مسقط: عمان سے ہندوستان کے شہر چنئی جانے والی پرواز میں سوار 100 سے زائد مسافروں کو چنئی کسٹمز نے بڑی مقدار میں سونا، آئی فونز، لیپ ٹاپ اسمگل کرنے کے الزام میں حراست میں لے لیا۔
بین الاقوامی خبر رساں ادارے کی رپورٹ کے مطابق مسقط سے چنئی جانے والی پرواز میں 113 مسافر بڑے پیمانے پر اسمگلنگ کرنا چاہ رہے تھے، مگر کسٹم حکام نے ان کی کوشش ناکام بنادی۔
ایک رپورٹ کے مطابق جب پرواز جمعرات کی صبح ایئرپورٹ پر پہنچی تو کسٹم حکام نے اسمگل شدہ سامان لے جانے کے شبہ میں 130 کے قریب مسافروں کو حراست میں لے لیا۔
جمعرات کو پہنچنے والے 186 مسافروں میں سے 113 مسافروں کے پاس سے سونا، نئے آئی فونز اور گوگل فونز جیسی مہنگی اشیاء برآمد کی گئیں۔
چنئی ایئرپورٹ کے کسٹم حکام کو یہ اطلاع موصول ہوئی تھی کہ چنئی ہوائی اڈے پر پہنچنے والی پرواز میں 100 سے زیادہ مسافر بھاری مقدار میں سونا، آئی فون، لیپ ٹاپ اور دیگر اشیاء اسمگل کر رہے ہیں۔
رپورٹ میں کہا گیا ہے کہ چونکہ یہ واضح نہیں تھا کہ ان میں سے کون کون اسمگلنگ میں ملوث تھا، اس لیے تمام مسافروں کو روک کر گھنٹوں پوچھ گچھ کی گئی۔ جن میں سے 73 افراد کے اسمگلنگ کے معاملات میں ملوث نہ ہونے کی تصدیق ہوئی۔
اس کے بعد پولیس نے دیگر 113 مسافروں کی تلاشی لی۔ معلوم ہوا کہ مسافر سونے کے نگٹس اور سونے کے کنگن چھپا نے کی کوشش کررہے تھے، ان کے سوٹ کیس اور بیگ کی جانچ پڑتال پر کئی خفیہ خانوں کا انکشاف ہوا، جن میں 13 کلو سونا، 120 آئی فون، 84 اینڈ رائیڈ فون، غیر ملکی سگریٹ اور لیپ ٹاپ چھپائے گئے تھے۔
ضبط شدہ اشیاء کی کل مالیت INR 14 کروڑ (OMR 647,697) سے زیادہ ہے۔کسٹم حکام نے 113 افراد کے خلاف کسٹم ایکٹ کے تحت مقدمات درج کر کے انہیں ضمانت پر رہا کر دیا۔
