کراچی: گورنر اسٹیٹ بینک رضا باقر نے’آسان موبائل اکاؤنٹ‘ اسکیم کا افتتاح کر دیا، جس کے تحت برانچ لیس بینکاری کھاتے کھولے جا سکیں گے۔
تفصیلات کے مطابق بینک دولت پاکستان کے گورنر ڈاکٹر رضا باقر نے آج اسٹیٹ بینک آف پاکستان کے صدر دفتر کراچی میں ہونے والی ایک تقریب میں ’آسان موبائل اکاؤنٹ‘ کا افتتاح کیا۔
’آسان موبائل اکاؤنٹ‘ سے موبائل فون پر *2262# کوڈ ڈائل کرنے سے برانچ لیس بینکاری اکاؤنٹ کھولا جا سکے گا، بعد ازاں اکاؤنٹ ہولڈر کسی بھی برانچ لیس بینکاری ایجنٹ کے پاس جا کر اپنے اکاؤنٹ میں رقم جمع کرا سکے گا/ گی، اور اس رقم کو موبائل فون کے ذریعے استعمال کر سکے گا/گی۔
اسکیم کے لیے کئی اداروں نے اہم معاونت کی ہے، جن میں پی ٹی اے، نادرا، برانچ لیس بینکاری فراہم کنندگان، سیلولر موبائل آپریٹرز اور ورچوئل ریمیٹنس گیٹ وے (وی آر جی) شامل ہیں، موبائل بینکاری انٹر آپریٹبلٹی کے لیے ضوابط کے تحت وی آر جی کو اسٹیٹ بینک اور پی ٹی اے نے مشترکہ طور پر لائسنس دیا ہے۔
تقریب میں برانچ لیس بینکاری سہولت فراہم کرنے والے 13 اداروں کے مابین مفاہمت کی یادداشت پر دستخط بھی کیے گئے۔ اس موقع پر گفتگو کرتے ہوئے ڈاکٹر رضا باقر نے اشتراک کرنے پر اسٹیک ہولڈرز کا شکریہ ادا کیا، انھوں نے توقع ظاہر کی کہ ’آسان موبائل اکاؤنٹ‘ سے بینک اکاؤنٹ کھولنے میں نمایاں اضافہ ہوگا اور انٹرنیٹ تک کم رسائی یا برانچ لیس بینکاری آؤٹ لیٹس/بینک برانچوں سے دوری پاکستانیوں کے لیے مالی خدمات تک رسائی میں رکاوٹ نہیں رہے گی۔
اب کسی بھی موبائل فون (اسمارٹ یا سادہ فیچر فون) سے یو ایس ایس ڈی کوڈ *2262# ڈائل کر کے انٹرنیٹ کنکٹیوٹی کے بغیر کسی بھی موبائل نیٹ ورک کے ذریعے اکاؤنٹ کھولا جا سکتا ہے۔
گورنر اسٹیٹ بینک نے کہا کہ پاکستان میں بائیو میٹرک تصدیق شدہ موبائل صارفین کی تعداد 187 ملین سے زائد ہے جن کی ٹیلی ڈینسٹی تقریباً 85 فی صد ہے تاہم صرف 106 ملین تھری جی/ فور جی صارفین ہیں جن میں موبائل انٹرنیٹ کی رسائی 48 فی صد ہے، اس طرح ہمیں تقریباً 81 ملین موبائل فون صارفین کی ممکنہ مارکیٹ حاصل ہے جنھیں انٹرنیٹ تک رسائی حاصل نہیں ہے اور وہ ’آسان موبائل اکاؤنٹ‘صارفین بن سکتے ہیں۔
انٹرنیٹ سے محروم موبائل صارفین
’آسان موبائل اکاؤنٹ‘ خاص طور پر کم آمدنی والے طبقوں کے لیے مددگار ہوگا، جن کے پاس نہ تو ڈیجیٹل فون ہیں اور نہ ہی وہ انٹرنیٹ سے محرومی کے باعث موبائل بینکاری سے مستفید ہو سکتے ہیں، کیوں کہ مالی خدمات کے حصول کے لیے ’آسان موبائل اکاؤنٹ‘کا پراسس اتنا سادہ ہے جیسے ایک کوڈ ڈائل کرنا۔
’آسان موبائل اکاؤنٹ‘ پاکستانی خاتون صارفین کو مرکزی دھارے میں لانےکا بھی نہایت موزوں پلیٹ فارم ہوگا، کیوں کہ انھیں نقل و حرکت، ثقافتی اور دستاویزی مسائل کی وجہ سے باضابطہ مالی خدمات کے حصول میں بڑی مشکلات کا سامنا کرنا پڑتا ہے۔ ’آسان موبائل اکاؤنٹ‘کے آسان استعمال کی بدولت مزید 50 ملین پاکستانی بینکاری کے دائرے میں شامل ہو جائیں گے۔
یہ اقدام حکومتِ پاکستان کے ’یڈجیٹل پاکستان‘ کے جامع طرز فکر سے بھی مطابقت رکھتا ہے جس کے تحت رسائی اور ارتباط (کنکٹیوٹی)، ڈیجیٹل انفرا اسٹرکچر اور اختراع میں اضافہ کرنا ہے۔ اب حکومتِ پاکستان تخفیفِ غربت کے حوالے سے احساس پروگرام کے تحت 15 ملین استفادہ کنندگان میں رقم کی تقسیم میں اس طریقے کو استعمال کر سکتی ہے۔
