ARYNews.tv | Urdu – Har Lamha Bakhabar

Tag: اسکول

  • گرمیوں کی 3 ماہ تعطیلات کے بعد اسکول کھل گئے

    گرمیوں کی 3 ماہ تعطیلات کے بعد اسکول کھل گئے

    راولپنڈی (01 ستمبر 2025): گرمیوں کی 3 ماہ تعطیلات کے بعد اسکول کھل گئے۔

    تفصیلات کے مطابق راولپنڈی ڈویژن میں سرکاری اور نجی اسکولوں میں تدریسی سرگرمیوں کا آج سے پھر آغاز ہو گیا ہے، تعلیمی ادارے تین ماہ کی تعطیلات کے بعد کھلے ہیں۔

    اسکولوں میں بچوں کی ہنسی خوشی واپسی ہو گئی، تعلیمی اداروں کی رونقیں بحال ہونے کے بعد طلبہ و طالبات خوشی خوشی اسکولوں کا رخ کرتے دکھائی دیے۔

    تاہم دوسری طرف پنجاب میں سیلاب زدہ علاقوں میں تاحال اسکول بند رہیں گے، ڈپٹی کمشنر منڈی بہاؤالدین نے کہا ہے کہ پھالیہ میں چھٹیاں ختم ہو گئی ہیں، لیکن کئی اسکول و کالج تاحال بند رہیں گے، سیلاب سے متاثرہ علاقوں میں 17 اسکول اور ایک کالج بند رہے گا۔

    پنجاب اور خیبرپختونخوا میں زلزلے کے شدید جھٹکے

    ڈی سی کے مطابق قادرآباد میں گرلز کالج اور ہائیر سیکنڈری اسکول بند رہیں گے، 7 پرائمری اسکول تاحکمِ ثانی بند رہیں گے، 6 گورنمنٹ ایلیمنٹری اسکول، 2 گرلز پرائمری اور 1 گرلز ایلیمنٹری اسکول بند رکھنے کا فیصلہ کیا گیا ہے، سیلابی صورت حال کے باعث تدریسی عمل معطل رہے گا، اور متعلقہ اداروں کو الرٹ کر دیا گیا ہے۔

    ادھر تاندلیانوالہ میں بھی سیلابی صورت حال کے باعث مختلف سرکاری اسکول بند رکھنے کا فیصلہ کیا گیا ہے، ڈپٹی کمشنر فیصل آباد کی ہدایت پر 23 اسکول یکم سے 5 ستمبر تک بند رہیں گے، بند رہنے والے اسکولوں میں 5 ریلیف کیمپس کے طور پر استعمال کیے جائیں گے۔

    بہاولنگر میں‌ دریائے ستلج میں سیلاب کے پیش نظر 34 اسکول غیر معینہ مدت تک بند رہیں گے، ڈپٹی کمشنر ذوالفقار احمد بھون نے اسکولوں کی بندش کا نوٹیفکیشن جاری کر دیا، بند کیے گئے اسکول دریائے ستلج بیلٹ سے ملحقہ علاقوں میں واقع ہیں، 10 اسکول منچن آباد، 6 بہاولنگر اور18 چشتیاں میں بند کیے گئے، جب کہ ضلع بھر کے دیگر اسکول گرمیوں کی چھٹیوں کے بعد آج سے کھل گئے ہیں۔

  • سرکاری و پرائیویٹ اسکولوں کی چھٹیوں میں توسیع کا فیصلہ

    سرکاری و پرائیویٹ اسکولوں کی چھٹیوں میں توسیع کا فیصلہ

    اوکاڑہ: پنجاب کے سیلاب سے متاثرہ اوکاڑہ میں تمام سرکاری اور نجی اسکولوں کی چھٹیوں میں توسیع کا فیصلہ کیا گیا ہے۔

