کراچی : شہر قائد میں رہزنی کی بڑھتی ہوئی وارداتوں کی روک تھام کے لیے "اسٹریٹ واچ فورس” تشکیل دی گئی ہے، موٹر سائیکل سوار مسلح اہلکار اسٹریٹ کرائم کی بیخ کنی کے لیے کام کریں گے۔
تفصیلات کے مطابق سندھ پولیس نے کراچی میں پے در پے ہونے والی لوٹ مار کی وارداتوں پر قابو پانے کیلئے اسٹریٹ کرائم کے خلاف 1870 اہلکاروں پر مشتمل”اسٹریٹ واچ فورس” تیار کرلی۔
اس سلسلے میں کراچی میں ایک تقریب کا اہتمام کیا گیا، اس موقع پر ایڈیشنل آئی جی کراچی امیر شیخ نے اسٹریٹ واچ فورس کے جوانوں سے خطاب کرتے ہوئے کہا کہ فورس کو ملزمان کی فوری گرفتاری کیلئے اسٹریٹ کرائم کے حوالے سے بدنام علاقوں میں تعینات کیا گیا ہے۔
انہوں نے کہا کہ کراچی ساؤتھ اور سٹی ایریا میں اسٹریٹ کرائم واچ فورس کو80، ضلع شرقی میں8موٹر سائیکلیں فراہم کی گئی ہیں، اس کے علاوہ ضلع وسطی، ملیر، ویسٹ اور کورنگی میں20،20نئی موٹر سائیکلیں فراہم کردی گئیں ہیں، دو موٹر سائیکلوں پر چار اہلکار ٹولیوں کی شکل میں آٹھ آٹھ گھنٹے ڈیوٹیاں ادا کریں گے۔
کراچی : نصرت بھٹو کالونی میں ڈاکوؤں نے گھر میں گھسنے کی کوشش کی، اہلخانہ کی مزاحمت پر ڈاکو فرار ہوگئے، لیاقت آباد میں شہریوں نے مبینہ اغوا کار کو پکڑ کر پولیس کے حوالے کردیا۔
تفصیلات کے مطابق شہر قائد میں لٹیرے آزاد اور محافظ غائب ہوگئے، شہری اپنا دفاع خود کرنے لگے، لٹیرے اسٹریٹ کرائم کے بعد گھروں میں بھی نقب لگانے لگے۔
نصرت بھٹو کالونی کی ایک گلی میں خاتون سمیت تین ڈاکوؤں نے پولیو ٹیم کے بہانے سے گھر کا دروازہ کھلوایا اور اندر گھسنے کی کوشش کی، گھر کے اندر سے مزاحمت کی گئی اور ڈاکوؤں کو گھسنےنہیں دیا گیا جس پر وہ فرار ہوگئے۔
سی سی ٹی وی فوٹیج میں ڈاکوؤں کے چہرے واضح طور پر نظر آنے کے باوجود ملزمان پولیس کی پہنچ سے دور ہیں، ذرائع کے مطابق ڈکیت گینگ میں دو خواتین اور چار مرد شامل ہیں، ملزمان واردات کیلئے سفید ہائی روف کا استعمال کرتے ہیں۔
دوسری جانب گزشتہ رات لیاقت آباد میں شہریوں نے دس سال کے بچے کے اغواء کی کوشش ناکام بنادی۔ بچے کے شور مچانے پر شہریوں نے ملزم کو پکڑ کر تشدد کا نشانہ بنایا اور پولیس کے حوالے کردیا۔
کراچی : ڈی آئی جی خادم رند نے کہا ہے کہ دوکروڑ سے آبادی والے شہر میں جرائم روکنا مشکل کام ہے، بچوں کے اغوا سے متعلق افواہیں بھی سرگرم رہیں۔
ان خیالات کا اظہار انہوں نے اے آر وائی نیوز سے خصوصی گفتگو کرتے ہوئے کیا، شہر قائد میں روز بروز بڑھتی جرائم کی وارداتوں سے شہری پریشان ہیں، یومیہ ہونے والی درجنوں وارداتوں میں شہری اپنے قیمتی سامان اور نقدی سے محروم ہوجاتے ہیں اس حوالے سے اے آروائی نیوز نے خصوصی ٹرانسمیشن کا اہتمام کیا۔
پروگرام میں ڈی آئی جی خادم رند، چیف سی پی ایل سی احمدچنائے، تاجررہنما جمیل پراچہ ایم کیو ایم رہنما خواجہ اظہارالحسن بھی موجود تھے۔
