Tag: اسپتال

حلب: باغیوں کے زیرقبضہ حلب شہر میں روسی اورشامی جنگی طیاروں نے اسپتال پر بمباری کی جس کے نتیجےمیں 34افراد جان کی بازی ہار گئے۔

تفصیلات کےمطابق ہفتے کے روز باغیوں کے زیر قبضہ حلب شہر کے سب سے بڑے ہسپتال ایم ٹین پرروسی اور شامی جنگی طیاروں نے شدید بمباری کی جس میں 34 افراد جاں بحق ہوئے۔

سیریئن آبزرویٹری فار ہیومن رائٹس کا کہنا ہےکہ ایم ٹین ہی کے قریبی علاقے میں ایک فیلڈ اسپتال پر بھی فضائی حملہ کیا گیا ہے، جس میں ایک شخص جاں بحق ہو گیا، جبکہ اس ہسپتال نے بھی کام کرنا بند کر دیا۔

خیال رہےکہ بدھ کے روز بھی ایک اسپتال پر بمباری کی گئی تھی۔اقوام متحدہ نے بدھ کے روز ہونے والے حملوں کو ’جنگی جرم‘ قرار دے کر ان کی مذمت کی تھی۔

مزید پڑھیں: دمشق: حلب میں حکومتی افواج کی اسپتال پر بمباری، 50 افراد جاں بحق

اپوزیشن رہنماؤں نے حلب کے اسپتالوں پر فضائی حملوں کا الزام روس اور اسد حکومت پر عائد کیا ہے۔ان کے مطابق جنگی طیاروں سے حملوں اور بمباری نے زخمیوں کی مرہم پٹی کے مراکز کو برباد کر دیا ہے۔

طبی امدادی تنظیم ڈاکٹرز ود آؤٹ بارڈرز اور سیرین آبزرویٹری برائے انسانی حقوق نے ان حملوں کو فوری طور پر بند کرنے کی اپیل کی ہے۔

مزید پڑھیں: حلب میں فضائی بمباری سے 81 افراد جاں بحق 250زخمی

ڈاکٹرز ود آؤٹ بارڈرز کے مطابق اکیس ستمبر سے چھبیس ستمبر کے درمیان مشرقی حلب کے تمام اسپتال معمول کے فرائض انجام دے رہے تھے لیکن اب تمام طبی مراکز کے ورکرز اپنے کام چھوڑ کر زندگی بچانے کی فکر میں ہیں۔

واضح رہے کہ شامی اور روسی جنگی طیاروں کی اسپتال پر بمباری کی اقوام متحدہ، جرمنی، امریکا، فرانس اور سویڈن کی جانب سے مذمت کی گئی ہے۔

ریاض: سعودی عرب میں تین ماہ سے تنخواہیں نہ ملنے پر اسپتال کے ملازمین نےاحتجاجاََ کام بند کریااور ہڑتال پر چلے گئے۔

تفصیلات کے مطابق سعودی عرب کے خلیجی ساحلی شہر الخبر میں سعد اسپتال کی نرس نے غیر ملکی خبررساں ادارے کو ٹیلی فون پر بتایا کہ اسپتال کا عملہ ہڑتال پر چلا گیا ہے.انہوں نے اپنی شناخت ظاہر نہ کیے جانے پر بتایا کہ ہمیں ساڑھے تین ماہ سے تنخواہیں نہیں دی گئیں۔

نرس نے بتایا کہ یہ اسپتال سعد گروپ کا حصہ ہے جن کا ناصرف سعودی عرب بلکہ دنیا بھر میں کاروبار ہے۔

اسپتال کی نرس نے بتایا کہ تمام طبی عملے جس میں 1200 نرسیں بھی شامل ہیں احتجاجاََ کام روک دیا ہےاور ہڑتال پر ہیں۔

انہوں نے مزید بتایا کہ اسپتال میں صفائی کرنے والے عملے کو تنخواہیں ادا کردی گئی ہیں لیکن ہمیں عید کے بعد تنخواہیں دینے کا وعدہ کیا گیا تھا جو اب تک نہیں دی گئیں۔

اسپتال کے ملازمین کا کہنا ہے کہ اگر ان کو تنخواہوں کی ادائیگی نہ کی گئی تو وہ گورنر ہاوس کے سامنے احتجاج کریں گے۔

واضح رہے کہ اسپتال عملےکا کہنا ہے کہ تنخواہیں نہ ملنے تک ہڑتال جاری رہے گی تاہم کسی بھی ایمرجنسی میں عملے کی خدمات دستیاب ہوں گی۔

نئی دہلی: بھارت کی مغربی ریاست گجرات کےاسپتال میں مبینہ طور پر ایک خاتون کے ساتھ ریپ کے الزام میں ڈاکٹر سمیت دو افراد کو گرفتار کر لیا گیا۔

تفصیلات کے مطابق بھارتی ریاست گجرات میں ڈینگی سے متاثرہ زیر علاج خاتون کو ہفتے میں دو مرتبہ نشہ آور دوا دے کر ریپ کا نشانہ بنانے پر اسپتال کے ڈاکٹر سمیت دو ملازمین کو گرفتار کرلیا گیا۔

گاندھی نگر پولیس کے چیف وریندرا یادیو کا کہنا تھا کہ ابتدائی میڈیکل رپورٹ میں ریپ کی تصدیق ہوئی ہے اور متاثرہ خاتون نے بھی ملزمان کو شناخت کرلیا ہے،ملزمان اس وقت پولیس ریمانڈ میں ہیں۔

پولیس حکام کا کہنا تھا کہ ملزمان کے خون کے نمونے حاصل کر کے فرانزک ٹیسٹ کےلیے بھجوا دیے گئے ہیں جبکہ سی سی ٹی وی فوٹیج کی بھی تحقیقات کی جارہی ہیں۔

اسپتال انتظامیہ کا کہنا تھا کہ وہ مذکورہ کیس میں پولیس کے ساتھ مکمل تعاون کررہی ہے۔

انتظامیہ نے ایک جاری بیان میں کہا کہ اسپتال کے جس شعبے میں واقعہ پیش آیا ہے وہاں دن بھر میں اسٹاف کے 14 افراد کام کرتے ہیں اور ان پر سی سی ٹی وی کیمروں کی مدد سے نظر رکھی جاتی ہے۔

یاد رہے کہ یہ پہلا موقع نہیں ہے جب ہندوستان کے اسپتال میں کسی خاتون کو ریپ کا نشانہ بنایا گیا۔

مزید پڑھیں: بھارت میں زیادتی کا شکارکم عمرلڑکی سے دورانِ علاج پھرزیادتی

رواں سال فروری میں مشرقی ریاست جار کھنڈ کے اسپتال میں ریپ متاثرہ لڑکی کو جاری علاج کے دوران اسپتال ہی کے گارڈ نے مبینہ طور پر جنسی زیادتی کا نشانہ بنایا تھا۔

یاد رہے کہ نیشنل کرائم ریکارڈ بیورو کی ایک حالیہ شائع کی گئی رپورٹ کے مطابق سال 2015 میں ہندوستان میں ریپ کے 34000 کیس رپورٹ ہوئے تھے۔

واضح رہے کہ خدشہ ظاہر کیا جارہا ہے کہ اصل ریپ کی تعداد مذکورہ رپورٹ ہونے والے واقعات سے بہت زیادہ ہے کیونکہ بیشتر متاثرہ گھرانے رسوائی کے خوف سے اس طرح کے کیسز رپورٹ نہیں کراتے۔