ARYNews.tv | Urdu – Har Lamha Bakhabar

Tag: اسٹاک مارکیٹ

  • حکومت کا اسٹاک مارکیٹ میں مزید 400 ارب روپے کے سکوک بانڈ فروخت کرنے کا فیصلہ

    حکومت کا اسٹاک مارکیٹ میں مزید 400 ارب روپے کے سکوک بانڈ فروخت کرنے کا فیصلہ

    اسلام آباد : وفاقی حکومت نے اسٹاک مارکیٹ میں مزید 400 ارب روپے کے سکوک بانڈ فروخت کرنے کا فیصلہ کرلیا۔

    تفصیلات کے مطابق حکومت پاکستان اسٹاک ایکسچینج میں مزید 400 ارب روپے اسلامی سکوک بانڈ فروخت کرے گی۔

    دستاویز میں بتایا گیا کہ اسٹاک مارکیٹ میں 400 ارب روپے کے سکوک بانڈ فروخت کرنے کا فیصلہ کرلیا گیا ہے، 23 جنوری کو 100 ارب روپے کے اسلامی سکوک بانڈ جاری کیے جائیں گے، جس میں سے 40 ارب روپے سکوک اسلامی بانڈ ایک سال کے لیے فروخت کیے جائیں گے۔

    23 جنوری کو 30 ارب روپے سکوک بانڈ 3 سے 5 سال کے لیے فکس ریٹ فروخت کیے جائیں گے ۔ جبکہ 23 جنوری کو 30 ارب روپے سکوک بانڈ 3 سے 5 سال کے لیے فلوٹنگ ریٹ فروخت کیے جائیں گے۔

    دستاویز کے مطابق 150 ارب روپے کے سکوک اسلامی بانڈ فروخت کیے جائیں گے،جس میں سے 21 فروری کو 30 ارب روپے سکوک بانڈ ایک سال کے لیے اور 21 فروری کو 60 ارب روپے سکوک بانڈ 3 سے 5 سال کے لیے فکس ریٹ فروخت کیے جائیں گے۔

    اس کے ساتھ ہی 21 فروری کو 60 ارب روپے سکوک بانڈ 3 سے 5 سال کے لیے فلوٹنگ ریٹ فروخت کیے جائیں گے۔

    دستاویز کے مطابق 19 مارچ کو بھی 150 ارب روپے سکوک اسلامی بانڈ جاری کیے جائیں گے، 30 ارب روپے سکوک بانڈ ایک سال کے لیے فروخت اور 60 ارب روپے سکوک بانڈ 3 سے 5 سال کے لیے فکس ریٹ فروخت کیے جائیں گے جبکہ 60 ارب روپے سکوک بانڈ 3 سے 5 سال کے لیے فلوٹنگ ریٹ فروخت کیے جائیں گے۔

  • انتخابات کی ہلچل کے درمیان مارکیٹ شیئرز کی تیزی سے فروخت

    انتخابات کی ہلچل کے درمیان مارکیٹ شیئرز کی تیزی سے فروخت

    کراچی: ملک میں انتخابات کی ہلچل کے درمیان مارکیٹ شیئرز کی تیزی سے فروخت جاری ہے۔

    تفصیلات کے مطابق پاکستان اسٹاک مارکیٹ میں کاروباری ہفتے کے پہلے دن آغاز ہی سے شدید مندی کا رجحان نظر آ رہا ہے، 100 انڈیکس 61 ہزار کی نفسیاتی حد سے بھی نیچے آ گیا ہے۔

    چند ہی منٹوں میں 1467 پوائنٹس کمی ہوئی اور انڈیکس 60 ہزار 242 پوائنٹس پر پہنچ گیا ہے۔ ماہرین کا کہنا ہے کہ ملک میں الیکشن کی سیاسی ہلچل اور لیوریج کی وجہ سے مارکیٹ شیئرز کی فروخت جاری ہے۔

    ماہر معاشیات خرم شہزاد نے اے آر وائی نیوز سے گفتگو کرتے ہوئے کہا کہ مندی کی ایک بڑی وجہ لیوریج بائنگ ہے، اس میں ہوتا ہے کہ انفرادی سطح پر لوگ قرضہ لے کر ایکویٹی مینج کرتے ہیں، پچھلے ڈیڑھ دو مہینے سے جب سے مارکیٹ چلنا شروع ہوئی ہے جسے مارکیٹ کی زبان میں بدلہ کہا جاتا ہے، اس میں لوگوں نے لیوریج بائنگ کی، اس بدلے کا سائز 40 ارب روپے سے تجاوز کر گیا تھا، یہ 2021 کے بعد سے سب سے زیادہ تھا، لیکن جب مارکیٹ گرنا شروع ہوتی ہے تو جو قرضے پر حصص خریدے گئے ہوتے ہیں لوگ انھیں بیچنا شروع کر دیتے ہیں اور اس طرح اپنا قرضہ پورا کرتے ہیں۔