پروگرام میں گفتگو کرتے ہوئے ڈی آئی جی خادم رند نے کہا کہ تھانوں کو زیادہ فوکس کیا جائے تو مسائل میں کمی ہوگی، میرٹ پرکام کیا ہے اور مستقبل میں بھی میرٹ پر کام کریں گے، بچوں کے اغوا سے متعلق افواہیں بھی سرگرم رہیں۔
ڈی آئی جی خادم رند نے شہر میں جرائم میں اضافے کا اعتراف کرتے ہوئے کہا کہ دو کروڑ سے زائد آبادی کے شہر میں نفری کی کمی کے باعث جرائم روکنا مشکل کام ہے، بعض واقعات میں پولیس کی جانب سے رویے کا فقدان بھی ہے، خادم رند نےانکشاف کیا کہ بعض ملزمان بیس بیس مرتبہ پکڑے گئے۔
اسٹریٹ کرائم کی وجہ سےکراچی کی صورتحال پھر سے خراب ہوتی جارہی ہے، جمیل پراچہ
اس موقع پر تاجر رہنما جمیل پراچہ کا کہنا تھا کہ کراچی کی صورتحال پھر سے خراب ہوتی جارہی ہے، اسٹریٹ کرائم کی وجہ سے کاروبار میں30سے40فیصد کمی ہوئی، چھوٹےتاجروں کو زیادہ نقصان ہورہا ہے۔
ایس ایچ او کو معلوم ہوتا ہے کہ اسٹریٹ کرائم کون کررہاہے، چیف سی پی ایل سی احمد چنائے
چیف سی پی ایل سی احمد چنائے نے کہاکہ مانتا ہوں اسٹریٹ کرائم کم ہونے کے بجائے بڑھے، البتہ اسٹریٹ کرائمز کےعلاوہ دیگر جرائم90فیصد تک کم ہوئے، اسٹریٹ کرائمز کی روک تھام کیلئے خصوصی توجہ دینا ہوگی۔
احمد چنائے کا مزید کہنا تھا کہ علاقے کے تھانیدار کو معلوم ہوتا ہے اسٹریٹ کرائم کہاں اور کون کررہا ہے، اسٹریٹ کرائمز کی روک تھام کیلئے تھانے کوذمہ دار بنانا ہوگا۔
شہرقائد میں حکومت کی رٹ نظر نہیں آرہی، خواجہ اظہارالحسن
متحدہ قومی موومنٹ کے رہنما خواجہ اظہارالحسن نے کہا کہ شہرقائد میں حکومت کی رٹ نظر نہیں آرہی، کراچی میں اب بھی17بچے لاپتہ ہیں، پولیس کواستعداد سے متعلق مسائل درپیش ہیں، محکمہ پولیس میں سیاسی بھرتیاں کی گئی تھیں، اب بھرتیاں این ٹی ایس سے ہوتی ہیں مگرنظر نہیں آتی، پولیس کے تھانوں کی صورتحال سے سب واقف ہیں۔
کراچی : وزیراعلیٰ سندھ سید مراد علی شاہ نے کہا ہے کہ شہر میں اسٹریٹ کرائم کو کنٹرول کریں گے اس کے خاتمے کیلئے سندھ حکومت اہم اقدامات کرے گی۔
یہ بات انہوں نے سندھ اسمبلی کے اجلاس سے خطاب کرتے ہوئے کہی، مراد علی شاہ کا کہنا تھا کہ کچھ لوگ بچوں کے اغوا کی افواہیں پھیلارہے ہیں، اسٹریٹ کرائم کی ذمہ دار پولیس ہوتی ہے، پچھلے دو سے3 ماہ پولیس کسی اور کام میں مصروف رہی لیکن اب کراچی میں پولیس کے ذریعےاسٹریٹ کرائم میں کمی آئے گی صورتحال پر جلد قابو پالیں گے۔انہوں نےبتایا کہ پولیس کی کارکردگی بہتر بنانے کیلئے امل ریفارمز لائیں گے۔
یاد رہے کہ صوبہ سندھ خصوصاً کراچی میں ڈکیتی و رہزنی کی وارداتوں میں نمایاں اضافہ ہوگیا ہے، اس کیلئے صرف اعلان جنگ کی نہیں بلکہ باقاعدہ جنگ کی ضرورت ہے۔
