کراچی: اسٹیٹ بینک آف پاکستان نے سسٹم کے لحاظ سے اہم ملکی بینکوں کا تعیّن کر دیا۔
تفصیلات کے مطابق بینک دولت پاکستان (ایس بی پی) نے ’فریم ورک فار ڈومیسٹک سسٹمیکلی امپورٹنٹ بینکس‘ کے تحت، جسے اپریل 2018 میں متعارف کرایا گیا تھا، 2022 کے لیے نظام کے لحاظ سے اہم ملکی بینکوں (D-SIBs) کے تعیّن کا اعلان کر دیا۔
اسٹیٹ بینک کے مطابق یہ فریم ورک عالمی معیارات اور روایات کے مطابق ہے، اس میں مقامی حرکیات کا لحاظ رکھا گیا ہے، اور اس میں نظام کے لحاظ سے اہم ملکی بینکوں کی شناخت اور تعین کا طریقہ کار، ضابطہ کاری اور نگرانی کی بہتر شرائط اور عمل درآمد کے لیے رہنما ہدایات نوٹ کی گئی ہیں۔
اسٹیٹ بینک کا کہنا ہے کہ ان بہتر شرائط کا مقصد نظام کے لحاظ سے اہم بینکوں کی دھچکوں (shocks) کے خلاف لچک کو مزید بہتر بنانا اور ان کے انتظامِ خطر کی صلاحیتوں میں اضافہ کرنا ہے۔
نظام کے لحاظ سے اہم ملکی بینکوں کی شناخت دو مراحل پر مشتمل ہے، پہلے مرحلے میں مقداری اور معیاری پیمانوں کی بنیاد پر ہر سال نمونے کے بینکوں کو شناخت کیا جاتا ہے، دوسرے مرحلے میں نمونے کے اِن بینکوں میں سے ان اداروں کے حجم، باہمی روابط، تبادلہ کی قابلیت کی بنیاد پر ڈی ایس آئی بیز کا تعین کیا جاتا ہے۔
اسٹیٹ بینک نے بینکوں کے 31 دسمبر 2021 تک کے مالی امور کی بنیاد پر سالانہ جانچ کی ہے، اس جانچ کے مطابق تین بینکوں یعنی حبیب بینک لمیٹڈ، نیشنل بینک آف پاکستان اور یونائیٹڈ بینک لمیٹڈ کو نظام کے لحاظ سے اہم ملکی بینک متعین کیا گیا ہے۔