    انھوں نے کہا کہ مارکیٹ اتنی زیادہ نہیں گری ہے، پہلے 22 ہزار پوائنٹس کا اضافہ ہوا تھا اور پھر 6, 7 ہزار پوائٹس گری، یہ اتنا بڑا امپیکٹ نہیں ہے، لیکن یہ ضرور ہے کہ یہ سیٹلمنٹ کمزور ہے، اس میں سیٹلمنٹ ہونا چاہیے تاکہ جب نیا سال شروع ہو تو ہم ریکوری کی توقع رکھ سکیں۔ جب بھی لیوریج بائنگ ہوتی ہے تو مارکیٹ گرنے پر اس کا اسی طرح امپیکٹ آتا ہے۔

    خرم شہزاد نے کہا کہ 2023 کا یہ آخری ہفتہ ہے، مارکیٹ کا اتنا سیٹلمنٹ متوقع ہے کہ جو فروخت ہو رہی ہے وہ اسی ہفتے میں سیٹل یعنی پوری ہو جائے گی، اس کے بعد ہم نئے سال میں تازہ خرید، تازہ ایکویٹی اور تازہ سرمایہ کاری کی توقع کر سکتے ہیں۔

  • اسٹاک مارکیٹ میں کاروبار کرنے والوں کے لیے اچھی خبر

    اسٹاک مارکیٹ میں کاروبار کرنے والوں کے لیے اچھی خبر

    کراچی: اسٹاک مارکیٹ میں کاروبار کرنے والوں کے لیے اچھی خبر ہے کہ حکومت پہلی بار پاکستان اسٹاک مارکیٹ میں بانڈ کی نیلامی کرے گی۔

    ذرائع اسٹاک مارکیٹ کے مطابق حکومت پہلی بار پاکستان اسٹاک مارکیٹ میں بانڈ کی نیلامی کرنے جا رہی ہے، جس سے 30 ارب روپے اکٹھے کیے جائیں گے۔

    اب پاکستانی بینکوں کے بعد پہلی بار اسٹاک مارکیٹ میں بھی بانڈ ٹریڈ ہوں گے اور بروکرز بھی بانڈ میں خرید و فروخت کر سکیں گے، ذرائع کا کہنا ہے کہ حکومت بانڈ پر 20 سے 22 فی صد تک منافع دے سکتی ہے۔

    وزیر اعظم انوارالحق کاکڑ کل اسٹاک مارکیٹ میں بانڈ نیلامی کا افتتاح کریں گے۔

  • پاکستان اسٹاک مارکیٹ میں کاروبار کا اختتام

    پاکستان اسٹاک مارکیٹ میں کاروبار کا اختتام

    کراچی : پاکستان اسٹاک مارکیٹ میں کاروبار کا اختتام مثبت انداز میں ہوا، مارکیٹ میں ٹریڈ والیوم 2 سال کی بلند ترین سطح 24.3 ارب روپے تک پہنچ گیا۔

    اے آر وائی نیوز کے مطابق پاکستان اسٹاک ایکسچینج میں کام کے آغاز کے بعد سارا دن کاروبار کا ملا جلارجحان دیکھنے میں آیا جہاں 100 انڈیکس میں 14 پوائنٹس کا اضافہ ہوا۔

    پی ایس ایکس بینچ مارک 100 انڈیکس کاروبار کے اختتام پر اس اضافے کے بعد 56 ہزار 680پوائنٹس پر بند ہوا، مارکیٹ میں بلند سطح 56 ہزار 846 پر بھی دیکھی گئی۔

    حصص بازار میں آج 66 کروڑ شیئرز کے سودے 24 ارب روپے میں طے ہوئے، اسی طرح پی ایس ایکس کی مارکیٹ کیپٹلائزیشن 27 ارب روپے بڑھ کر 8 ہزار 142 ارب روپے ہے۔