    تفصیلات کے مطابق ڈپٹی کمشنر اوکاڑہ کا کہنا ہے کہ سرکاری و پرائیویٹ اسکولوں کی چھٹیوں میں توسیع کا فیصلہ کیا گیا ہے، دریائے ستلج و راوی کے سیلاب سے متاثرہ 32 دیہات کے اسکول 7 ستمبر تک بند رہیں گے۔

    چھٹیوں میں توسیع کا نوٹیفکیشن ڈپٹی کمشنر احمد عثمان جاوید نے جاری کیا، دوسری جانب ڈپٹی کمشنر نارووال حسن رضا نے سیلابی صورتحال کے پیش نظر ضلع کے تمام سرکاری و نجی تعلیمی ادارے بند رکھنے کا نوٹیفکیشن جاری کر دیا ہے۔

    نوٹیفکیشن کے مطابق نارووال بھر کے اسکول یکم ستمبر سے 5 ستمبر تک بند رہیں گے۔ یہ فیصلہ جاری ہنگامی صورتحال کے دوران طلباء، اساتذہ اور عملے کی حفاظت کو یقینی بنانے کے لیے احتیاطی تدابیر کے طور پر کیا گیا۔

    ضلعی حکام نے تصدیق کی کہ بندش کا اطلاق سرکاری اور نجی اداروں دونوں پر ہوگا، والدین اور طلباء کو مزید اپ ڈیٹس کے لیے اسکول انتظامیہ سے رابطے میں رہنے کا مشورہ دیا گیا ہے۔

    حکام نے مزید کہا کہ یہ فیصلہ ضلع بھر میں سیلاب کی بگڑتی ہوئی صورتحال کے پیش نظر کیا گیا ہے، کیونکہ شدید بارشوں اور پانی کی بڑھتی ہوئی سطح نشیبی علاقوں کو متاثر کر رہی ہے۔

    حکام نے بتایا کہ طوفانی بارشوں اور پنجاب کے دریاؤں میں غیر معمولی سیلاب نے کم از کم 33 افراد کی جانیں لے لی ہیں، 2,200 دیہات کو متاثر کیا ہے اور 700,000 سے زیادہ لوگوں کو نقل مکانی پر مجبور کیا ہے۔

  • اسکول دوبارہ کھلنے کے حوالے سے اہم خبر

    اسکول دوبارہ کھلنے کے حوالے سے اہم خبر

    لاہور (31 اگست 2025): ڈپٹی کمشنر لاہور نے نوٹیفکیشن جاری کرتے ہوئے کہا ہے کہ شہر میں تعلیمی سرگرمیاں یکم ستمبر سے بحال ہو جائیں گی۔

    تفصیلات کے مطابق شدید بارشوں اور سیلاب کے بعد لاہور میں اسکول دوبارہ کھل رہے ہیں، ڈپٹی کمشنر کی جانب سے جاری کردہ نوٹیفکیشن میں کہا گیا ہے کہ تمام اسکول یکم ستمبر سے دوبارہ کھل جائیں گے۔

    نوٹیفکیشن کے مطابق سیلاب سے متاثرہ علاقوں کے اسکول اور ریلیف کیمپس بدستور بند رہیں گے، والدین اور طلبہ کو ہدایت کی گئی ہے کہ وہ اسکول انتظامیہ سے رابطے میں رہیں۔

    ضلعی انتظامیہ نے کہا ہے کہ تمام اسکول محکمہ تعلیم کی ہدایات پر عمل درآمد کے پابند ہوں گے۔

    تعلیمی ادارے 5 ستمبر تک بند رکھنے کا نوٹیفکیشن جاری

    واضح رہے کہ آج بھی لاہور اور گرد و نواح میں وقفے وقفے سے بارش کا سلسلہ جاری ہے، بارش سے نشیبی علاقے زیر آب آنے کا خدشہ ہے، جب کہ محکمہ موسمیات نے آئندہ چوبیس گھنٹوں کے دوران مزید بارش کا امکان ظاہر کیا ہے۔

