کراچی : شہر قائد کے علاقےاسٹیل ٹاؤن میں پولیس اور اغوا کاروں میں مقابلے کے دوران دو ملزمان ہلاک ہو گئے جبکہ ملزمان کے قبضے سے اسلحہ برآمد کرلیا گیا۔
تفصیلات کے مطابق کراچی کے اسٹیل ٹاؤن میں اے وی سی سی پولیس اور اغوا کاروں میں مقابلے کے دوران دو ملزمان ہلاک ہو گئے، ملزمان کے قبضے سے دو ٹی ٹی پستول اور ایک سفید رنگ کی کار ملی ہے۔
پولیس حکام کے مطابق مقابلے کے دوران مارے جانے والے ملزمان کی شناخت عبدالمالک عرف حاجی اور حیدرعلی عرف راجو کے نام سے ہوئی ہے۔
ایس ایس پی اے وی سی سی عبداللہ احمد نے بتایا کہ بہادرآباد کے علاقے سے اغوا ہونے والے تاجر مسعود فیروز کو گزشتہ جمعرات سہراب گوٹھ سے دو اغواکاروں کے ہلاک اور دو ساتھیوں کی گرفتاری کے بعد بازیاب کرالیا گیا تھا۔
ایس ایس پی عبداللہ احمد کا کہنا تھا کہ بازیاب تاجر کی گاڑی مارے جانے والے اغوا کار کے فرار ساتھیوں کے زیر استعمال تھی۔ گرفتارعبدالمالک کی نشاندہی پر اے وی سی سی کی ٹٰیم نے کارروائی کی تھی۔
یاد رہے کہ کراچی کے علاقے بہادرآباد سے 23 اگست کو تاجر کواغوا کیا گیا تھا اوربازیابی کے لیےاغوا کاروں نے پندرہ کروڑ روپے کی رقم مانگی تھی۔
کراچی کے علاقے کلفٹن میں سیکورٹی گارڈ کی فائرنگ ‘ 2 ڈاکو ہلاک
واضح رہے کہ گزشتہ دنوں کراچی کے علاقے کلفٹن زمزمہ میں واقع ایک دکان میں ڈکیتی کرنےوالے ملزمان سیکورٹی گارڈ کی فائرنگ سے ہلاک ہوگئے تھے۔