    مارکیٹ میں ٹریڈ والیوم 2 سال کی بلند سطح 24.3 ارب روپے تک پہنچ گیا، یہ حجم 29 ماہ کی بلند ترین سطح پر ہے مجموعی طور پر مارکیٹ میں 660 ملین شیئرز کا کاروبار ہوا۔

  • پاکستان اسٹاک مارکیٹ میں ملکی تاریخ کا نیا ریکارڈ قائم

    پاکستان اسٹاک مارکیٹ میں ملکی تاریخ کا نیا ریکارڈ قائم

    کراچی : پاکستان اسٹاک مارکیٹ نے ملکی تاریخ میں پہلی بار پچپن ہزار پوائنٹس کی سطح عبور کرلی، انڈیکس میں ایک ہزار سے زائد پوائنٹس کا اضافہ ریکارڈ کیا گیا۔

    تفصیلات کے مطابق پاکستان اسٹاک مارکیٹ میں نیا ریکارڈ قائم ہوگیا اور انڈیکس ملکی تاریخ میں پہلی بار پچپن ہزار پوائنٹس کی سطح عبور کرگیا۔

    کاروباری ہفتے کے آخری دن بھی مارکیٹ میں کاروبار کے آغاز پر ہنڈرڈ انڈیکس میں ایک ہزار سے زائد پوائنٹس کا اضافہ ریکارڈ کیا گیا، جس کے بعد معمولی کریکشن ہوئی اور ہنڈرڈ انڈیکس نو سو پچھہتر پوائنٹس اضافے کے ساتھ 55 ہزار236 پوائنٹس کی بلند ترین سطح پر پہنچ گیا۔

    ماہرین کا کہنا ہے آئی ایم ایف کی جانب سے مثبت مذاکرات اور کرنٹ اکاؤنٹ خسارے میں کمی ہو رہی ہے، ترسیلاتِ زر میں اضافہ ہو رہا ہے، معاشی اشاریے بہتر ہوتے جا رہے ہیں جبکہ پاکستان میں سعودی عرب اور یواےای سے بڑی سرمایہ کاری کی توقع کی جا رہی ہے، جس سے سرمایہ کاروں میں اعتماد بحال ہو رہا ہے۔

    یاد رہے سربراہ انٹر مارکیٹ سیکیورٹیز کا کہنا تھا کہ 2021 میں انڈیکس زیادہ سے زیادہ 44,596.07 پوائنٹس جبکہ 2022 میں 100 انڈیکس 42 ہزار 420 پوائنٹس پر پہنچا تھا۔ تاریخ میں پہلی بار اسٹاک مارکیٹ نے قابل ذکر سنگ میل عبور کیا ہے۔ معیشت پر زیادہ توجہ اور آگے بڑھنے کیلیے مالیاتی معاملات مثبت رجحان کے معاون عوامل ہیں۔

    انھوں نے کہا تھا کہ آئی ایم ایف پروگرام کی تکمیل کی امید بھی معاون عوامل میں شامل ہے۔

  • اسٹاک مارکیٹ میں زبردست تیزی، 100 انڈیکس 2 سال بعد 48 ہزار کی نفسیاتی حد عبور کر گیا

    اسٹاک مارکیٹ میں زبردست تیزی، 100 انڈیکس 2 سال بعد 48 ہزار کی نفسیاتی حد عبور کر گیا

    کراچی :پاکستان اسٹاک ایکسچینج میں ہفتے کے پہلے ہی دن 1027 پوائنٹس کی تیزی دیکھنے میں آئی اور 100 انڈیکس 2 سال بعد 48 ہزار پوائنٹس کی حد کو عبور کرگیا۔

    تفصیلات کے مطابق پاکستان اسٹاک مارکیٹ میں کاروباری ہفتے کے پہلے دن زبردست تیزی سے کاروبار کا آغاز ہوا۔

    کاروبار کے دوران ہنڈریڈ انڈیکس تقریبا ایک ہزار سے زائد پوائنٹس کا اضافہ دیکھا گیا اور دوسال بعد انڈیکس اڑتالیس ہزار کی نفسیاتی حد عبور کر گیا۔

    ہنڈریڈ انڈیکس 800 پوائنٹس اضافہ کےساتھ 47 ہزار900 پوائنٹس پر ٹریڈ کر رہا ہے۔

    ماہرین کا کہنا ہے پورٹ فولیو سرمایہ کاری آرہی ہے، جس سے اسٹاک مارکیٹ میں بہتری آئی ہے۔۔ صرف جولائی میں اسٹاک مارکیٹ میں ایک کروڑ نوے لاکھ ڈالر کی سرمایہ کاری ہوئی۔

