اسلام آباد: وزیراعظم نےدہشتگردی کاخاتمہ یقینی بنانےاورقوم سےوعدوں پر عمل درآمد کیلئے سیاسی اورقانونی مشاورت شروع کر دی ہے۔
وزیر اعظم نواز شریف نے قوم سے خطاب کے بعد اہم مشاورت شروع کر دی ہے ۔ اسلام آباد میں وزیر اعظم کی زیر صدارت اہم مشاورتی اجلاس ہو ا جس میں انہوں نےسیاسی اورقانونی ماہرین سےاہم امور پر تبادلہ خیال کیا، وزیر اعظم نے قوم سے کئے گئےاعلانات پرعملدرآمد کیلئے وزرا کااجلاس بھی طلب کرلیا ہے،وزیر اعظم کا کہنا ہے کہ قوم سےخطاب میں کئے گئے اعلانات پرعملدرآمد یقینی بنایاجائےگا۔
اسلام آباد: وزیراعظم نوازشریف نے کہا ہے کہ دہشت گرد جان لیں ہم اپنےبچوں کے خون کے ایک ایک قطرے کا حساب لیں گے۔
قوم سے خصوصی خطاب میں وزیر اعظم نواز شریف کا کہنا تھا کہ پوری دنیابچوں کےوالدین کےغم میںٕ برابرکی شریک ہے، سفاک قاتلوں نے قوم کے دل پرگہرا زخم لگایا ہے، وه حذیفہ میرا بیٹا تھا جو ناشتہ کئے بغیرگهر سے نکلا اور واپس نہ آیا۔ 6 سال کی بچی خولہ میری بیٹی تھی جوٹیسٹ دینےگئی اورواپس نہیں آئی، معصوم بچوں کے خون کو رائیگاں نہیں جانے دیں گے۔
نوازشریف کا کہنا تھا کہ دہشت گردوں کوپھانسی کی سزا پرعمل درآمد شروع ہوچکا ہے، حکومت دہشتگردی کا مقابلہ کرنے کیلئے پہلے سے زیادہ پرعزم ہے اوراس ضمن میں تمام سیاسی جماعتوں کا کردار بھی قابل تحسین ہے، ان حالات میں قومی سیاسی اورعسکری قیادت قوم کو مایوس نہیں کرے گی اور یہ جنگ آخری دہشتگرد کے خاتمے تک جاری رکھی جائے گی، دہشتگردوں نےجودرددیاہےاس کامنہ توڑجواب دیاجائےگا۔
انہوں نے کہا کہ سپیڈی ٹرائل کورٹ سمیت پارلیمانی کمیٹی کے پیش کردہ تمام نکات پر اتفاق رائے پیدا کرلیا گیا ہے،جن پرعملدر آمد بھی فوری طور پر ہی شروع کر دیا گیا ہے۔ انہوں نے کہا کہ میں ایک ایسے وقت میں قوم سے مخاطب ہوں جب پوری قوم کے دل خون کے آنسو رہے ہیں اور ساری قوم کی آنکھیں اشکار ہیں، میں ایک باپ ہونے کے ناتے ہراس باپ کا دکھ سمجھ سکتا ہوں جس نے اپنے بچے کی لاش کوکاندھا دیا تھا۔
وزیراعظم کا کہنا تھا کہ کل کا پاکستان انشاءاللہ بھت پرسکون پاکستان ہوگا، پاکستان بھرمیں مسلح جتھوں کی اجازت نہیں ہوگی، دہشتگردوں اوردہشتگردتنظیموں کی فنڈنگ کےتمام وسائل ختم کیےجائیں گے، قائداعظم کےپاکستان کوان کےوژن کی طرح بنایاجارہاہے۔
اسلام آباد: سپریم کورٹ نے بلدیاتی انتخابات کے انعقاد سے متعلق کیس میں پنجاب اور سندھ کی صوبائی حکومتوں کو ایک ماہ میں حد بندیوں سمیت دیگر قانونی ترامیم مکمل کر نے کا حکم دے دیا ہے۔ عدالت نے چیف الیکشن کمشنر کی تقرری کا کیس نمٹا دیا ہے۔
