رینجرز نے مختلف علاقوں میں کارروائی کرکے10ملزمان کو گرفتار کرلیا، تاج کمپلیکس اور بس اسٹینڈ کے اطراف سرچ آپریشن کرکے مشکوک افراد کو حراست میں لے کر پوچھ گچھ کی گئی۔
تفصیلات کے مطابق رینجرز کی ٹیم نے کراچی کے مختلف علاقوں میں کارروائی کی ہے اس دوران 10ملزمان کو گرفتار کیا گیا۔
اس حوالے سے ترجمان رینجرز کا کہنا ہے کہ مذکورہ کارروائی سعودآباد، فیروزآباد، ماڈل کالونی، عوامی کالونی میں کی گئی، گرفتار ملزمان بھتہ خوری، ڈکیتی، اسٹریٹ کرائم اور منشیات فروشی میں ملوث ہیں،
ترجمان نے مزید بتایا کہ ملزمان سے اسلحہ،ایمونیشن، مسروقہ سامان اور منشیات بھی برآمد ہوئی ہے، ملزمان کو قانونی کارروائی کیلئے متعلقہ تھانے کی پولیس کے حوالے کردیا گیا ہے۔
دوسری جانب رینجرز اہلکاروں نے صدر کے علاقے تاج کمپلیکس اور اس سے ملحقہ بس اسٹینڈ کےاطراف سرچ آپریشن کیا۔
ذرائع کے مطابق بارہ سے زائد گاڑیوں اور موٹرسائیکلوں پر سوار اہلکاروں نے آپریشن میں حصہ لیا، آپریشن کے دوران مخصوص مقامات کے داخلی اور خارجی راستے بند کردیئے گئے تھے۔
خفیہ اطلاعات پر مختلف مقامات پر چھاپے مارے گئے اور مشکوک افراد کی تلاشی لی گئی، حراست میں لیے گئے مشکوک افراد کی بائیومیٹرک مشین کے ذریعے کوائف کی چیکنگ کی گئی۔
ذرائع کے مطابق مشتبہ گاڑیوں اور موٹرسائیکلوں کا موقع پر ریکارڈ بھی چیک کیا جارہا ہے، مذکورہ آپریشن محرم الحرام پر امن و امان کے قیام حوالے سے کیا جارہا ہے۔
