اسلام آباد: پاکستان تحریک انصاف کے رہنما شاہ محمود قریشی نے اعلان کیا ہے کہ چوہدری محمد سرور کو گورنر پنجاب اور اسد قیصر کو قومی اسمبلی میں اسپیکر کے لیے نامزد کیا گیا ہے۔
تفصیلات کے مطابق پاکستان تحریک انصاف کے رہنما شاہ محمود قریشی کا کہنا ہے کہ اسد قیصر قومی اسمبلی میں اسپیکر کے امیدوار ہوں گے۔
انہوں نے کہا کہ اسد قیصر پختونخواہ اسمبلی میں 5 سال اسپیکر رہے۔ وہ پارلیمانی آداب اور روایات سے واقف ہیں۔
شاہ محمود قریشی کا کہنا تھا کہ اسد قیصر کا پختونخواہ اسمبلی میں اپوزیشن کے ساتھ بھی اچھا رویہ تھا۔ عمران خان نے اسد قیصر کے تجربے کو سامنے رکھتے ہوئے اسپیکر کا فیصلہ کیا۔
شاہ محمود قریشی نے مزید کہا کہ چوہدری محمد سرور کو گورنر پنجاب کے لیے نامزد کیا ہے۔
انہوں نے کہا کہ چوہدری محمد سرور بطور گورنر پنجاب وفاق کی نمائندگی کریں گے۔ چوہدری سرور پنجاب کی سیاست سے بخوبی واقف ہیں، ان کے سیاسی تجربے سے فائدہ اٹھائیں گے۔
انہوں نے مزید کہا کہ پنجاب میں تحریک انصاف کو واضح اکثریت حاصل ہوچکی ہے، ’تحریک انصاف پنجاب میں حکومت بنانے کی پوزیشن میں ہیں‘۔
شاہ محمود نے کہا کہ 13 اگست کو قومی اسمبلی کا اجلاس بلایا گیا ہے، 13 اگست کو عمران خان قومی اسمبلی ممبران کو مدعو کریں گے۔ قومی اسمبلی میں حمایت کرنے والی جماعتوں کا پھر سے شکریہ ادا کرتے ہیں۔
انہوں نے کہا کہ بی این پی مینگل، بلوچستان عوامی پارٹی کا بھی شکریہ ادا کرتے ہیں، شیخ رشید، ایم کیو ایم، مسلم لیگ ق کے بھی مشکور ہیں۔
ان کا کہنا تھا کہ کراچی کی ترقی، بہتری کے لیے ایم کیو ایم سے ایم او یو سائن کیا ہے۔ پارٹی، اتحادی ممبران کو عمران خان کی طرف سے دعوت دیتا ہوں۔ مختلف ریجنز کے ممبران سے رابطہ رکھنے کے لیے کچھ لوگوں کو ذمہ داریاں دی ہیں۔
شاہ محمود نے کہا کہ فاٹا اور پختونخواہ ممبران اسمبلی سے رابطے کے لیے پرویز خٹک کو ذمہ داری دی ہے۔ سندھ کے ممبران سے رابطہ رکھنے کے لیے عارف علوی کو ذمہ داری دی گئی ہے۔
انہوں نے مزید کہا کہ سینٹرل پنجاب کے ممبران سے شفقت محمود رابطہ رکھیں گے، مغربی پنجاب کے ممبران سے چوہدری سرور رابطے میں رہیں گے، ’شمالی پنجاب کے ممبران سے عامر کیانی رابطے میں رہیں گے، جنوبی پنجاب کے ممبران سے میں رابطے میں رہوں گا‘۔