    پنجاب کے سیلاب متاثرہ اضلاع میں طوفانی بارشیں ہو رہی ہیں، آج دن بھر وقفے وقفے سے بارش کی پیشگوئی ہے، قصور اور اوکاڑہ میں بھی وقفے وقفے سے بارش کا امکان ہے، ننکانہ صاحب میں بارش سے گلیاں بازار تالاب کا منظر پیش کرنے لگے ہیں۔ ننکانہ کے نواحی گاؤں میں مکان کی چھت گرنے سے خاتون اور دو بچیاں جاں بحق ہو گئیں جب کہ تین افراد زخمی ہو گئے، ملکوال میں شدید بارش کے باعث مکان کی چھت گرنے سے 9 ماہ کا بچہ جاں بحق دو افراد زخمی ہو گئے ہیں۔

  • طالبہ رات بھر سکول میں بند رہی، کھڑکی سے باہر نکلنے کی کوشش کی تو……

    طالبہ رات بھر سکول میں بند رہی، کھڑکی سے باہر نکلنے کی کوشش کی تو……

    بھارت کے اڈیشہ میں ایک انتہائی افسوسناک واقعہ رونما ہوا، دوسری جماعت کی طالبہ رات بھر اسکول کے اندر بند رہی، کھڑکی کی ریلنگ سے پھنسی ہوئی ملی۔

    بھارتی میڈیا رپورٹس کے مطابق معاملہ سامنے آنے کے بعد محکمہ اسکول اینڈ ماس ایجوکیشن نے انچارج ہیڈ ماسٹر کو معطل کر دیا۔

    رپورٹس کے مطابق سات سالہ بچی جمعرات کو معمول کے مطابق اسکول گئی تھی۔ لیکن شام 4 بجے کے قریب کلاسز ختم ہونے کے بعد، اسکول کے حکام نے کلاس رومز اور عمارت کو تالا لگا دیا اور لڑکی اندر ہی بند ہوگئی۔ جب بچی گھر نہیں لوٹی اس کے گھر والوں نے بے چین ہوکر اسے گاؤں میں تلاش کیا لیکن وہ نہ مل سکی۔

    اگلی صبح تقریباً 9 بجے، جب اسکول کا باورچی احاطے کو کھولنے آیا تو لڑکی پریشان حالت میں ملی۔ بچی نے رات کے وقت لوہے کی کھڑکی کی ریلنگ سے نکلنے کی کوشش کی تھی، جب وہ کسی طرح اپنے جسم کو باہر نکالنے میں کامیاب ہوئی تو اس کا سر ریلنگ کے درمیان پھنس گیا اور وہ ساری رات اسی حالت میں جدوجہد کرتی رہی۔

    گاؤں اور گھر والے اسے بچانے کے لیے اسکول پہنچے۔ انہوں نے اسکول کے باورچی سے چابیاں لیں، کلاس روم کھولا، لوہے کی سلاخوں کو موڑ کر بچی کو باہر نکالا۔

    لڑکی کو اس کے والد اور ہیڈ ماسٹر نے فوری طور پر علاج کے لیے ڈسٹرکٹ ہیڈ کوارٹر ہسپتال منتقل کیا، ڈاکٹروں کی جانب سے اس کے خطرے سے باہر ہونے کی تصدیق کے بعد اسے گھر واپس لایا گیا۔ ماس ایجوکیشن ڈیپارٹمنٹ نے یہ بھی واضح کیا کہ بچی اب صحت مند ہے۔

    تاہم اس واقعہ پر غم و غصے کے بعد محکمہ نے انچارج ہیڈ ماسٹر کو معطل کر دیا گیا۔ ڈسٹرکٹ ایجوکیشن آفیسر نے معاملے پر کیمرے پر بات کرنے سے گریز کیا۔

