ARYNews.tv | Urdu – Har Lamha Bakhabar

Tag: اسپتال

  • قادرخان کے انتقال سے متعلق خبریں بے بنیاد ہیں‘ سرفرازخان

    قادرخان کے انتقال سے متعلق خبریں بے بنیاد ہیں‘ سرفرازخان

    نئی دہلی: معروف اداکار قادر خان کے صاحبزادے سرفراز خان نے والد کے انتقال سے متعلق خبروں کی تردید کرتے ہوئے کہا کہ والد اسپتال میں زیرعلاج ہیں۔

    تفصیلات کے مطابق سرفراز خان نے والد کے انتقال سے متعلق خبروں کو بے بنیاد قرار دیتے ہوئے بتایا کہ والد کینیڈا کے اسپتال میں زیرعلاج ہیں اور ان کی حالت تشویش ناک ہے۔

    بھارتی میڈیا کے مطابق سانس لینے میں دشواری کے باعث ڈاکٹرز نے قادرخان کو وینٹی لیٹرپرمنتقل کردیا ہے۔

    اس سے قبل بھارت کی کئی ویب سائٹس نے معروف اداکارقادر خان کے انتقال کی خبر جاری کیں تھیں، جس کے بعد متعدد بھارتی اداکاروں نے تعزیتی ٹویٹ بھی کیے تھے۔

    چار دہائیوں تک اپنی اداکاری سے لوگوں کے چہروں پرمسکراہٹ سجانے والے ورسٹائل اداکار قادر خان کو دو روز قبل اسپتال میں داخل کیا گیا تھا۔

    قادر خان کو اسپتال میں داخل کرائے جانے کے حوالے سے امیتابھ بچن نے ٹویٹر پر اپنے پیغام میں کہا تھا کہ ان میں نمونیا ہونے کی علامات پائی گئیں۔

    امیتابھ بچن نے ورسٹائل اداکار قادر خان کی خدمات کی تعریف کرتے ہوئے ان کی صحت کے لیے دعا کی اپیل بھی کی تھی۔

    واضح رہے کہ تقسیم ہند سے قبل 1927 میں افغانستان میں پیدا ہونے والے قادر خان نے 300 سے زائد فلموں میں اداکاری کی۔

  • مصباح الحق کا لاہور میں 125 بستروں کا چائلڈ ہارٹ اسپتال بنانے کا اعلان

    مصباح الحق کا لاہور میں 125 بستروں کا چائلڈ ہارٹ اسپتال بنانے کا اعلان

    فیصل آباد: پاکستان کے سابق ٹیسٹ کپتان مصباح الحق نے لاہور میں 2 ارب کی لاگت سے 125 بستروں کاچائلڈ ہارٹ اسپتال بنانے کا اعلان کر دیا.

    تفصیلات کے مطابق پاکستان کو نمبر ون ٹیسٹ ٹیم بنانے والے مصباح الحق نے آج چائلڈ ہارٹ انسٹی ٹیوٹ کی تعمیر کے لئے تاجروں سے ملاقات کی.

    اس موقع پر مصباح الحق نے کہا کہ پاکستان میں دل کے امراض میں مبتلا بچوں کے لئے کوئی کام نہیں ہوا، اس جانب توجہ دینے کی ضرورت ہے.

    سابق کپتان نے کہا کہ ہمارے ہاں‌ چلڈرن اسپتال ہیں، لیکن بچوں کے ماہرامراض قلب موجود نہیں، فیصل آباد پہلی ٹارگیٹ ہے، اس کے بعد پورے ملک میں انسٹی ٹیوٹ بنانے کی کوشش کروں گا.

    مزید پڑھیں: اب سرفراز احمد کی کپتانی پر کوئی بحث نہیں ہونی چاہیے: مصباح الحق

    انھوں‌ نے کہا کہ پاکستان میں پیدا ہونے والے  50 ہزار بچوں کو سالانہ امراض قلب کا سامنا کرنا پڑتا ہے، اس کے لیے لاہور میں 2 ارب سے125 بستروں کا چائلڈ ہارٹ اسپتال بنایا جائے گا.