کراچی میں دو بچیوں کی جان چلی گئی اسٹریٹ کرائم انتہا پرہیں لیکن وزیر اعلیٰ صرف زبانی جمع خرچ میں مصروف ہیں وہ کبھی اعلان جنگ کی باتیں اور کبھی سوشل میڈیا کو الزام دے رہے ہیں۔
کراچی میں ڈاکو راج قائم ہے، شہر کی کوئی سڑک لوٹ مار کرنے والوں سے محفوظ نہیں ایسے میںں عوام ارباب اختیار کی جانب دیکھ رہے ہیں، لوگوں نے اپنے تحفظ کے لیے خود ہتھیار اٹھا لیے ہیں۔
گزشتہ روز بہادرآباد میں نوجوان نے ڈاکو کو گولی مار دی۔ لوٹ مار سے تنگ شہریوں نے سچل تھانے کا گھیراؤ کرلیا لیکن وڈے سائیں کرائم کی ذمے داری سوشل میڈیا پر ڈال کر جان چھڑانے کو ہیں،ارباب اختیار کی زبانی دعوؤں کے باعث اسٹریٹ کرمنلز کے حوصلے بڑھتے جارہے ہیں اور عوام پریشان ہیں کہ جائیں تو کہاں جائیں؟
کراچی : بہادرآباد میں نوجوان نے ڈکیتی کی کوشش کرنے پر ڈاکو کو گولی ماردی، زخمی ملزم جناح اسپتال منتقل کردیا گیا، پولیس نے گورا قبرستان کے قریب پولیس مقابلہ کے بعد اسٹریٹ کرائم میں ملوث ملزم کو گرفتار کرلیا۔
تفصیلات کے مطابق شہر قائد میں چوری، ڈکیتی اور اسٹریٹ کرائم کی وارداتوں میں روز بروز اضافہ ہوتا جارہا ہے، کراچی کے علاقے بہادر آباد میں خواتین کو لوٹنے کی کوشش کی گئی۔
دو ڈاکو خاتون سے پرس چھین کر فرار ہورہے تھے کہ وہاں موجود ایک نوجوان نے مبینہ ڈاکو کو گولی مار دی جبکہ ملزم کا ساتھی فرار ہونے میں کامیاب ہوگیا، بعد ازاں ملزم کو پولیس کے حوالے کردیا گیا جسے جناح اسپتال منتقل کردیا گیا۔
دوسری جانب کراچی پولیس نے گورا قبرستان کے قریب پولیس مقابلہ کے بعد اسٹریٹ کرائم میں ملوث ملزم کو گرفتار کرلیا، پولیس کا کہنا ہے کہ ملزم روہان عرف بھٹی ایک ہزار سے زائد اسٹریٹ کرائم کی وارداتوں میں ملوث ہے۔
کارروائی خفیہ اطلاع پر کی گئی، ملزم مختلف مقدمات میں مطلوب ہے، ملزم نے2012میں صدر پارکنگ پلازہ پرایک شخص کو قتل کیا تھا، پولیس کے مطابق ملزم روہان عرف بھٹی اپنا تعلق سیاسی جماعت سے بتاتا ہے۔
ملزم نے صدر، ڈیفنس، کلفٹن، فیروزآباد، اور سولجربازار کے علاقوں میں وارداتوں کا اعتراف کیا ہے۔ اس کے علاوہ فیروز آباد میں پولیس نے مقابلے کے بعد دو ڈاکوؤں کو زخمی حالت میں گرفتار کرلیا ہے۔
پولیس کے مطابق ملزمان کی شناخت حمزہ علی اور نعیم الدین کے ناموں سے ہوئی، ان کے قبضے سے دو پستول،موبائل فونز اور موٹر سائیکل برآمد کی گئیں۔
لاہور: مختلف علاقوں میں ڈاکوؤں نے عوام کا جینا دوبھر کردیا، شہری قیمتی سامان سے محروم ہوگئے، پولیس خاموش تماشائی بن گئی۔
تفصیلات کے مطابق پنجاب کے دارالحکومت لاہور میں چوری و ڈکیتی کی وارداتوں میں خوفناک حد تک اضافہ ہوگیا، روز مرہ کی بڑھتی وارداتوں سے شہری عدم تحفظ کا شکار ہونے لگے۔