    بچی کی والدہ نے بتایا کہ جب میں رات 9 بجے کام سے گھر واپس آئی تو مجھے اپنی بیٹی نہیں ملی۔ میں نے کچھ گاؤں والوں سے پوچھا تو انہوں نے کہا کہ انہوں نے اسے نہیں دیکھا۔ میں نے سوچا کہ وہ کسی کے گھر سو گئی ہوگی اور صبح واپس آئے گی۔ جب وہ گھر واپس نہیں آئی تو ہم نے اسکول جا کر دیکھا تو وہ کلاس کی ریلنگ میں پھنسی ہوئی تھی۔

    امریکا، بھارتی طالبہ سڑک حادثے میں جان گنوا بیٹھی

    واقعے کے بارے میں ٹیچر نے بتایا کہ بہت زیادہ بارش ہو رہی تھی۔ بچی کلاس روم میں سو گئی تھی اور اسے دیکھنا ممکن نہیں ہوسکا کیونکہ وہ کلاس روم کے آخری بینچ کے نیچے سو رہی تھی۔

  • بارش سے متاثرہ اسکولوں کے حوالے سے محکمہ تعلیم کا بڑا فیصلہ

    بارش سے متاثرہ اسکولوں کے حوالے سے محکمہ تعلیم کا بڑا فیصلہ

    کراچی: محکمہ تعلیم سندھ کی جانب سے بارش سے متاثر ہونے والے اسکولوں میں تدریسی عمل روکنے کیلئے خط لکھا گیا ہے۔

    تفصیلات کے مطابق محکمہ تعلیم سندھ نے بارش سے متاثرہ اسکولوں سے متعلق کراچی، حیدرآباد، سکھر، میرپورخاص، شہید بینظیرآباد اور لاڑکانہ ڈویژن سے تفصیلات طلب کی گئی ہیں، محکمہ تعلیم نے خط میں لکھا کہ بارشوں سے اسکولوں کی عمارت کو کافی نقصان پہنچا ہے۔

    محکمہ تعلیم کی جانب سے ہدایت دی گئی کہ متاثرہ اسکولوں کی تفصیلات 7 روز میں جمع کرائیں، خستہ حال اسکولوں میں تدریسی عمل سے گریزکیا جائے۔

    خط میں کہا گیا کہ متعلقہ اضلاع کے ایگزیکٹیو انجینئرز، ڈسٹرکٹ ایجوکیشن افسران مشترکہ دورہ کریں، نقصان کی تفصیلی رپورٹ تیار کرکے حفاظتی انتظامات یقینی بنائیں۔

    محکمہ تعلیم نے کہا کہ متعلقہ اسکول ہیڈ ماسٹرز سے معاونت کرکے متبادل انتظامات کیے جائیں، گزشتہ سیلاب میں سندھ میں 20 ہزار اسکول متاثر ہوئے تھے۔

    https://urdu.arynews.tv/school-holidays-extention-reason/

  • طوفانی بارشوں کی پیشگوئی، اسکول ایک ہفتے کیلیے بند کردیے گئے

    طوفانی بارشوں کی پیشگوئی، اسکول ایک ہفتے کیلیے بند کردیے گئے

    پشاور: طوفانی بارشوں کی پیشگوئی کے پیش نظر تمام اسکولوں کو ایک ہفتے کیلئے بند کرنے کا اعلان کردیا گیا۔

    تفصیلات کے مطابق خیبرپختونخوا حکومت نے منگل کے روز صوبے کے سرد پہاڑی علاقوں میں تمام اسکول ایک ہفتے کیلئے بند کرنے کا اعلان کردیا ، یہ فیصلہ حالیہ کلاوڈ برسٹ، طوفانی بارشوں اور فلیش فلڈز  کے پیش نظر کیا گیا ہے۔

    صوبائی وزیر تعلیم فیصل خان تراکئی نے یہ اعلان کرتے ہوئے سماجی رابطے کی ویب سائٹ ایکس پر باضابطہ نوٹیفکیشن بھی جاری کیا۔ ان کا کہنا تھا کہ "سرد پہاڑی علاقوں کے تعلیمی ادارے 19 تا 25 اگست بند رہیں گے تاہم تعلیمی سرگرمیاں گھروں یا آن لائن جاری رہیں گی۔”