    ماہرین کے مطابق آئی ایم ایف سے معاہدہ اورعرب ممالک سے پاکستان میں سرمایہ کاری کی خبریں بھی سرمایہ کاروں میں بھی اعتماد کی وجہ بتائی جارہی ہے۔

    نائب صدر لاہور چیمبر عدنان بٹ کا کہنا ہے کہ اسٹاک مارکیٹ کا2 سال بعد 48 ہزار انڈیکس عبور کرنا خوش آئند ہے، ملک کومعاشی استحکام کی ضرورت ہے۔

  • 2 ارب ڈالرز آنے کا اعلان، سرمایہ کاروں میں خوشی کی لہر، انڈیکس 45 ہزار کی نفسیاتی حد عبور کرگیا

    2 ارب ڈالرز آنے کا اعلان، سرمایہ کاروں میں خوشی کی لہر، انڈیکس 45 ہزار کی نفسیاتی حد عبور کرگیا

    کراچی : پاکستان اسٹاک مارکیٹ میں سعودی عرب سے فنڈ ٹرانسفر ہونے کے بعد 100 انڈیکس 670 پوائنٹس اضافے کے بعد 45 ہزار کی نفسیاتی حد عبور کرگیا۔

    تفصیلات کے مطابق پاکستان اسٹاک مارکیٹ میں آج بھی مثبت رجحان برقرار رہا، مارکیٹ میں سعودی عرب سے اسٹیٹ بینک میں دو ارب ڈالر جمع ہونے کی اطلاع پر تیزی دیکھنے میں آئی۔

    100 انڈیکس میں 670 پوائنٹس کا اضافہ ہوا اور انڈیکس 28 اپریل2022 کے بعد 45 ہزار کی نفسیاتی حد عبور کرگیا۔

    ماہرین کا کہنا ہے کہ وزیر خزانہ اسحاق ڈار کے دو عرب ڈالرز آنے کے اعلان کے بعد انویسٹرز میں خوشی کی لہر دوڑ گئی ۔ جس کی بعد انڈیکس اچانک اوپر جانا شروع ہو گیا۔

    گذشتہ روز مارکیٹ پینتالیس ہزار ایک سو پچپن پوائنٹس پر بند ہوئی تھی، نو سیشن میں ہنڈریڈ انڈیکس میں تقریبا تین ہزار سات سو پوائنٹس کا اضافہ ہو چکا ہے۔

  • عمران خان کی گرفتاری کی خبر : اسٹاک مارکیٹ میں اچانک گر گئی

    عمران خان کی گرفتاری کی خبر : اسٹاک مارکیٹ میں اچانک گر گئی

    کراچی : چیئرمین پی ٹی آئی عمران خان کی گرفتاری کی خبر آتے ہی اسٹاک مارکیٹ میں اچانک541 پوائنٹس گرگئی۔

    تفصیلات کے مطابق چیئرمین پی ٹی آئی عمران خان کی گرفتاری کی خبر آتے ہی کچھ منٹوں میں کے ایس ای ہنڈرڈ انڈیکس میں 541 پوائنٹس تک کی کمی دیکھی گئی اور انڈیکس 41 ہزار 288 پوائنٹس تک نیچے گرگیا۔

    مارکیٹ ڈھائی بجے اچانک گری اور سہ پہر دو بجکر 40 منٹ پر ہنڈرڈ انڈیکس کم ازکم 471.12 پوائنٹس کی مندی کے ساتھ 41,358.37 پوائنٹس پر تھا۔

    یاد رہے پاکستان تحریک انصاف کے چیئرمین اور سابق وزیراعظم عمران خان کو اسلام آباد ہائیکورٹ کے احاطے سے گرفتار کرلیا گیا تھا۔

    عمران خان کو رینجرز نے القادر ٹرسٹ کیس میں گرفتار کرنے کے بعد نیب کے حوالے کر دیا ہے، جس کے بعد عمران خان کو نیب راولپنڈی منتقل کر دیا گیا ہے۔

  • پاکستان اسٹاک مارکیٹ: 3 روز میں کاروبار میں اضافہ

    پاکستان اسٹاک مارکیٹ: 3 روز میں کاروبار میں اضافہ

    کراچی: پاکستان اسٹاک ایکسچینج میں 3 روز کے دوران کاروبار میں مثبت رجحان دیکھا گیا اور 100 انڈیکس میں 500 سے زائد پوائنٹس کا اضافہ ہوا۔