لاہور پولیس کی خاموشی اور ڈاکوﺅں کی پھرتیوں نے شہریوں کو غیر محفوظ بنا دیا۔ مصری شاہ، شاد باغ، اقبال ٹاﺅن سمیت مختلف علاقوں میں کہیں ڈاکوﺅں نے دکانوں کا صفایا کیا تو کہیں اہم شاہراہوں پر شہریوں کو ان کی قیمتی چیزوں سے محروم کر دیا۔
ڈاکوﺅں کے شر سے گھر بھی محفوظ نہ رہے ۔ڈیفنس ڈبل ایکس بلاک کے ایک گھر کے اندر سے ڈاکوﺅں نے گاڑی چرائی اور سکون سے چلتے بنے۔
دوسری جانب اچھرہ، جوہر ٹاﺅن اور ای ایم ای سوسائٹی سمیت دیگر علاقوں کے گھروں میں بھی وارداتیں عروج پر رہیں۔ رواں ماہ ڈکیتی کی سو سے زائد وارداتوں میں سی سی ٹی وی فوٹیج ہونے کے باوجود پولیس ملزمان کا سراغ لگانے میں ناکام رہی۔
کراچی : شہر قائد میں عوام ڈاکوؤں کے رحم وکرم پر ہیں، صرف کلفٹن میں ایک گھنٹے میں چار وارداتیں رپورٹ ہوئیں جو پولیس کی کارکردگی پر سوالیہ نشان بن گئیں، شہری موبائل فون اور قیمتی اشیاء سے محروم ہوگئے۔
تفصیلات کے مطابق نئے پاکستان میں کراچی والے سکھ کا سانس لینے کے بجائے اپنی جمع پونجی سے ہاتھ دھو رہے ہیں۔ روشنیوں کے شہر میں ڈاکو دندنا رہے ہیں، پولیس اپنی روایتی کارروائی کرکے صرف فرض ادا کررہی ہے۔
کلفٹن میں ایک گھنٹے کے دوران چار افراد کو موبائل فون اور نقدی سے محروم کر دیا گیا۔ اے ٹی ایم سے رقم نکلوانے والا رقم سمیت موبائل فون بھی گنوا بیٹھا۔
مسلح افراد کے ہاتھوں بلاول چورنگی کے قریب شہری موبائل فون سے محروم ہو گیا، ایک ہی گروپ کی لوٹ مار کا شبہ ظاہر کیا جا رہا ہے، بوٹ بیسن تھانے میں وارداتوں کا مقدمہ درج کرانے کیلئے چار شہریوں نے درخواستیں دی ہیں۔
گلشن حدید کراچی میں موٹر سائیکل سوار مسلح افراد نے دن دہاڑے راہ چلتی خاتون سے لوٹ مار کی، ماں کے ساتھ موجود بے بس بیٹا ماں کی فکر کرتا رہا اور اپنی ماں کو ڈاکوؤں کے سامنے مزاحمت کرنے سے روکتا رہا۔
موٹرسائیکل سوار مسلح ملزمان نے پہلے خاتون کاپرس چھینا، جاتے جاتے ان کی نظر چوڑیوں پر پڑگئی، خاتون سے نہ اتری تو بیٹا ہی مدد کرنے لگا۔ ایک ڈاکو نے چوڑیاں اتروائیں اور باآسانی فرار ہو گئے۔
اس کے علاوہ وزیرایکسائز اینڈ ٹیکسیشن کے پرسنل سیکریٹری کے گھر کا بھی صفایا ہو گیا۔ پانچ مسلح ملزمان سچل گوٹھ بھٹائی آباد میں گھر میں گھسے اسلحے کے زور پر اہل خانہ کو یرغمال بنایا اور لاکھوں روپے لُوٹ کر فرار ہوگئے۔
کراچی میں اضافی پولیس نفری اور مخصوص فورس ناکام نظر آتی ہے۔ رواں سال ماہ جنوری سے اب تک بائیس ہزار چھ سو سے زیادہ افراد کے موبائل فون چھینے اور چوری کیے گئے، رپورٹ کے مطابق اب تک صرف نو سو ساٹھ ہی ریکور ہو سکے ہیں۔
کراچی : شہر قائد میں ایک بار پھراسٹریٹ کرائم میں اضافہ ہونے لگا، اورنگی ٹاؤن اور ناظم آباد میں ڈکیتی کی پے درپے وارداتیں ہونے لگیں۔، پولیس کسی ملزم کو گرفتار نہ کرسکی۔
تفصیلات کے مطابق کراچی میں اسٹریٹ کرائم کی وارداتیں بڑھ گئیں، شہری دن دہاڑے اسٹریٹ کریمنلز کے ہاتھوں لٹنے لگے، اورنگی ٹاؤن میں دکان کےباہرکھڑےخریداروں کو مسلح افراد نے لوٹ لیا۔