    حکام نے بتایا کہ ان بلند پہاڑی علاقوں میں موسم گرما کی تعطیلات عموماً ایک ماہ، یعنی یکم جولائی سے 31 جولائی تک ہوتی ہیں، تاہم رواں برس غیر معمولی بارشوں اور سیلابی صورتحال کے باعث مزید تعطیلات دینا ناگزیر ہو گیا۔

    ادھر سوات سمیت ملاکنڈ ڈویژن کے تمام اسکول بھی 19 اگست سے 25 اگست تک بند رہیں گے۔

    خیال رہے خیبرپختونخوا میں طوفانی بارشوں اور سیلابی ریلوں نے تباہی مچا دی ہے۔ ضلع صوابی کے ڈلورئی گاؤں میں پیر کے روز کلاوڈ برسٹ کے نتیجے میں متعدد مکان ملبے تلے دب گئے۔

    ڈسٹرکٹ حکام کے مطابق اب تک 13 لاشیں ملبے تلے سے نکالی جا چکی ہیں جبکہ ڈپٹی کمشنر صوابی کے مطابق ہلاکتوں کی مجموعی تعداد بڑھ کر 18 ہو گئی ہے جن میں خواتین اور بچے بھی شامل ہیں۔

    ڈی سی صوابی کے مطابق ریسکیو آپریشن تیزی سے جاری ہے جس میں سات ایکسکیویٹرز، چھ ایمبولینسز، دو ریسکیو گاڑیاں اور ریسکیو 1122 کا عملہ حصہ لے رہا ہے تاکہ ملبے تلے دبے افراد کو نکالا جا سکے۔

  • کراچی: ٹرک نے اسکول سے واپس آنیوالے موٹر سائیکل سوار باپ بیٹیوں کو کچل دیا

    کراچی: ٹرک نے اسکول سے واپس آنیوالے موٹر سائیکل سوار باپ بیٹیوں کو کچل دیا

    کراچی(7 اگست 2025): بلدیہ میں ٹرک نے اسکوال سے واپس آنیوالے موٹر سائیکل سوار باپ بیٹیوں کو کچل دیا جس کے نیتجے میں 8 سالہ طالبہ جاں بحق ہوگئی۔

    تفصیلات کے مطابق کراچی میں حادثات نہ رک سکے، ایک اور افسوس ناک حادثے میں ایک خاندان کی زندگی کا چراغ گل ہو گیا، یہ المناک حادثہ کراچی کے علاقے بلدیہ میں پیش آیا ہے جس کے نیتجے میں 8 سال کی طالبہ جاں بحق جبکہ باپ اور 2 بیٹیاں شدید زخمی ہوگئیں۔

    ریسیکیو ذرائع کا کہنا ہے کہ موٹر سائیکل پر سوار بچیوں کو والد اسکول سے گھر لیکر آرہا تھا کہ بلدیہ میں ٹرک اور موٹر سائیکل میں تصادم ہوا جس میں ایک 8 سال کی طالبہ جاں بحق  ہوگئی۔

    ریسکیو ذرائع کا بتانا ہے کہ حادثہ تیز رفتار ٹرک کی موٹرسائیکل کو ٹکر کے باعث پیش آیا، جاں بحق طالبہ اور زخمی باپ بیٹیوں کو سول اسپتال منتقل کیا جارہا ہے۔