    واضح رہے کہ پاکستان کے سابق کپتان اب فلاحی خدمت کے میدان میں قدم رکھ چکے ہیں. خیال رہے کہ پاکستان کو ورلڈ چیمپیئن بنانے والے عمران خان نے بھی فلاحی سرگرمیوں میں‌ حصہ لیا تھا اور شوکت خانم کی بنیاد رکھی تھی.

  • نومولود بچے سے ملنے کے لیے جاتے ہوئے ان باتوں کا خیال رکھیں

    نومولود بچے سے ملنے کے لیے جاتے ہوئے ان باتوں کا خیال رکھیں

    ایک نئی زندگی کا اس دنیا میں آنا ایک طرف تو والدین اور قریبی افراد کے لیے خوشی کا باعث بنتا ہے، تو دوسری طرف کچھ مسائل پیدا کرنے کا باعث بھی بنتا ہے خصوصاً نومولود بچے اور ماں کو درکار ضروریات کو فوری طور پر پورا کرنے کے لیے کچھ مشکل بھی پیش آسکتی ہے۔

    خصوصاً جب کسی گھر میں پہلی بار نومولود بچے کی آمد ہو تو ایسے میں والدین اور دیگر اہل خانہ کی مشکل اور بھی بڑھ جاتی ہے جس سے نمٹنے کے لیے کچھ وقت درکار ہوتا ہے۔

    ایسے میں نومولود بچے سے ملتے ہوئے کچھ باتوں اور احتیاطی تدابیر کا خیال رکھنا چاہیئے تاکہ گھر والے مزید مشکل میں مبتلا نہ ہوں، یہ تدابیر کچھ یوں ہیں۔

    نومولود کی آمد کی خبر سنتے ہی اسپتال کی طرف دوڑ لگانا مناسب نہیں چاہے آپ کتنے ہی قریبی عزیز کیوں نہ ہوں۔ نومولود بچے اور ماں سے ملنے کے لیے کم از کم 24 گھنٹے بعد جائیں۔ البتہ اگر آپ سے مدد طلب کی جائے تو اسپتال جانے میں کوئی حرج نہیں۔

    ملنے کے لیے جاتے ہوئے پرفیوم اور سگریٹ کے استعمال سے پرہیز کریں۔

    اگر آپ ننھے بچے کی تصویر لینا چاہتے ہیں تو پہلے والدین سے اجازت لیں اور اجازت ملنے پر بغیر فلیش کے تصویر کھینچیں۔

    نومولود بچہ اپنا زیادہ تر وقت سوتے ہوئے گزارتا ہے لہٰذا کمرے میں شور مت کریں۔

    جب ماں بچے کو دودھ پلانے لگے تو کمرے سے باہر چلے جائیں۔

    بچہ اپنے بستر میں آرام سے سو رہا ہوتا ہے لہٰذا پیار جتانے کے لیے اسے گود میں اٹھانے، ٹہلانے اور چومنے سے گریز کریں۔ اس سے بچہ ڈسٹرب ہوسکتا ہے۔

    آدھے گھنٹے سے زیادہ ملاقات غیر ضروری ہے، بچے اور ماں کو آرام کی ضرورت ہوتی ہے لہٰذا طویل ملاقات سے اہلخانہ کو بے آرام نہ کریں۔

    سب سے اہم بات یہ کہ اگر آپ کسی بھی بیماری میں مبتلا ہیں تو نومولود سے ملنے کا ارادہ ملتوی کردیں اور اپنی صحت یابی کا انتظار کریں۔ چھوٹے بچے نہایت حساس اور نازک ہوتے ہیں لہٰذا معمولی سے جراثیم بھی ان کے لیے مہلک ثابت ہوسکتے ہیں۔

  • امریکی شہرشکاگو میں فائرنگ‘ حملہ آور سمیت 2 افراد ہلاک

    امریکی شہرشکاگو میں فائرنگ‘ حملہ آور سمیت 2 افراد ہلاک

    شکاگو: امریکی شہر شکاگو میں اسپتال کے قریب فائرنگ سے ایک شخص ہلاک اور چھ زخمی ہوگئے، پولیس کی فائرنگ سے حملہ آور بھی مارا گیا۔