تفصیلات کے مطابق چیف جسٹس ناصر الملک کی سربراہی میں سپریم کورٹ کے تین رکنی بینچ نے بلدیاتی انتخابات کے انعقاد سے متعلق کیس کی سماعت کی تو الیکشن کمیشن کی جانب ایڈوکیٹ اکرم شیخ پیش ہوئے۔ اکرم شیخ نے الیکشن کمیشن کی جانب سے رپورٹ پیش کی او ر بتایا کہ حکومت پنجاب اورسندھ نے الیکشن کمیشن کے حکام کیساتھ اجلاس میں شرکت کی ہے۔
اس موقع پر اکرم شیخ کا کہنا تھا کہ الیکشن کمیشن کی جانب سے تاخیر نہیں کی جائے گی پنجاب حکومت نے حد بندیوں اور بلدیاتی قانون میں ترامیم سمیت دیگر اقدامات کیلئے پندرہ دنوں کا وقت مانگا ہے جبکہ اس حوالے سے سندھ حکومت کو تیس دنوں کا وقت درکار ہے۔
الیکشن کمیشن کے وکیل نے کہا کہ کنٹونمنٹ علاقوں میں انتخابات سے متعلق ڈرافٹ کر لیا گیا ہے، اس حوالے سے کنٹونمنٹ حکام کی الیکشن کمیشن حکام کے ساتھ اجلاس چھ دسمبر کو ہوا، لیکن چھٹی کی وجہ سے اُس میٹنگ کے منٹس وصول نہیں ہوئے ۔
اس پر چیف جسٹس نے کہا کہ پنجاب حکومت پندرہ دنوں کی مہلت مانگ رہی ہے لیکن سندھ حکومت اسی کام کیلئے زیادہ وقت کیوں مانگ رہی ہے۔ اس پر ایڈیشنل ایڈوکیٹ جنرل سندھ شفیع چانڈیو نے عدالت کو بتایا کہ الیکشن کمیشن نے سندھ لوکل ایکٹ میں ترمیم والے معاملے کی نشان دہی کی ہے سندھ میں چار دسمبر کو میٹنگ ہوئی تھی جس میں تمام ڈپٹی کمشنرز کو بلایا گیا تھا، ایکٹ میں ترمیم سے متعلق پارلیمنٹ کمیٹی کو بھیجا گیا ہے تاہم اس حوالے سے آج میٹنگ ہونی ہے ایک ماہ میں تمام ضروری اقدامات کر لیے جائیں گے۔
بعد ازاں عدالت عظمیٰ نے پنجاب اور سندھ کی صوبائی حکومتوں کو بلدیاتی انتخابات سے متعلق دسمبر کے اختتام تک تمام ضروری اقدامات کرنے کی ہدایت جاری کرتے ہوئے سماعت 8جنوری تک ملتوی کردی ہے۔
اسلام آباد: عمران خان کی جانب سے الیکشن ٹربیونل میں اپنا بیان قلمبند کرادیا ہے، ٹریبونل کے باہر پی ٹی آئی اور ن لیگ کے کارکن آمنے سامنے ہوگئے اور ایک دوسرے کے خلاف شدید نعرے بازی بھی کی گئی ہے۔،
تفصیلات کے مطابق عمران خان نے الیکشن ٹریبونل میں اپنا بیان یکارڈ کرانے کے بعد میڈیا سے بات کرتے ہوئے کہا کہ پیر کو تھیلے کھولنے کا فیصلہ ہوگا۔ انھوں نے کہا کہ دھاندلی سے متعلق تمام ثبوت تھیلوں میں موجود ہیں اور تھیلے کھلنے پر سب کچھ سامنے آجائے گا۔
پی ٹی آئی کے رہنما نے کہا کہ ن لیگ کی پوری کوشش ہے کہ تھیلے نہ کھولے جائیں۔ انھوں نے مزید کہا کہ سردار ایاز صادق اسٹے آرڈر کے پیچھے چھپے ہوئے ہیں۔
لاہور: سابق صدر آصف زرداری نے کہا ہے کہ جمہوریت بچانے کیلئے مفاہمت کا راستہ اختیار کیا اور اس پر کاربند بھی ہیں۔
بلاول ہاؤس لاہور میں پیپلز پارٹی پنجاب کی مجلس عاملہ سے خطاب کرتے ہوئے سابق صدر آصف علی زرداری کا کہنا تھا کہ کارکن پارٹی کا اثاثہ ہیں، انہیں ہر سطح پر متحرک کیا جائے گا، انہوں نے کہا کہ وہ کارکنوں کے گلے شکوے اور تحفظات دور کرنے کیلئے خود چل کر ان کے پاس جائیں گے۔
