اسپانسرشپ حج اسکیم کے تحت مطلوبہ درخواستیں نہ ملنے پر نگراں حکومت کی جانب سے تاریخ میں پھر توسیع کا فیصلہ کیا گیا ہے۔
تفصیلات کے مطابق ذرائع نے انکشاف کیا ہے کہ 25 ہزار کے کوٹے پر صرف 3161 درخواستیں موصول ہوسکی ہیں۔ 21 ہزار 839 درخواستیں مزید وصول کی جائیں گی اس لیے اسپانسر شپ اسکیم کی مدت میں مزید ایک ہفتہ توسیع کا فیصلہ کیا گیا ہے
ذرائع نے بتایا کہ سرکاری ریگولرحج اسکیم کے تحت عازمین کی جانب سے 63 ہزار سے زائد درخواستیں موصول ہوئی ہیں۔
ریگولر اسکیم کے تحت درخواست جمع کرانے کا ابھی ایک روز باقی ہے۔ ریگولر اسکیم کے تحت خوش نصیب عازمین حج کا فیصلہ قرعہ اندازی سے ہوگا۔
ذرائع نے بتایا کہ کوٹے سے زائد درخواستیں ملنے پر ریگولر حج اسکیم میں توسیع نہیں ہوگی۔ حج کے خواہشمند اب اسپانسر شپ اسکیم کے ذریعے فریضہ حج ادا کر سکتے ہیں۔
اسپانسر شپ اسکیم کے تحت بیرون ملک سے ڈالرز میں درخواستیں جمع ہونگی۔ یہ اسکیم قرعہ اندازی سے مستثنیٰ ہے۔ اس اسکیم کی تاریخ میں توسیع کا اعلان کل کیا جائےگا۔