    تفصیلات کے مطابق امریکی شہر شکاگو میں مسلح شخص نے پہلے اسپتال کی پارکنگ لاٹ میں فائرنگ کی اور اس کے بعد عمارت کے اندر گھس کراندھا دھند فائرنگ کی جس سے ایک شخص ہلاک اور6 افراد زخمی ہوگئے۔ پولیس کی جوابی فائرنگ سے حملہ آور بھی ہلاک ہوگیا۔

    امریکی میڈیا نے بتایا کہ زخمی ہونے والوں میں ایک پولیس اہل کار بھی شامل ہے، جس کی حالت تشویش ناک ہے۔

    امریکا میں فائرنگ کے واقعات میں بڑے پیمانے پر لوگوں کی ہلاکت کی خبریں معمول بنتی جا رہی ہیں۔ اس کی ایک بڑی وجہ یہ ہے کہ امریکا میں کسی بھی دوسرے ملک کے مقابلے پر سب سے زیادہ بندوقیں اور پستول پائے جاتے ہیں۔

    امریکا:‌یوگا اسٹودیو میں فائرنگ، دو افراد ہلاک

    اس سے قبل رواں ماہ 3 نومبر کو امریکی شہر تہلسی کے یوگا اسٹودیو میں مسلح شخص کی فائرنگ سے دو افراد ہلاک جبکہ 5 زخمی ہوگئے تھے، حملہ آور نے خود کو گولی مارکر خودکشی کرلی تھی۔

    امریکا: یہودی عبادت گاہ میں فائرنگ، 3 پولیس اہلکاروں سمیت 11 افراد ہلاک

    یاد رہے کہ گزشتہ ماہ 28 اکتوبرکو امریکی شہر پٹس برگ میں واقع یہودی عبادت گاہ میں نامعلوم حملہ آور نے فائرنگ کر کے تین پولیس اہلکاروں سمیت 11 افراد کو قتل کر دیا تھا۔

  • سپریم کورٹ کا راولپنڈی اسپتال 18 ماہ میں مکمل کرنےکا حکم

    سپریم کورٹ کا راولپنڈی اسپتال 18 ماہ میں مکمل کرنےکا حکم

    اسلام آباد : سپریم کورٹ آف پاکستان نے راولپنڈی میں میٹرنٹی اسپتال کی عدم تعمیر سے متعلق کیس کی سماعت کے دوران اسپتال کو 18 ماہ میں آپریشنل کرنے کا حکم دے دیا۔

    تفصیلات کے مطابق چیف جسٹس میاں ثاقب نثار کی سربراہی میں سپریم کورٹ کے بینچ نے راولپنڈی میں زچہ وبچہ اسپتال کی عدم تعمیرسے متعلق کیس کی سماعت کی۔

    عدالت عظمیٰ میں عوامی مسلم لیگ کے سربراہ شیخ رشید، پی ڈبلیو ڈی اور دیگر حکام پیش ہوئے۔

    حکومت نے اسپتال کی تعمیرمکمل کرنے کے لیے 2 سال کی مہلت مانگی جس پرچیف جسٹس نے ہدایت کی کہ اسپتال 18 ماہ میں مکمل فعال کیا جائے۔

    چیف جسٹس نے ریمارکس دیے کہ اسپتال کی تعمیر میں پہلے ہی 10 سال کی تاخیر ہوچکی ہے، مزید تاخیر برداشت نہیں کی جائے گی۔

    انہوں نے کہا کہ متعلقہ اداروں کو جوڈیشل اکیڈمی میں 2 کمرے الاٹ کردیتا ہوں، متعلقہ حکام روزانہ کی بنیاد پرکام کرکے پیش رفت پررپورٹ دیں۔

    چیف جسٹس میاں ثاقب نثار نے ریمارکس دیے کہ اسپتال تعمیر نہیں ہوا، اسٹاف کے گھر بن گئے اور اسٹاف کے لوگ گھروں میں رہنا بھی شروع ہوگئے۔

    عوامی مسلم لیگ کے سربراہ شیخ رشید نے کہا کہ قوم پرآپ کا بہت بڑا احسان ہے، سترسال سے ہم ایک نرسنگ کالج نہیں بنا سکے، چیف جسٹس صاحب اللہ نے آپ کوذمہ داری دی ہے۔

