اسلام آباد: چیئرمین پاکستان تحریک انصاف کے ترجمان فواد چوہدری نے خواتین اراکین اسمبلی سے مریم نوازکے خطاب پر تعجب کا اظہار کیا ہے۔ انہوں نے سوال کیا ہے کہ مریم نواز کو کس حیثیت میں اراکین اسمبلی سےخطاب کے لیے مدعو کیا گیا تھا۔
تفصیلات کے مطابق تحریک انصاف نے خواتین اراکین اسمبلی سے وزیر اعظم کی دختر مریم نواز کے خطاب پر تعجب کا اظہار کیا۔ چیئر مین تحریک انصاف کے ترجمان فواد چوہدری نے کہا کہ مریم نواز کو کس حیثیت میں اراکین اسملبی سےخطاب کے لیے مدعو کیا گیا تھا۔
انہوں نے کہا کہ اگر آف شور کمپنیاں بنانے پر مریم بی بی خطاب کرتیں تو تعجب نہ ہوتا۔
فواد چوہدری کا کہنا تھا کہ اسپیکر قومی اسمبلی کا کردار اس معاملے پر شرمناک ہے۔ مریم نواز کے خطاب کی کوئی اہمیت ہے نہ اس میں کوئی اثر ہے۔ انہوں نے یہ سوال بھی کیا کہ تعلیمی اداروں میں مریم بی بی کی مداخلت کس قانون کے تحت جاری ہے۔
انہوں نے مشورہ دیا کہ پارلیمان کی ساکھ بحال کرنی ہے تو شریف خاندان سے دور رکھنا ہوگا.
یاد رہے کہ وفاقی دارالحکومت اسلام آباد میں ویمن پارلیمانی کاکس کے زیر اہتمام 3 روزہ بین الااقوامی کانفرنس میں پاکستان سمیت 12 ممالک کی خواتین ارکان پارلیمنٹ نے شرکت کی تھی۔
اس موقع پر مسلم لیگ ن کی رہنما مریم نواز کا کہنا تھا کہ دنیا میں خواتین کا کردار کبھی آسان نہیں رہا۔ انہوں نے کہا کہ دنیا کی نامور کمپنیوں میں خواتین مرکزی کردار ادا کر رہی ہیں۔
