیکورٹ کے کتنے ججوں کے خلاف بدنیتی پر مبنی مہمات چلیں؟

جج کا کہنا تھا کہ ہائیکورٹ کے ججوں کےمعاملے پر ایف آئی اے نے کہا کہ کچھ پتہ نہیں کون کر رہا ہے،اِس کیس میں ایف آئی اے کو سب پتہ چل گیا حالانکہ جج نے خود شکایت بھی نہیں جمع کرائی۔

بعد ازاں اسلام آباد ہائیکورٹ نے درخواست پر سماعت 19 مئی تک ملتوی کر دی۔

اسلام آباد: اسلام آباد ہائیکورٹ نے پی ٹی آئی کے گرفتار ایم این ایز کے جسمانی ریمانڈ کو کالعدم قرار دیتے ہوئے جوڈیشل ریمانڈپرجیل بھیج دیا۔

تفصیلات کے مطابق اسلام آباد ہائیکورٹ نے پی ٹی آئی رہنماؤں کے جسمانی ریمانڈ کیخلاف درخواست پر مختصر فیصلہ سناتے ہوئے پی ٹی آئی رہنماؤں کے جسمانی ریمانڈ کو کالعدم قرار دیکر گرفتار ارکان اسمبلی کوجوڈیشل ریمانڈ پر جیل بھیج دیا۔

چیف جسٹس عامر فاروق نے مختصر فیصلہ سنایا ، پارلیمنٹ سے گرفتاری کرنے پر چیف جسٹس عامر فاروق نے اہم ریمارکس دیتے ہوئے کہا پارلیمنٹ سے گرفتاریوں کے خلاف ایک درخواست آئی ہوئی ہے، آئندہ ہفتے سنوں گا، اسپیکر قومی اسمبلی اپنا کام کر رہے ہیں لیکن یہ عدالت بھی معاملہ دیکھ سکتی ہے۔

چیف جسٹس کا کہنا تھا کسی ادارے کا وقار باقی نہیں رہنے دینا، کر کیا رہے ہیں؟ پارلیمنٹ تمام اداروں کی ماں ہے، ملک کے حالات دیکھیں اور آپ پارلیمنٹ کے اندر گھس کر ممبران کو گرفتار کر لیا۔

پراسیکیوٹر جنرل اسلام آباد نے عدالت کے روبروکہا جلسے میں ریاست مخالف خوفناک تقاریر کی گئیں، جس پر عدالت نے کہا اگر آپکی بات مان لی جائے پھر تو قتل کے ملزم کا تواین کائونٹرکرادیں، آپکی بات مان لی جائے تو پھر فیئر ٹرائل کہاں رہ گیا، کسی نے کتنا ہی سنگین جرم کیا ہو اسکو فیئر ٹرائل کا حق ہے، یہی کام پہلے اس ہائیکورٹ میں کیا گیا، اب پارلیمنٹ میں کر رہے ہیں۔

چیف جسٹس عامر فاروق نے کہا پارلیمنٹ تمام اداروں کی ماں ہے، اسپیکر قومی اسمبلی اپنا کام کر رہے ہیں،یہ عدالت بھی معاملہ دیکھ سکتی ہے، ارکان کی گرفتاری کیخلاف پٹیشن اگلےہفتےسنوں گا۔

اس سے قبل سماعت میں چیف جسٹس عامر فاروق نے کہا تھا اسٹیٹ جواب دے ایسا کیا ہوگیا تھا کہ آٹھ آٹھ روز کا جسمانی ریمانڈ دیا گیا،اس کی مثال نہیں ملتی،امن و امان کی صورتحال کس طرف جارہی ہے،آپ نے پارلیمنٹ میں گھس کر ارکان اسمبلی کو اٹھالیا،کہاں گئی وہ آزادی ؟کہاں گیا قانون؟کیا کسی ادارے کا وقارباقی نہیں رہنے دینا۔

پراسیکیوٹر جنرل نے بتایا شیر افضل مروت سے پستول اور شعیب شاہین سےڈنڈا برآمد ہوا، جس پر چیف جسٹس عامر فاروق نے کہا تھا کیامیں اورآپ انہیں نہیں جانتے؟یہ شعیب شاہین کی تضحیک ہے،عرصے بعد اچھی کامیڈی دیکھی، مزیدار کہانی بنائی گئی فلم بن سکتی ہے،اسلام آباد پولیس ہے یا رضیہ جوغنڈوں میں پھنس گئی۔