    شیخ رشید نے کہا کہ پوری قوم آپ پراعتماد کرتی ہے، جس طرح قوم کے مسائل پرتوجہ دے رہے ہیں اللہ آپ کواجردے گا۔

    عوامی مسلم لیگ کے سربراہ نے چیف جسٹس سے درخواست کی کہ آپ ایک بار اسپتال کا دورہ کریں جس پرچیف جسٹس نے کہا کہ آج ہی ہم آرڈرکردیں گے دورہ کرنے کی ضرورت نہیں پڑے گی۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • بیگم کلثوم نوازکواسپتال سے گھر منتقل کردیا گیا

    بیگم کلثوم نوازکواسپتال سے گھر منتقل کردیا گیا

    لندن: سابق وزیراعظم نوازشریف کی اہلیہ بیگم کلثوم کی طبیعت سنبھلتے ہی انہیں اسپتال سے گھر منتقل کردیا گیا، بیگم کلثوم نواز 10 گھنٹے تک اسپتال میں زیرعلاج رہیں۔

    تفصیلات کے مطابق مسلم لیگ ن کے قائد کی اہلیہ بیگم کلثوم نواز کی گزشتہ روز اچانک طبیعت بگڑگئی تھی جس کے بعد انہیں اسپتال منتقل کیا گیا جہاں وہ 10 گھنٹے تک ڈاکٹروں کی زیر نگرانی رہیں۔

    سابق وزیراعظم نوازشریف کی اہلیہ کلثوم نواز کی طبیعت میں بہتری آنے کے بعد انہیں اسپتال سے گھرمنتقل کردیا گیا۔

    بیگم کلثوم نواز کی گذشتہ کئی مہینوں سے طبیعت بدستور خراب ہے اس سے قبل ان کے گلےمیں ٹیومر ہوا تھا جس کا تین بار آپریشن ہوا جو کامیاب رہا، بعد ازاں ڈاکٹرز نے ان کی گلے میں کینسر کی تشخیص کی ہے جس کے بعد کلثوم نواز تاحال لندن میں زیرعلاج ہیں۔

    نوازشریف حق کے راستے پر ہیں، مشکلات آتی رہیں گی، مریم نواز

    خیال رہے کہ گذشتہ ہفتے مسلم لیگ (ن) کے سوشل میڈیا کنونشن سے خطاب کرتے ہوئے مریم نواز نے کہا تھا کہ والدہ کو علاج کے بعد گلے کا کینسر دوبارہ ہوگیا، ہم نے عدالت سے جانے کی چھٹی مانگی لیکن اجازت نہیں ملی۔

    مریم نواز کا مزید کہا تھا کہ نواز شریف 6 ماہ سے اپنی اہلیہ سے نہیں مل سکے، ان سارے حالات میں ہم شکوہ نہیں کررہے ہاں سارے معاملات اللہ پر چھوڑتے ہیں انشاء اللہ وہی فتح دے گا۔

    یاد رہے کہ گزشتہ سال نواز شریف کے نااہل ہونے کے بعد خالی ہونے والی نشست این اے 120 لاہور میں 17 ستمبر کو ضمنی انتخاب ہوا تھا جس میں مسلم لیگ (ن) کی جانب سے بیگم کلثوم نواز امیدور تھیں، ملک میں موجود نہ ہونے کے باوجود انہوں نے جیت اپنے نام کی تھی۔

    خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔

  • چار پاؤنڈ وزنی دماغ کی رسولی کا کامیاب آپریشن

    چار پاؤنڈ وزنی دماغ کی رسولی کا کامیاب آپریشن

    نئی دہلی: بھارت کے مقامی اسپتال میں ڈاکٹرز نے دنیا کا سب سے وزنی دماغ کی رسولی( برین ٹیومر) کا کامیاب آپریشن کر مریض کو زندہ بچا لیا۔

    تفصیلات کے مطابق 31 سالہ مریض ’سنٹ لال‘ ایک دکاندارن ہے جو گذشتہ کئی برسوں سے برین ٹیومر کا شکار تھا۔ علالت کے باعث اسے روز مرہ کی زندگی میں کافی دشواریوں کا سامنا تھا۔ اکثر سر درد کی بھی شکایت رہتی تھی۔