    اس سے قبل کراچی کے پرانا گولیمار میں ایک ٹرک نے موٹر سائیکل سوار فیملی کو کچل دیا تھا، جس کے نتیجے میں ماں اور بیٹی جاں بحق ہوئی تھیں۔ یہ حادثہ سڑک پر موجود گڑھے کی وجہ سے پیش آیا تھا تاہم  ٹرک ڈرائیور کو حراست میں لے لیا گیا تھا۔

    https://urdu.arynews.tv/karachi-father-and-son-crushed-traffic-accident/

  • تعلیمی ادارے یکم اگست سے کھلیں گے یا نہیں؟ طلبا کے لئے اہم خبر آگئی

    تعلیمی ادارے یکم اگست سے کھلیں گے یا نہیں؟ طلبا کے لئے اہم خبر آگئی

    کراچی : تعلیمی ادارے یکم اگست سے کھلیں گے یا نہیں؟ اس حوالے سے طلبا کے لئے اہم خبر آگئی۔

    تفصیلات کے مطابق سندھ بھر میں 31 جولائی (جمعرات) کو تعلیمی ادارے کے لیے موسم گرما کی تعطیلات 2025 ختم ہونے والی ہیں۔

    صوبے میں یکم جون سے تمام نجی اور سرکاری اسکولوں میں موسم گرما کی تعطیلات شروع ہوئیں اور شیڈول کے مطابق اسکول یکم اگست کو دوبارہ کھلیں گے۔

    محکمہ تعلیم سندھ نے اس حوالے سے نوٹیفکیشن جاری کیا تھا جس میں کہا گیا تھا کہ تمام سرکاری اور نجی تعلیمی ادارے یکم جون سے 31 جولائی تک بند رہیں گے۔

    فی الحال، موسم گرما کی تعطیلات میں توسیع کا کوئی باضابطہ اعلان نہیں ہے تاہم یہ توقع ہے کہ یکم اگست کو اسکولوں میں کم حاضری ہوگی اور ہفتے کے اختتام کے بعد 4 اگست کو تعلیمی سرگرمیاں دوبارہ شروع ہونے کا امکان ہے۔

    تعلیم یافتہ مائیں ہی مستقبل کی معمار ہیں

    دوسری جانب صوبے میں جاری بارشوں کا موسم شدت اختیار کرنے پر حکومت تعطیلات میں توسیع کا جائزہ لے سکتی ہے۔

    تازہ ترین پیشن گوئی کے مطابق مون سون کرنٹ اس وقت سندھ اور ملک کے بالائی علاقوں میں داخل ہو رہا ہے اور بالائی اور وسطی علاقوں میں شدت آنے کا امکان ہے۔

    دریں اثنا، پنجاب میں موسم گرما کی تعطیلات 28 مئی سے شروع ہوئیں اور یہ 14 اگست کو ختم ہونے والی ہیں، تعلیمی ادارے 15 اگست سے دوبارہ سرگرمیاں شروع کر دیں گے۔

    اس سال پنجاب حکومت نے گرمی کی شدید لہر کے باعث موسم گرما کی چھٹیوں کا اعلان کیا تھا۔

  • کراچی کے دو ہونہار بچوں نے گھر کو ہی اسکول بنا لیا، دلچسپ رپورٹ

    کراچی کے دو ہونہار بچوں نے گھر کو ہی اسکول بنا لیا، دلچسپ رپورٹ

    اکراچی : شہر قائد کے دو بچوں نے اسکول جانے کے بجائے گھر میں ہی تعلیم حاصل کرکے نئی مثال قائم کردی، انہیں دیکھنے والے داد دیئے بغیر نہ رہ سکے۔ 

    اے آر وائی نیوز کراچی کی رپورٹ کے مطابق 8 سالہ حرا اور 9 سالہ ذیشان کے والد نے انہیں اسکول میں داخلے کے بجائے گھر میں ہی پڑھانے کو ترجیح دی۔

    اے آر وائی نیوز سے گفتگو کرتے ہوئے ان کا کہنا تھا کہ میں تو زیادہ تعلیم حاصل نہیں کرسکا لیکن میری پوری کوشش ہے کہ میرے بچے معیاری علم حاصل کریں خاص طور پر انگریزی سمیت مختلف زبانوں پر انہیں عبور حاصل ہو۔