    تفصیلات کے مطابق عید الفطر کی تعطیلات ختم ہونے کے بعد پاکستان اسٹاک مارکیٹ میں 3 روز کاروبار ہوا جس کے دوران مثبت رجحان رہا۔

    26 سے 28 اپریل 2023 (بدھ تا جمعہ) کے دوران 100 انڈیکس میں 573 پوائنٹس کا اضافہ ہوا اور انڈیکس 1.40 فیصد اضافے سے 41 ہزار 580 کی سطح پر بند ہوا۔

    گزشتہ ہفتے کے دوران 62 کروڑ 40 لاکھ شیئرز کا کاروبار ہوا جبکہ 21 ارب روپے مالیت کا کاروبار کیا گیا۔

    ایک ہفتے میں مارکیٹ کیپٹلائزیشن 88 ارب روپے بڑھ کر 6289 ارب روپے ہوگئی۔

  • ہیرا پھیری اور غیر قانونی منافع کا حصول، ارشد وارثی پر پابندی لگا دی گئی

    ہیرا پھیری اور غیر قانونی منافع کا حصول، ارشد وارثی پر پابندی لگا دی گئی

    بالی ووڈ فلموں کے مزاحیہ اداکار ارشد وارثی اور ان کی اہلیہ پر سرمایہ کاری میں ہیرا پھیری اور غیر قانونی منافع کمانے کا الزام عائد کرتے ہوئے حکام نے ان پر پابندی عائد کی ہے۔

    بھارتی فلم انڈسٹری بالی ووڈ کے اداکار ارشد وارثی اور ان کی اہلیہ ماریہ گوریٹی پر شیئرز کی قیمتوں میں مبینہ ہیرا پھیری کرنے کے الزام میں پابندی لگا دی گئی ہے۔

    چند دن قبل سکیورٹیز اینڈ ایکسچینج بورڈ آف انڈیا (ایس ای بی آئی) نے شیئرز کی قیمتوں میں ہیرا پھیری کرنے پر سیکیورٹی مارکیٹ میں حصہ لینے والے 45 افراد پر پابندی لگائی تھی جن میں اداکار ارشد وارثی اور ان کی اہلیہ ماریہ گوریٹی بھی شامل ہیں۔

    ایس ای بی آئی نے یہ فیصلہ 2 فرمز شارپ لائن براڈ کاسٹ اور سادھنا براڈ کاسٹ پر لگائے گئے الزامات کی تحقیقات کے بعد کیا۔

    ان دونوں فرمز پر الزام ہے کہ انہوں نے اپنے یوٹیوب چینل پر گمراہ کن ویڈیوز اپلوڈ کیں اور لوگوں کو مشورہ دیا کہ کیسے ان فرمز کے شیئر خرید کر غیر معمولی منافع کمایا جا سکتا ہے۔

    ااس کے علاوہ ایس ای بی آئی نے مبینہ طور پر ان گمراہ کن ویڈیو سے حاصل کی جانے والی 54 کروڑ روپے کی رقم بھی اپنے قبضے میں لی ہے، اس طریقے سے ارشد اور ماریہ نے مبینہ طور پر 29 لاکھ اور 37 لاکھ روپے بالترتیب کمائے ہیں۔

    ایس ای بی آئی نے کچھ اداروں کی جانب سے شارپ لائن براڈ کاسٹ اور سادھنا براڈ کاسٹ کی جانب سے قیمتوں میں ہیرا پھیری اور شیئرز کی ناجائز فروخت کی شکایات سامنے آنے پر تحقیقات شروع کیں۔

    ادارے کی جانب سے تحقیقات گزشتہ سال اپریل سے ستمبر کے مہینے تک کی گئیں جس کے بعد یہ بات سامنے آئی کہ ان دونوں کمپنیوں کے منافع اور شیئرز کی تعداد میں اپریل اور جولائی کے درمیان تیزی سے اضافہ ہوا۔

    دوسری جانب سماجی رابطوں کی ویب سائٹ ٹویٹر پر ارشد وارثی نے اپنے ٹویٹ میں کہا کہ براہ کرم جو چیز آپ خبروں میں پڑھیں اس پر یقین مت کریں، اسٹاک ایکسچینج کے بارے میں ماریہ اور میری معلومات صفر ہیں، ہم نے مشورہ لیا اور شاردا میں پیسے لگائے اور کئی لوگوں کی طرح اپنی محنت کی کمائی گنوا بیٹھے۔