    اسپتال انتظامیہ کے مطابق سات گھنٹے مسلسل جاری رہنے اور گیارہ خون کی بولتیں استعمال کرنے کے بعد آپریشن کو کامیاب بنایا گیا جسے سرجن نے اپنی انتھک محنت قرار دیا ہے۔

    مقامی میڈیا سے گفتگو کرتے ہوئے نیو سرجن ’تریمُرتی ندکرنی‘ نے کہا کہ آپریشن کامیاب بنانے کے لیے سرجنز اور عملے نے اپنی پیشہ ورانہ خدمات انجام دیں۔ آپریشن گھنٹوں جاری رہا جس میں خون کی متعدد بولتیں استعمال کی گئیں۔

    برین ٹیومر کی ابتدائی علامات، بروقت تشخیص سے جان بچانا ممکن

    انہوں نے کہا کہ آپریشن انتہائی مشکل اور نازک تھا جسے بخوبی کامیاب بنانے میں ڈاکٹرز نے محنت کی، امید ہے یہ اب تک کی سب سے وزنی دماغ کی رسولی(برین ٹیومر) ہے۔

    ان کا مزید کہنا تھا کہ آپریشن کے بعد مریض کو (آئی سی یو) میں منتقل کر دیا گیا ہے جہاں وہ  کسی بھی قسم کے جان لیوہ خطرے سے باہر ہے، تاہم معمول پر آنے اور مکمل صحت یاب ہونے میں ابھی تھوڑا وقت لگے گا۔

    خیال رہے کامیاب آپریشن کے بعد نکالی گئی رسولی کی تحقیق کی گئی تو اس کا وزن چار پاؤنڈ(1.87 کلو) اور دنیا کی سب سے وزنی رسولی قرار پائی۔

    عدالت نے بھی موبائل فون کو برین ٹیومر کی وجہ قرار دیدیا

    واضح رہے گذشتہ سال لندن کے انسٹیٹیوٹ آف چائلڈ ہیلتھ میں ہونے والی ایک تحقیق کے مطابق یونیورسٹی گریجویٹ افراد میں دماغ کا ٹیومر ہونے کا امکان 19 فیصد زیادہ ہوتا ہے جبکہ خواتین میں یہ امکان 23 فیصد بڑھ جاتا ہے۔

    ماہرین کے مطابق حتمی طور پر یہ معلوم نہیں ہوسکا کہ تعلیم کا کینسر سے کیا تعلق ہے یا وہ کیا وجہ ہے جو زیادہ تعلیم یافتہ افراد میں کینسر کی افزائش کا سبب بنتی ہے، تاہم تحقیق کے یہ نتائج خاصے حیرت انگیز اور مایوس کن ہیں۔

    خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں

  • میواسپتال کا جب سےدورہ کیا، دل پربوجھ لےکرپھررہا ہوں‘ چیف جسٹس

    میواسپتال کا جب سےدورہ کیا، دل پربوجھ لےکرپھررہا ہوں‘ چیف جسٹس

    لاہور: چیف جسٹس آف پاکستان اسپتالوں کی حالت زارسے متعلق ازخود نوٹس کی سماعت کے دوران ریمارکس دیے کہ سرکاری اسپتالوں میں اچھا نظام ہونا چاہیے۔

    تفصیلات کے مطابق سپریم کورٹ لاہور رجسٹری میں چیف جسٹس میاں ثاقب نثار نے اسپتالوں کی حالت زار سے متعلق ازخودنوٹس کی سماعت کے دوران ریمارکس دیے کہ میواسپتال کا جب سے دورہ کیا، دل پربوجھ لے کرپھررہا ہوں۔

    چیف جسٹس میاں ثاقب نثار نے ریمارکس دیے کہ تمام سرکاری اسپتالوں میں اچھا نظام ہونا چاہیے، دو، دو ماہ کے بچوں کی بھی مناسب دیکھ بھال نہیں ہورہی۔

    انہوں نے کہا کہ چلڈرن اسپتال کا خود دورہ کروں گا، دیکھا جائے گا وہاں بچوں کو سہولیات میسر ہیں یا نہیں۔

