Tag: اسکالرشپ پروگرام

کوئٹہ : آکسفورڈ یونیورسٹی تعلیم حاصل کرنے کے خواہشمند پاکستانی طلبا کے لئے بڑی خوشخبری آگئی۔

تفصیلات کے مطابق پاکستان کے طلبہ کیلئے آکسفورڈ یونیورسٹی کے دروازے کھل گئے۔

وزیر اعلٰی بلوچستان میر سرفراز بگٹی کا تعلیم کے شعبے میں تاریخ ساز اقدام سامنے آیا ، لندن میں بینظیر اسکالرشپ پروگرام کے لئے آکسفورڈ پاکستان پروگرام اور حکومت بلوچستان کے مابین باہمی سمجھوتے کی دستاویزات پر دستخط ہوگئے۔

وزیر اعلٰی میر سرفراز بگٹی نے یونیورسٹی آف آکسفورڈ میں منعقدہ سالانہ عالمی تقریب میں بینظیر اسکالرشپ کا اعلان کیا۔

میر سرفراز بگٹی بلوچستان کے پہلے وزیر اعلٰی ہیں جنہوں نے آکسفورڈ لیڈی مارگریٹ ہال میں خطاب کیا، اس سے قبل بینظیر بھٹو مسلم دنیا کی وہ واحد لیڈر ہیں جن کی تصویر لیڈی مارگریٹ ہال میں آویزاں ہے۔

تقریب میں ملالہ یوسفزئی ، سینٹر انوارالحق کاکڑ، عامر ابراہیم ، محمد خیشگی سمیت 150 مندوبین نے شرکت کی۔

وزیر اعلٰی میر سرفراز بگٹی نے کہا کہ بلوچستان کے ذہین طالب علموں کو STEM مضامین میں حصول تعلیم کے لئے مکمل اسکالرشپ دیں گے اور بلوچستان کا غریب طالب علم وہاں تعلیم حاصل کرے گا جہاں محترمہ بینظیر بھٹو سمیت بیشتر عظیم ہستیوں نے تعلیم حاصل کی۔

ان کا کہنا تھا کہ آکسفورڈ پاکستان پروگرام کے تحت بلوچستان کے طالب علموں کی اعلٰی تعلیمی مواقعوں تک رسائی بینظیر بھٹو کی دور اندیش قیادت کو خراج عقیدت پیش کرنے کی کڑی ہے، حکومت بلوچستان بلاول بھٹو کی رہنمائی میں جوانوں کی تعلیمی ترقی اور انہیں بااختیار بنانے کے مشن پر گامزن ہے۔

اس موقع پر ملالہ یوسفزئی نے بھی اپنے فاونڈیشن کے ذریعے بلوچستان کے طلبہ کی مدد کی یقین دہانی کرائی۔

اس حوالے سے وزیرداخلہ بلو چستان میرضیالانگو نے بیان میں کہا ہے کہ آکسفورڈ یونیورسٹی میں بینظیر اسکالرشپ پروگرام کے تحت دستاویزات پر دستخط تاریخی معاہدہ ہے، نوجوان بین الاقوامی شہرت یافتہ یونیورسٹی سےاسکالرشپ کےذریعےتعلیم حاصل کریں گے۔

میرضیالانگو کا کہنا تھا کہ آکسفورڈیونیورسٹی میں اسکالرشپ دینے کا اعلان وزیراعلیٰ کی تعلیم دوستی کا ثبوت ہے، تعلیم اور صحت کی پسماند گی کے خاتمے کیلئےجنگی بنیا دوں پراقدامات کئے جارہے ہیں ، تعلیم اور صحت کے شعبے میں کوئی کوتاہی یا سمجھوتہ نہیں کیا جائے گا۔