Tag: اسٹیٹ بینک آف پاکستان

کراچی: اسٹیٹ بینک آف پاکستان کے اعلامیے کے مطابق زکوٰۃ کی کٹوتی کے سلسلے میں ملک بھر کے بینک آج بند ہیں۔

تفصیلات کے مطابق زکوٰۃ کی کٹوتی کے سلسلے میں ملک بھر کے بینک آج بند رہیں گے۔ تمام بینک اور مالیاتی ادارے عوام سے لین دین کے لیے بند رہیں گے۔

اسٹیٹ آف پاکستان نے وزارت مذہبی امور کے ساتھ مشاورت سے ساڑھے 52 تولے چاندی کی قیمت کے تناسب سے زکوٰۃ کا نصاب 44 ہزار 415 روپے مقرر کیا ہے جبکہ گزشتہ برس نصاب 35 ہزار 5 سو 57 روپے مقرر کیا گیا تھا۔

وزارت مذہبی امور کی جانب سے زکوۃ کا نصاب مقرر کرنے کے بعد اسٹیٹ بینک نے اعلان کیا ہے کہ سیونگ اکاؤنٹس رکھنے والے صارفین کے کھاتوں سے ڈھائی فیصد رقم زکوۃ کی مد میں کٹوتی کی جائے گی۔

اسٹیٹ بینک آف پاکستان نے ماہِ رمضان میں تمام بینکوں کے اوقات کارتبدیل کردیے، ماہ رمضان میں بینک پیرتا جمعرات صبح 10 بجے سے لے کر دوپہر 2 بجے تک ہوں گے جس میں دورانِ نماز وقفہ دیا جائے گا اسی طرح جمعےکے روز بینک صبح 9 بجے سے دوپہر 1 بجے تک بغیر کسی وقفے کے تمام بینکس کھلے رہیں گے۔

کراچی: ملک میں روپے کی مسلسل گھٹتی ہوئی قدر اور ڈالر کے مہنگا ہونے پر اسٹیٹ بینک متحرک ہو گیا ہے، ایکس چینج کمپنیوں سے ایگزیکٹو ڈائریکٹر اسٹیٹ بینک سید عرفان شاہ نے ملاقات کی۔

ملاقات میں حکومتی نمائندوں کی جانب سے ڈالر کے ریٹ 150 روپے تک جانے کے بیانات سے عوام میں منفی پیغام پھیلنے، ڈالر کی قیمتوں کو پر لگ جانے اور روپے کی قدر میں مزید کمی اور ڈالر کے مارکیٹ سے غائب ہو جانے پر شدید تشویش کا اظہار کیا گیا۔

عرفان شاہ نے کہا کہ مارچ میں بڑی ادائیگیوں کی وجہ سے ڈالر کی طلب تھی، اب روپیا مزید ڈی ویلیو نہیں ہوگا، نہ ہی حکومت کا کوئی ارادہ ہے، انٹربینک میں جب ڈالر کی ڈیمانڈ زیادہ ہوگی تو وقتی طور پر ریٹ بڑھے گا اس کے بعد خود بہ خود کم بھی ہوگا۔

قبل ازیں سید عرفان علی شاہ نے ملاقات میں دریافت کیا کہ فری مارکیٹ میں ڈالر مہنگا کیوں ہو رہا ہے، فری مارکیٹ میں ڈالر کی قلت کا بھی سامنا ہے، جس پر فاریکس ایسوسی ایشن پاکستان کے صدر ملک محمد بوستان نے کہا کہ حکومت میں شامل افراد کے بیانات کی وجہ سے ڈالر کا ریٹ بڑھ رہا ہے۔

انھوں نے ایس بی پی کے ڈائریکٹر فارن ایکسچینج عرفان شاہ کو بتایا کہ حکومت کے ایڈوائزری کونسل کے رکن ڈاکٹر اشفاق حسن ڈالر کے 150 روپے تک جانے کی پیش گوئی کر رہے ہیں۔

ملک بوستان کا کہنا تھا کہ آئی ایم ایف کے وفد کے دورہ کرنے سے پہلے پانچ مارچ کو ڈالر 138.50 روپے کا تھا، ایک ماہ میں ڈالر تین روپے مہنگا ہوا، حکومت خود فری فلوٹ نظام کا اعلان کر رہی ہے۔

انھوں نے مزید بتایا کہ حج و عمرہ سیزن میں عازمین حج کو تقریباً 6 ارب ڈالر کے مساوی زر مبادلہ درکار ہے، لیکن اب ڈالر کی ڈیمانڈ دن بہ دن بڑھ رہی ہے۔

اسلام آباد: گورنر اسٹیٹ بینک طارق باجوہ نے کہا ہے کہ اسٹیٹ بینک آف پاکستان پالیسی کے تحت کم لاگت گھروں کی تعمیر کے لیے قرضے دے گا۔

تفصیلات کے مطابق اسلام آباد میں گورنر اسٹیٹ بینک طارق باجوہ نے تقریب سے خطاب کرتے ہوئے کہا کہ اسٹیٹ بینک پالیسی کے تحت کم لاگت گھروں کی تعمیر کے لیے قرضے جاری کرے گا۔

طارق باجوہ نے کہا کہ 30 لاکھ روپے لاگت تک گھر کم لاگت گھروں کے زمرے میں آئے گا۔

گورنر اسٹیٹ بینک کا کہنا تھا کہ بینک کم لاگت گھر کی تعمیر کے لیے غریب آدمی کو کل لاگت کا 90 فی صد قرض دے گا، بیوگان، یتیم، شہدا، خواجہ سرا اور دہشت گردی سے متاثرہ افراد کو ترجیح دی جائے گی۔

اسٹیٹ بینک کے گورنر کا یہ بھی کہنا تھا کہ کم لاگت گھروں کی خرید و فروخت اور کرائے پر دینے کی پابندی ہوگی۔

یہ بھی پڑھیں:  وزیر اعظم کا کچی آبادیوں کے مکینوں کے لیے فلیٹس کی تعیمر کا اعلان

انھوں نے کہا کہ کم لاگت گھروں کی تعمیر سے روزگار کے بے پناہ مواقع پیدا ہوں گے، رواں سال زرعی شعبے کے لیے بھی 1250 ارب روپے کے قرضے دیے جائیں گے۔

خیال رہے کہ آج اسلام آباد میں کم لاگت گھروں کی تعمیر سے متعلق تقریب منعقد ہوئی، جس میں وزیرِ اعظم عمران خان نے کہا کہ شہروں میں موجود کچی آبادیوں کے لیے آج تک کسی نے نہیں سوچا، کچی آبادیوں میں رہنے والوں کو فلیٹس بنا کر دیں گے۔