    چیف جسٹس آف پاکستان نے ریمارکس دیے کہ سب کی ذمہ داری ہے کہ مریضوں کی خدمت کریں، انہوں نے استفسار کیا کہ بتایا جائے کس سرکاری اسپتال میں بہتری لائی گئی ہے۔

    ایم ایس سروسزنے عدالت کو بتایا کہ اسپتال میں پہلے 400 بیڈ تھے اب بڑھا کر 614 کردیے گئے ہیں۔

    چیف جسٹس میاں ثاقب نثار نے استفسار کیا کہ لاہور میں آخری اسپتال کب اور کہاں بنایا گیا؟ انہوں نے کہا کہ ڈاکٹر اپنے کلینکس پر4 گھنٹے دیتے ہیں تو 2 گھنٹے کردیں، کوئی جتنی مرضی تنقید کرے پراوہ نہیں ہے۔

    پرائیویٹ میڈیکل کالجزمیں زائد فیسوں کی وصولی کا کیس

    دوسری جانب سپریم کورٹ لاہور رجسٹری میں چیف جسٹس میاں ثاقب نثار نے پرائیویٹ میڈیکل کالجزمیں زائد فیسوں کی وصولی کے کیس میں ینگ ڈاکٹرزکوسہولت اورتنخواہوں کی شکایات کی رپورٹ طلب کرلی۔

    ایسوی ایشن نے عدالت کو بتایا کہ ینگ ڈاکٹرزکو45 ہزارماہانہ وظیفہ ادا کیا جاتا ہے، چیف جسٹس نے ریمارکس دیے کہ ڈگری لینے کے بعدمعاوضہ نہ ہونے کے برابردیا جاتا ہے۔

    چیف جسٹس ثاقب نثار نے کہا کہ ڈگری لینے کے بعد معاوضہ نہ ہونے کے برابردیا جاتا ہے، پڑھے لکھے طبقے کواہمیت نہ دی جائے تو وہ کہاں جائیں گے۔

    انہوں نے کہا کہ چیف سیکرٹری بتائیں 45 ہزارماہانہ میں گزارا کرسکتے ہیں، ریاست کو ملازمین کے لیے مالک نہیں بننا بلکہ کفالت کرنی ہے۔

    صاف پانی کیس: چیف جسٹس کا وزیراعلیٰ پنجاب کوکل11بجے پیش ہونے کا حکم

    چیف جسٹس آف پاکستان نے ریمارکس دیے کہ ڈاکٹرکو موقع مل جائے تو وہ یورپ یا امریکہ چلا جاتا ہے، ہمیں علم ہے مسائل کیا ہیں۔

    انہوں نے کہا کہ ینگ ڈاکٹرزہمیں شکایات تحریری طور پر دے، رپورٹ کوآرٹیکل 190، 5، 204 کےتحت پرکھا جائے گا۔

    چیف جسٹس ثاقب نثار نے کہا کہ ریاست کی ذمہ داری ہے وہ اپنا فرض نبھائے، سپریم کورٹ کے حکم کونہیں مانا جائےگا توخاموش نہیں بیٹھیں گے۔

    چیف جسٹس آف پاکستان نے ریمارکس دیے ڈاکٹرعاصم آپ نے بھاگنا نہیں ہے ، ہمیں چھوڑکرنہیں جانا، ڈاکٹرعاصم صاحب آپ ہمارے لیے بہت اہم ہیں۔

    خبر کے بارے میں اپنی رائے کا اظہار کمنٹس میں کریں‘ مذکورہ معلومات  کو زیادہ سے زیادہ لوگوں تک پہچانے کےلیے سوشل میڈیا پرشیئر کریں

  • عالمی یوم جذام: محسن پاکستان ڈاکٹررتھ فاؤ کا گھر میوزیم میں تبدیل

    عالمی یوم جذام: محسن پاکستان ڈاکٹررتھ فاؤ کا گھر میوزیم میں تبدیل

     کراچی: پاکستان میں جذام کے مریضوں کی مسیحا سمجھی جانے والی  ڈاکٹر رتھ فاؤ کی خدمات کے اعتراف میں کراچی میں واقع ان کے گھر کو میوزیم میں ڈھال دیا گیا۔ 