انہوں نے پنجاب میں پارٹی کے ذمہ داران کو ہدایت کی کہ وہ صوبے میں جماعت کو متحرک کریں۔ آصف زرداری نے کہا کہ ان کا کسی سے مقابلہ نہیں، جمہوریت بچانے کیلئے مفاہمت کا راستہ اختیار کیا اور اس پر کاربند بھی ہیں، مفاہمت کا قطعی مقصد فرینڈلی اپوزیشن ہونا نہیں ہے۔ اجلاس سے منظور وٹو، تنویر اشرف کائرہ اور فائزہ ملک نے بھی خطاب کیا۔
اسلام آباد: چیف الیکشن کمشنر کے تقرری کے لیے قائم پارلیمانی کمیٹی نے جسٹس (ر) سردار رضا کو بطور چیف الیکشن کمشنر کے عہدے کے لیے متفقہ طور پر نامزد کر دیا ہے۔
وزیراعظم اوراپوزیشن لیڈر کی طرف سے پارلیمانی کمیٹی کو تین نام بجھوائے گئے تھے۔ کمیٹی کے چیئرمین رفیق رجوانہ نے اجلاس کے بعد میڈیا کو بتایا کمٹی کو سردار محمد رضا کے علاوہ جسٹس (ر) طارق پرویز اور جسٹس (ر) تنویر احمد خان کے نام بھی بجھوائے گئے تھے۔
انھوں نے کہا کہ کمیٹی نے ان ناموں پر بحث اور بغور جائزہ لیا، جس کے بعد متفقہ طور پر سردار محمد رضا کا انتخاب کیا گیا ہے۔ رفیق راجونہ کا کہنا تھا کہ نو منتخب الیکشن کمشنر سے امید رکھتے ہیں کہ وہ ملک میں آئندہ انتخابات شفاف اور یقینی بنائیں گے۔
ان کا کہنا تھا کہ یہ فیصلے جمہوری اداروں کے استحکام کے لیے نیک شگون ہے۔ ان کا مزید کہنا تھا کہ جسٹس (ر) سردار محمد رضا کا نام وزیراعظم کو بجھوایا جائے گا، جس کا نوٹیفکیشن وزیراعظم جاری کریں گے۔
رفیق رجوانہ کا کہنا تھا کہ چیف الیکشن کمشنر کی نامزدگی آئین کے عین مطابق عمل میں لائی گئی ہے۔ اجلاس میں پی ٹی آئی کے رکن کی عدم شرکت سے متعلق ایک سوال پر رفیق رجوانہ نے کہا کہ پی ٹی آئی کی طرف سے تینوں نام معتبر قرار دئیے گئے اور کسی کی اجلاس میں غیر حاضری اجلاس کے فیصلوں پر کوئی اثر نہیں ہوتا ہے۔
اسلام آباد: مشرف کیس میں تین اور ملزمان کے ٹرائل کے فیصلے کیخلاف درخواست پر حکومت سے جواب طلب کر لیا گیا ہے۔
خصوصی عدالت کے اکیس نومبر کے فیصلے کے خلاف کیس کی سماعت آج اسلام آباد ہائی کورٹ میں ہوئی ہے۔ درخواست گزار توفیق آصف نے موقف اختیار کیا کہ سابق صدر جنرل ریٹائرڈ پرویز مشرف کا الگ ٹرائل کیا جائے۔
جسٹس اطہر من اللہ نے دلائل کا جائزہ لینے کے بعد وفاق اور اٹارنی جنرل کو نوٹس جاری کردیئے ہیں۔ ساتھ ہی خصوصی عدالت کا ایکٹ بھی ایک ہفتے میں طلب کرلیا ہے۔
جسٹس اطہر کا کہنا تھا کہ خصوصی عدالت اور ہائی کورٹ کے اختیارات مساوی ہیں۔
کراچی: پیپلزپارٹی کی شریک چیئرمین آصف علی زرداری نے پی پی پی پنجاب کے دفتر کا دورہ کیا کہتے ہیں کہ پیپلزپارٹی وفا کی علامت ہے جمہوری جدوجہد میں ہراول دستے کا کام کرتی رہے گی۔
آصف علی زرداری نے ماڈل ٹاون لاہورمیں واقع پیپلزپارٹی پنجاب کے دفتر کا دورہ کیا، اس موقع پر انہوں نے دفتر کے مختلف حصوں کا معائنہ کیا اور بہتری کےلیے ہدایات دیں ، اس موقع پر بینظیر بھٹو اور پیپلزپارٹی کے دیگر شہداء کےلیے فاتحہ خوانی بھی کی گئی۔
