پشاور: چین کی یونیورسٹی میں زیر تعلیم پاکستانی طلبہ مشکل کا شکار ہو گئے ہیں، اسکالرشپ کے کروڑوں روپے غائب کر دیے گئے۔
تفصیلات کے مطابق کے پی ایجوکیشن فاؤنڈیشن کے تحت اسکالر شپ کے کروڑوں روپے غائب ہونے کا انکشاف ہوا ہے، ایجوکیشن فاؤنڈیشن نے 4 کروڑ روپے نجی اکاؤنٹس میں منتقلی کی تحقیقات شروع کر دیں۔
فاؤنڈیشن کی دستاویز کے مطابق چین کی یونیورسٹی میں زیر تعلیم طلبہ کی اسکالرشپ کی رقم نجی اکاؤنٹس میں منتقل ہوئی ہے، یونیورسٹی کی جانب سے بھیجے گئے مراسلے میں کہا گیا ہے کہ بیش تر طلبہ کے پیسے اکاؤنٹ میں منتقل نہیں کیے گئے ہیں۔
اسکینڈل کے باعث سیکڑوں طلبہ کی ڈگریاں اور لینگویج اسناد پھنس گئی ہیں، متاثرہ طلبہ کا کہنا ہے کہ 3 سال سے ماہانہ وظیفہ اور دیگر اخراجات کے پیسے یونیورسٹی کو ادا نہیں ہوئے۔
دوسری طرف خیبر پختون خوا میں شعبہ تعلیم کا حال بھی دگرگوں نظر آ رہا ہے، گورنر کے پی حاجی غلام علی نے انکشاف کیا ہے کہ 4 ماہ میں سرکاری اسکولوں میں تنخواہوں کی مد میں اربوں دیے گئے لیکن 43 فی صد بچے فیل ہو گئے، انھوں نے کہا کہ 3 ہزار 434 اساتذہ ایک سال سے اسکول نہیں آئے۔