    وہ بچے جو کبھی اسکول نہیں گئے لیکن گھر پر ہی تعلیم جاری رکھی، یہ دونوں بچے فراوانی سے صرف انگلش ہی بولتے بلکہ ریاضی سائنس اور تاریخ کی معلومات بھی انٹرنیٹ کے ذریعے سوشل میڈیا اور دیگر ذرائع سے حاصل کرتے ہیں۔

    حرا اور ذیشان کی تعلیم حاصل کرنے کی اس جدوجہد کو دیکھ کر یہ کہا جاسکتا ہے کہ گھر کی چار دیواری میں رہ کر بھی انسان کے خواب ضرور پورے ہوسکتے ہیں۔

    ان بچوں کے اس عمل سے یہ بات واضح ہوجاتی ہے کہ اگر ارادہ پختہ ہو تو کوئی بھی خواب کتابوں زمانوں اور دروازوں کا محتاج نہیں رہتا۔

  • کراچی، اسکول میں خواتین اساتذہ پر تشدد اور ہراسانی کا معاملہ، ایک ملزم گرفتار

    کراچی، اسکول میں خواتین اساتذہ پر تشدد اور ہراسانی کا معاملہ، ایک ملزم گرفتار

    کراچی کے نجی اسکول میں خواتین اساتذہ پر تشدد اور ہراسانی کے معاملے میں اہم پیش رفت سامنے آئی ہے، پولیس نے واقعے میں ملوث ایک ملزم کو گرفتار کرلیا ہے۔

    اے آر وائی نیوز کے مطابق پولیس حکام کا کہنا ہے کہ گرفتار شخص اسکول کی طالبہ کا والد اور مقدمے میں نامزد ہے، مقدمے میں نامزد پولیس اہلکار ہیڈ کانسٹیبل حفیظ تاحال گرفتار نہیں ہوسکا ہے۔

    پولیس حکام کے مطابق ہیڈ کانسٹیبل حفیظ فرانزک میں تعینات اور زیر تربیت ہے، پولیس اہلکار کے خلاف محکمہ جاتی کارروائی کا آغاز بھی کردیاگیا، گرفتاری کی کوششیں بھی جاری ہیں۔

    واضح رہے کہ گزشتہ روز پولیس اہلکار نے رشتے داروں کیساتھ ملکرنجی اسکول کی اساتذہ پر تشدد کیا تھا، جمشید کوارٹر پولیس نے گزشتہ روز واقعے کا مقدمہ درج کرلیا تھا۔

    مبینہ پولیس اہلکار عبدالحفیظ نے اپنی بچی کے معاملے پر اسکول میں داخل ہوکر ایک خاتون ٹیچر کو تھپڑ مارے تھے، ان کا نقاب پھاڑا اور بدترین تشدد کانشانہ بنایا تھا، واقعے کی ویڈیو بھی سامنے آگئی تھی۔

    کراچی کے نجی اسکول کی انتظامیہ نے خاتون ٹیچر پر تشدد کیخلاف قانونی کارروائی کے لئے پولیس کو درخواست جمع کرادی تھی، جس میں بتایا گیا تھا کہ اسکول طالبہ اپنی والدہ، والد اور ماموں کے ساتھ اسکول آئی، پولیس اہلکار عبدالحفیظ پستول کے زور پر زبردستی اسکول میں داخل ہوا۔

    درخواست کے مطابق پولیس اہلکار عبدالحفیظ نے اسکول کی دیگر ٹیچرز کو تشدد کا نشانہ بنایا، اسکول انتظامیہ نے پرامن طریقے سے اسے سمجھانے کی کوشش بھی کی مگر وہ نہ مانا۔

    درخواست ملنے کے بعد اعلیٰ پولیس افسران نے واقعے کا نوٹس لے کر معاملے کی تحقیقات کا آغاز کردیا تھا۔