لندن: برطانوی ارب پتی رچرڈ برانسن نے خلا کی سیر کا خواب پورا کر کے سب کے لیے راستہ کھول دیا، رچرڈ کا یہ سفر خلائی سیاحت کا خواب یقینی بنانے کی جانب اہم قدم ہے۔
تفصیلات کے مطابق خلائی سیاحت کا خواب بہت جلد حقیقت بننے والا ہے، اسپیس فلائٹ کمپنی ورجن گلیکٹک نے اتوار کو اپنے اسپیس شپ سے انسان بردار پرواز کامیابی سے مکمل کر لی ہے۔
متعدد بار تاخیر کے، ایلون مسک اور جیف بیزوز سے سخت مسابقت کے بعد ورجین گلیکٹک کا یونٹی 22 مشن کامیاب ہوگیا ہے، اس مشن میں کمپنی کے بانی رچرڈ برانسن کے ساتھ دیگر افراد نے بھی زمین اور خلا کی درمیانی حد تک کی سیر کی۔
یہ ورجن گیلیٹک کا چوتھا اسپیس فلائٹ ٹیسٹ تھا جس میں کمپنی کے بانی خود موجود تھے، خلا میں یہ پرواز ورجن کی اہم کامیابی ہے کیوں کہ یہ اسپیس شپ 2 کا پہلا مکمل ٹیسٹ بھی تھا اور اس سے کمرشل خلائی پروازوں کا راستہ کھل جائے گا، کمپنی کی جانب سے 2022 سے خلائی پروازوں کو شروع کیے جانے کا امکان ہے۔
اس سے قبل بلیو اوریجن نے اپنی پہلی انسانی پرواز 20 جولائی کو بھیجنے کا اعلان کیا تھا جس میں جیف بیزوز بھی شامل ہوں گے، تاہم اس اعلان کے فوری بعد ورجن گلیکٹک نے 11 جولائی کو اپنی پہلی پرواز بھیجنے کا اعلان کر دیا تھا۔
I was once a child with a dream looking up to the stars. Now I’m an adult in a spaceship looking down to our beautiful Earth. To the next generation of dreamers: if we can do this, just imagine what you can do https://t.co/Wyzj0nOBgX #Unity22 @virgingalactic pic.twitter.com/03EJmKiH8V
— Richard Branson (@richardbranson) July 11, 2021
رچرڈ برانسن نے اس کمپنی کی بنیاد 2004 میں رکھی تھی اور انھیں توقع تھی کہ 2009 میں لوگوں کو خلا کی سیر کرانے کا آغاز ہو سکتا ہے، مگر اس سسٹم کی تیاری مشکل ثابت ہوئی، جب کہ مالی اخراجات زیادہ اور 2014 کی تجرباتی پرواز جان لیوا ثابت ہوئی، جس میں ایک پائلٹ ہلاک ہوا۔
خلا کی سیاحت کے لیے کمپنی اب تک سیکڑوں افراد کو 2 سے ڈھائی لاکھ ڈالرز کے ٹکٹ فروخت کر چکی ہے، امریکا کی ریاست نیو میکسیکو سے سیاحوں یا سائنسی محققین کو اسپیس شپ سے خلا میں بھیجا جائے گا۔
خلا کی سیر کے دوران سیاح چند منٹ تک بے وزنی، بالائی خلا سے زمین کے مسحور کن نظارے اور محفوظ لینڈنگ کے تجربے سے گزریں گے۔