    تفصیلات کے مطابق عالمی یوم جذام کے موقع پر کراچی میں واقع میری ایڈیلیڈ لیپروسی سینٹر میں جذام کے ماہرین کی پریس بریفنگ ہوئی، جس کے بعد ایم اے ایل سی میں موجود ڈاکٹر رتھ فاؤ  میوزیم کا افتتاح کیا گیا۔

    اس موقع پر ڈاکٹرعلی مرتضیٰ نے کہا کہ ڈاکٹر رتھ کے گھرکو میوزیم بنانے کے بعد آج اس کا افتتاح کیا گیا ہے، میوزیم میں ڈاکٹر رتھ فاؤ کی تصویریں آویزاں کی گئی ہیں اور ان کے خدمات کے اعتراف میں دیے گئے اعزازات رکھے گئے ہیں۔

    ڈاکٹرعلی مرتضیٰ کا مزید  کہنا تھا کہ ملک میں سالانہ 400 افراد جذام کے مرض میں مبتلا ہوتے ہیں، جس پر قابو پانے کے لیے موثر کوششیں جاری ہیں۔ انھوں نے بتایا کہ بچوں میں معذوری کی شرح 6 فیصد ہے۔

    چیف جسٹس آف پاکستان کا ڈاکٹر رتھ فاؤ کو خراج تحسین

    یاد رہے کہ ڈاکٹر رتھ فاؤ طویل علالت کے بعد 10 اگست کو انتقال کر گئی تھیں، ان کا تعلق جرمنی سے تھا اور وہ 60 کے عشرے میں پاکستان آئی تھیں۔ ان کی وصیت کے مطابق انہیں کراچی کے مسیحی قبرستان میں قومی اعزاز کے ساتھ سپرد خاک کیا گیا۔

    کراچی کا سول اسپتال ڈاکٹر رتھ فاؤ کے نام سے منسوب

    یہ بھی یاد رہے کہ گذشتہ سال وزیراعلیٰ سندھ سید مراد علی شاہ نے ڈاکٹر رتھ فاؤ کو خراج عقیدت پیش کرتے ہوئے کراچی میں واقع سول اسپتال کو ان کے نام سے منسوب کردیا  تھا۔

    اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔

  • جنوبی کوریا کے اسپتال میں آتشزدگی‘ 41 افراد ہلاک

    جنوبی کوریا کے اسپتال میں آتشزدگی‘ 41 افراد ہلاک

    سیول: جنوبی کوریا کے اسپتال میں آگ لگنے سے کم از کم 413 افراد جھلس کر ہلاک جبکہ درجنوں افراد زخمی ہوگئے۔

    تفصیلات کے مطابق جنوبی کوریا کے جنوب میں واقع شہرمریانگ میں واقع اسپتال میں آگ لگنے کے باعث 41 افراد جان کی بازی ہار گئے۔

    مقامی میڈیا کے مطابق سیجونگ اسپتال میں آگ ایمرجنسی روم میں لگی جہاں پرزیادہ ترعمررسیدہ افراد کی دیکھ بھال کی جاتی ہے۔

    ریسکیو حکام کے مطابق اسپتال کی عمارت میں 200 افراد موجود ہیں جن میں سے 93 افراد کو بحفاظت عمارت سے نکال لیا گیا ہے جبکہ دیگرافراد کوعمارت سے نکالنے کے لیے ریسکیو آپریشن جاری ہے۔

    پولیس حکام کے مطابق اسپتال میں لگنے والی آگ کے نتیجے میں 70 افراد زخمی ہوئے ہیں جن میں سے 11 افراد کی حالت تشویش ناک ہے۔

    دوسری جانب جنوبی کوریا کے صدرمون جے ان نےایمرجنسی کا اعلان کرتے ہوئے حادثے میں ہلاک ہونے والے افراد کے اہلِ خانہ سے تعزیت جبکہ زخمیوں کو طبی سہولیات فراہم کرنے کی ہدایت کی ہے۔

    یاد رہے کہ گزشتہ ماہ 21 دسمبر کو جنوبی کوریا کے شہرجیکیون میں واقع ایک 8 منزلہ عمارت میں آگ لگنے سے 29 افراد ہلاک جبکہ متعدد زخمی ہوگئے تھے۔

    اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی وال پر شیئر کریں