اسلام آباد(23 اگست 2025): نادرا نے درخواست کا اسٹیٹس آن لائن معلوم کرنے کی سہولت متعارف کرادی، موبائل ایپ سے گھر بیٹھے اسٹیٹس چیک کریں۔
تفصیلات کے مطابق شہری نادرا کی پاک آئی ڈی موبائل ایپ کے ذریعے سہولت سے فائدہ اٹھا سکتے ہیں، پاک آئی ڈی موبائل ایپ پر اب آپ کو ملے گی ٹریکنگ آئی ڈی کا اسٹیٹس جاننے کی سہولت جس کی بدولت آپ آن لائن درخواست پر ہونے والی کارروائی سے ہر وقت باخبر رہ سکتے ہیں۔
نادرا کے ترجمان کا کہنا ہے کہ ب فارم، شناختی کارڈ، ایف آر سی سے متعلق تمام سہولتیں پاک آئی ڈی پر دستیاب ہیں، نادرا کی تمام خدمات، ہولتہیں پاک آئی ڈی موبائل ایپ پر دستیاب ہیں، بیرون ملک مقیم پاکستانیوں کیلئے موبائل ایپ انتہائی مفید ہے۔
ایپ پر بس اپنی ٹریکنگ آئی ڈی استعمال کریں اور اپنی درخواست کا اسٹیٹس کہیں بھی، کبھی بھی چیک کریں، ویڈیو دیکھیں، آسان ہدایات پر عمل کریں، اور ہر مرحلے پر اپنی درخواست کی پیش رفت سے باخبر رہیں۔
واضح رہے کہ نادرا پاکستانی عوام کو کمپیوٹرائزڈ شناختی کارڈ سمیت پیدائشی سرٹیفکیٹ، ڈیتھ سرٹیفکیٹ، ب فارم، فیملی رجسٹریشن سرٹیفکیٹ سمیت دیگر شناختی دستاویزات فراہم کرنے کا مجاز ادارہ ہے۔
نادرا صارفین کو سہولت فراہم کرنے کیلئے عدالت کا بڑا حکم
سندھ ہائیکورٹ کی جانب سے نادرا حکام کو وراثتی سرٹیفکیٹ کے اجرا کی فیس وصولی کی مشروط اجازت دیدی گئی۔
عدالت نے کہا کہ وراثت کیلئے قانونی ورثا نادرا سمیت مختلف اداروں سے رجوع کرتے ہیں، نادرا کی کمیٹی 10 لاکھ روپے مالیت کی وراثت پر پینل فیس نہ عائد کرے۔
سندھ ہائیکورٹ کا کہنا تھا کہ 10 لاکھ تک کی وراثت کیلئے 2 ہزار روپے سے زائد فیس وصول نہ کی جائے، 10 لاکھ سے زائد کی وراثت پر مختلف کیٹیگریز بنائی جاسکتی ہیں۔
عدالت نے کہا کہ ایک لاکھ روپے تک کی وراثت پر فیس صرف ایک ہزار روپے وصول کی جائے، کمیٹی کی تشکیل اور سفارشات کا عمل دو ماہ میں مکمل کیا جائے۔