پیپلزپارٹی پنجاب کے صدر میاں منظور وٹو نے شریک چیئرمین کو پارٹی کی کارکردگی کے بارے میں بریفنگ دی، آصف علی زرداری نے زور دیا کہ پیپلزپارٹی کو عوامی جماعت بنانے کےلیے پیپلزپارٹی کو پنجاب میں اقتدار لانے کےلیے کارکن اپنی سرگرمیاں تیز کردے۔
انہوں نے کہا کہ کارکن پارٹی کا سرمایہ ہیں کسی صورت انہیں نظر انداز نہیں کیا جائے گا، پارٹی کی مضبوطی اور اس کا منشور کارکنوں کے دم سے ہے، انہوں نے کہا کہ پارٹی کےلیے قربانیاں دینے والے رہنما اور کارکن ہمارا اثاثہ ہیں۔
آصف علی زرداری نے پیپلزپارٹی پنجاب کی قیادت کی سرگرمیوں کو سراہا ، بعدازاں پیپلزپارٹی کے شریک چیئرمین سابق گورنرپنجاب مخدوم احمد محمود سے بھی اُن سے ملنے کےلیے اُن کی رہائش گاہ گئے، سابق صدر کل گوجرانوالہ کی پارٹی کنونشن سے کامونکی میں خطاب کرینگے۔
اسلام آباد: وزیراعظم نواز شریف نے کہا ہے کہ پاکستان کا امن افغانستان کے امن سے مشروط ہے دونوں ممالک کے امن سے خطے میں استحکام آئے گا۔
وزیراعظم نوازشریف نے برطانیہ روانگی سے قبل میڈیا سے گفتگو کرتے ہوئے کہا کہ وہ برطانیہ میں افغا نستان پر ہو نے والی کانفرنس میں شریک ہوں گے اس کانفرنس سے پاکستان اور افغانستان میں امن کی کوششوں کو تقویت ملے گی۔
انہوں نے کہا کہ افغانستان میں پائیدار امن کے بغیر ترقی اور خوشحالی کا خواب کبھی پورا نہیں ہو سکتا ہے۔ انہوں نے توقع ظاہر کی کہ اس کانفرنس کے مفید نتائج برآمد ہوں گے۔ ،
اسلام آباد: ایم کیوایم کے رہنما رشید گوڈیل کہتے ہیں کراچی میں آپریشن کے نام پر سیاسی انتقام لیا جا رہا ہے، حکومت ٹارگٹ کلنگ کا نوٹس لے۔
قومی اسمبلی کااجلاس آج ڈپٹی اسپیکر مرتضی جاوید عباسی کی صدارت میں ہوا ہے۔ اجلاس کے دوران ایم کیوایم کے رہنما رشید گوڈیل نےخطاب کرتے ہوئے کہا کہ کراچی میں دہشتگرد دندناتے پھر رہے ہیں۔ انھوں نے کہا کہ وفاقی حکومت سےکہتےہیں تو صوبائی معاملہ کہاجاتاہے، حکومت کراچی میں دہشتگردی کے واقعات کا نوٹس لے۔
رشید گوڈیل کا کہنا تھا کہ سندھ کوملازمتوں کے کوٹے سے محروم کیا جارہا ہے۔ انھوں نے کہا کہ حق مانگتے ہیں تو کہا جاتا ہے کہ کوٹہ نہیں ہے۔
ایم کیوایم نے کے پی ٹی میں ایک ہزار غیر قانونی بھرتیوں کیخلاف احتجاج بھی کیا۔ اجلاس کے دوران کامران مائیکل نےخطاب کرتے ہوئے کہا کہ گذشتہ دور میں کراچی کو منی پاکستان سمجھ کر بھرتیاں کردی گئی ہیں۔ غیر قانونی بھرتیو ں کی تحقیقات جا ری ہے، انھوں نے کہا کہ آئندہ بھرتیاں میرٹ پرکی جا ئیگی۔
اجلاس میں پی آئی اے کی کارکردگی بہتر بنانے کیلئے بھی بحث ہوئی۔نبیل گبول کا کہنا تھا کہ پی آئی اے ایک بوجھ بن چکا ہےنہیں چل سکتی تو نجکاری کر دی جائے۔