دو موٹرسائیکلوں پر سوار ملزمان نے بے خوف ہوکر لوٹ مار کی۔ ناظم آباد میں ایک پرنٹنگ پریس میں بھی ڈکیت گھس گئے، دفتر میں موجود افراد سے لوٹ مار کی چورگلشن جمال میں گھر کے باہر کھڑی موٹر سائیکل لے اڑے۔
تمام واقعات کی سی سی ٹی وی فوٹیجزمیں ملزمان کےچہرےواضح ہیں ۔ لیکن پولیس کسی بھی ملزم کو گرفتار نہ کرسکی۔
کراچی: صوبہ سندھ کے دارالحکومت کراچی میں پولیس کے دعوؤں کے باوجود مارچ کے مہینے میں بھی اسٹریٹ کرمنلز کو قابو نہ کیا جا سکا۔ درجنوں شہری جان کی بازی ہار گئے جبکہ متعدد قیمتی اشیا سے محروم کر دیے گئے۔
تفصیلات کے مطابق سٹیزن پولیس لیژن کمیٹی (سی پی ایل سی) نے مارچ کے مہینے کی رپورٹ جاری کردی۔
رپورٹ کے مطابق مارچ کے مہینے میں 30 شہری مختلف واقعات میں قتل ہوئے۔ اس دوران 2 ہزار 4 سو 76 شہریوں کے موبائل فون چھینے گئے۔
سی پی ایل سی کے مطابق شہری 130 قیمتی گاڑیوں سے محروم کر دیے گئے، 2 ہزار 80 موٹر سائیکل سواروں کو جرائم پیشہ عناصر نے پیدل کردیا۔
رپورٹ میں بتایا گیا کہ 4 تاجروں کو بھتے کی پرچیاں موصول ہوئی جبکہ اس عرصے میں 53 کاروں، 457 موٹرسائیکلوں اور 106 موبائل فونز کی ریکوری بھی کی گئی۔
خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔
لاہور : سمن آباد میں ڈاکو کار سوار شہری کو لوٹ کر فرار ہوگئے، اسلام پورہ میں بزرگ شخص کو لوٹ لیا گیا، انارکلی میں رہزنوں نے خاتون کا پرس چھین لیا۔
تفصیلات کے مطابق پنجاب کے دارالحکومت لاہور میں اسٹریٹ کرائم کی شرح تشویشناک حد تک اضافہ ہوگیا، دن کا اجالا ہو یا رات کا اندھیرا جرائم پیشہ افراد سے کسی وقت بھی کوئی شخص محفوظ نہیں ہے۔
پنجاب حکومت کی جانب سے سیف سٹی قرار دیئے جانے والے شہر لاہور میں میں ڈاکو راج قائم ہوگیا، سرعام وارداتیں کرنے والے جرائم پیشہ افراد پوری طرح آزاد ہیں۔
اطلاعات کے مطابق سمن آباد میں موٹر سائیکل سوار مسلح افراد کارسوار کے پاس آئے اور اسے اسلحہ کے زور پر یرغمال بنا کر باآسانی فرار ہونے میں کامیاب ہوگئے، چند لمحوں میں ہی شہری نقدی اور قیمتی موبائل فون سے محروم ہوگیا۔
دوسری جانب اسلام پورہ میں موٹرسائیکل سوار ڈاکوؤں نے بزرگ شہری کو بھی نہ چھوڑا، فوٹیج میں دیکھا جاسکتا ہے کہ لوٹ مار کرکے فرار ہونے والوں کی بائیک کا نمبر بھی نمایاں ہے۔
اس کے علاوہ لاہور کے پر رونق علاقے انارکلی میں موٹرسائیکل سوارملزمان پلک جھپکتے میں شاپنگ کیلئے آنے والی ایک خاتون سے اس کا پرس چھین کر فرار ہوگئے، لوٹ مار کی مسلسل ہونے والی وارداتیں انتظامیہ کی کارکردگی پر سوالیہ نشان ہیں۔
خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہچانےکےلیے سوشل میڈیا پر شیئر کریں۔