اسلام آباد : اسلام آباد ہائیکورٹ نے طلاق کے بعد ماں سے ڈھائی سالہ بچی چھیننے والے باپ کو گرفتار کرنے کا حکم دے دیا۔

تفصیلات کے مطابق اسلام آباد ہائی کورٹ میں سابق شوہر کی جانب سے ڈھائی سالہ بچی چھیننے کیخلاف والدہ کی درخواست پر سماعت ہوئی۔

اسلام آباد ہائیکورٹ نے ملزم کے ناقابل ضمانت وارنٹ گرفتاری جاری کردیے اور پیر تک پیش کرنے کا حکم دیتے ہوئے ملزم افضل پیرتک پیش نہ ہواتوسارےخاندان کےآئی ڈی کارڈ،پاسپورٹ بلاک کر دیں۔

جسٹس محسن اختر نے کہا کہ میاں بیوی کا نہیں ایک بچی کا مسئلہ ہے،جس نے یہ کیااس آدمی کو شرم آنی چاہیے، یہ امریکا،انگلینڈ نہیں جہاں خاندان کوپتہ نہیں ہوتا۔

عدالت کا کہنا تھا کہ افضل محمود جہاں ملے گرفتارکر کے پیش کریں، بچی کوہرحال میں بازیاب کرائیں، اگلی سماعت پردوسری بیوی کو بھی لے کر آئیں، کوئی پراپرٹی کاریکارڈیابینک اکاؤنٹ کی تفصیلات ہیں توریکارڈکاحصہ بنائیں۔

جسٹس محسن اختر نے بچی کی والدہ سے مکالمے میں کہا کہ پراپرٹی اوربینک ریکارڈ دیکھ کر میں آرڈر کروں گا، والدہ نے بتایا کہ گھر سے نکلے تو سابق شوہربچی چھین کرفرارہوگیا،3ماہ سےنہیں ملی۔

وکیل نے کہا کہ ہمیں وقت چاہیے افضل محمود بیمار ہیں ، انکامؤقف بھی لینا ضروری ہے، جسٹس محسن اختر کیانی نے کہا کہ جو شخص 3ماہ سے بھاگا ہوا ہے اس کا مؤقف نہیں لیا جا سکتا،4مرتبہ پولیس اس کےگھر گئی ہر بار فیملی کی جانب سے جھوٹ بولا گیا، میں نے چانس دیدیا اب گرفتاری ہوگی،ساری باتیں براستہ جیل ہوں گی، جس چارپائی میں لیٹا ہے اسکا پتہ بتائیں گرفتارکرائیں گے۔

اسلام آباد ہائی کورٹ نے کیس کی سماعت 5 اگست تک ملتوی کر دی

اسلام آباد : بانی پی ٹی آئی نے ملاقاتوں کی اجازت نہ دینے پر اسلام آبادہائیکورٹ سے رجوع کرلیا، جس میں استدعا کی کہ جیل میں پارٹی لیڈرشپ سے مختلف امور پر مشاورت کی اجازت دی جائے۔

تفصیلات کے مطابق پی ٹی آئی لیڈر شپ اور وکلا کو ملاقاتوں اور مشاورت کی اجازت نہ دینے کے معاملے پر بانی پی ٹی آئی نے ملاقاتوں کی اجازت نہ دینے پر اسلام آباد ہائیکورٹ میں درخواست دائر کردی۔

درخواست میں موقف اختیار کیا گیا عدالتی حکم کےباوجودسپرنٹنڈنٹ جیل وکلا،لیڈرشپ سےملاقات کی اجازت نہیں دیتی، عدالت نے پارٹی ٹکٹوں کی تقسیم کیلئے بانی پی ٹی آئی سےمشاورت کی اجازت دی تھی لیکن فریقین کی بدنیتی کی وجہ سےوہ عمل بھی مکمل نہ ہوا۔

درخواست میں کہا گیا کہ سول انتظامیہ کے کام میں مداخلت کے باعث لیڈرشپ سے مشاورت نہیں کرپاتے، نواز شریف کو جیل میں اسیری کے دوران دن میں 15افرادسےملاقات کی اجازت تھی، بانی پی ٹی آئی کواس حق سے محروم رکھا جارہا ہے۔

بانی پی ٹی آئی کوجیل میں پارٹی لیڈرشپ سےمختلف امورپرمشاورت کی اجازت دی جائے، سول انتظامیہ کے امور میں مداخلت سے روکا جائے۔

درخواست میں وزارت داخلہ، پنجاب حکومت اور جیل سپرنٹنڈنٹ و دیگر کو فریق بنایا گیا ہے۔