ننھی رابیل فاطمہ 22ماہ کی ایک پیاری سی بچی ہے، یہ بچی بھی عام بچوں کی طرح اچھلنا، کھیلنا اور زندگی سے لطف اٹھانا چاہتی ہے لیکن افسوس یہ ایک خطرناک مرض میں مبتلا ہے۔
اسپائنل مسکولر ایٹرافی (ایس ایم اے) بچوں کو ہونے والی ایسی خطرناک بیماری ہے جس میں پٹھے کمزور ہوجاتے ہیں اور ان کی حرکات و سکنات نہ ہونے کے برابر رہ جاتی ہے۔
اس بیماری کی وجہ سے بچوں کے دماغ اور ریڑھ کی ہڈی کے اعصابی خلیات خراب ہونے لگتے ہیں، بچوں کو یہ مرض دوران حمل ماں کے پیٹ سے ہی لگ جاتا ہے۔
ننھی سی رابیل فاطمہ ایس ایم اے(اسپائنل مسکولر ایٹروپی) ٹائپ ون جیسی خطرناک مرض کا شکار ہے۔ جس کے علاج کے لیے کروڑوں روپے درکار ہیں۔
بچی کے والد ایک پرائیویٹ کمپنی میں ملازم ہیں۔ ان کے پاس اتنے وسائل نہیں ہیں کہ وہ اپنی معصوم بچی کا علاج کراسکیں۔
اے آر وائی نیوز کے پروگرام باخبر سویرا میں زندگی اور موت سے روز لڑنے والی رابیل کے والد محمد ابو بکر نے اپنی بچی کی حالت کے بارے میں بتا کر ناظرین کو بھی افسردہ کردیا۔
انہوں نے بتایا کہ جب رابیل 6 ماہ کی تھی تو اس طرح کی علامات سامنے آئیں ڈاکٹر کو دکھایا تو پتہ چلا کہ اس کو ایسی خطرناک بیماری ہے جس کے علاج کیلیے بہت بڑی رقم درکار ہوگی۔
محمد ابوبکر نے بتایا کہ میری بیٹی کو 24ویں مہینے میں انجکشن لگوانا لازمی ہے اور میرے اتنے وسائل نہیں کہ 55 کروڑ روپے کا بندوبست کرسکوں۔