Tag: اسکولوں

بلوچستان گرینڈ الائنس نے اپنے مطالبات منظور نہ کیے جانے پر صوبے کے تمام سرکاری دفاتر اور اسکولوں کو تالے لگا دیے ہیں۔

اے آر وائی نیوز کےمطابق بلوچستان گرینڈ الائنس کا بجٹ میں تنخواہوں میں شرح میں کم اضافے کے خلاف احتجاج جاری ہے۔ اس احتجاج کو وسیع کرتے ہوئے مظاہرین نے احتجاجاً تمام سرکاری دفاتر اور اسکولوں کو تالے لگا دیے ہیں اور حکومت کو مطالبات کی منظوری کے لیے 24 گھنٹے کا الٹی میٹم دیا ہے۔

چیئرمین بلوچستان گرینڈ الائنس عبدالقدوس کاکڑ نے کہا کہ بجٹ میں ہمارے تمام مطالبات کو نظر انداز کیا گیا۔ انہوں نے متنبہ کیا ہے کہ آج اور کل صوبے کے تمام سرکاری دفاتر کی تالا بندی ہوگی۔ پھر بھی مطالبات نہ مانے گئے تو احتجاجی تحریک شروع ہوگی۔

ان کا کہنا تھا کہ اتوار کو صوبے بھر کے سرکاری ملازمین کوئٹہ پہنچیں گے اور بلوچستان اسمبلی کے سامنے دھرنا دیں گے۔

دوسری جانب سرکاری دفاتر کی تالا بندی سے سائلین کو مشکلات کا سامنا کرنا پڑا بالخصوص دور دراز سے صوبائی دارالحکومت کوئٹہ آنے والے افراد رُل گئے۔

کراچی : وزیر تعلیم سندھ نے اسکولوں کیلئے مانیٹرنگ ایپ متعارف کرانے کا اعلان کرتے ہوئے کہا کہ اساتذہ موبائل فون کے ذریعے اپنی حاضری لگاسکیں گے۔

تفصیلات کے مطابق وزیرتعلیم نے ایجوکیشن سسٹم مکمل ڈیجیٹلائز کرنے کا فیصلہ کرتے ہوئے کہا کہ اسکولوں کیلئےمانیٹرنگ ایپ متعارف کرانے جارہےہیں، اساتذہ موبائل فون کے ذریعے اپنی حاضری لگاسکیں گے۔

ان کا کہنا تھا کہ ایسی ایپ بنائی ہےجواسکول کی حدود میں ہی کام کرے گی، استاد ایک تصویر کلاس میں موجود بچوں کی بھی لگائیں گے۔

وزیر نے مزید کہا کہ ایپ چہرے کی شناخت کی ٹیکنالوجی کا استعمال کرے گی تاکہ حاضری میں طلباء کی تعداد کا خود بخود پتہ لگایا جا سکے۔

خیال رہے سندھ میں میٹرک اور انٹر سرٹیفکیٹ کی تصدیق کا عمل آن لائن منتقل کیا جا رہا ہے، انٹر بورڈز کوآرڈینیشن کمیشن (آئی بی سی سی) کے جاری کردہ نوٹیفکیشن کے مطابق تصدیق کے لیے جمع کرائے گئے سرٹیفکیٹس پر مشتمل تمام سیل بند لفافے اب قبول نہیں کیے جائیں گے۔

اس کے بجائے تصدیق خصوصی طور پر آن لائن سسٹم کے ذریعے کی جائے گی۔

لاہور : شدید گرمی کے پیش نظر اسکولوں کو بچوں اور اساتذہ کے حوالے سے اہم ہدایات جاری کردی گئیں۔

تفصیلات کے مطابق شدید گرمی کے دوران اسکولوں کیلئے حفاظتی تدابیر کی ایڈوائزری جاری کردی گئی۔

محکمہ اسکول ایجوکیشن نے تمام سرکاری و نجی اسکولوں کوہدایات جاری کردیں، جس میں کہا ہے کہ بچوں اور اساتذہ کے لیے صاف، ٹھنڈے پانی کی فراہمی کو یقینی بنایا جائے۔

مراسلے میں کہا گیا کہ کلاسیں سایہ دار اور ہوادار جگہوں پر کروائی جائیں، پنکھے یا ٹھنڈک کے دیگر آلات درست حالت میں ہوں.

محکمہ اسکول ایجوکیشن کا کہنا تھا کہ دوپہر کے وقت بچوں کو آؤٹ ڈور سرگرمیوں سے روکا جائے اور عملے کو فوری طبی امداد دینے کی تربیت دی جائے۔

خیال رہے ملک بھرمیں گرمی کی شدت بڑھنے لگی۔ سندھ کے بعض علاقوں میں درجہ حرارت چالیس ڈگری سے اوپرپہنچ گیا۔

جنوبی پنجاب میں بھی گرمی کی شدت میں اضافہ ہوگیا۔ درجہ حرارت کہیں چالیس تو کہیں بیالیس سینٹی گریڈ پر پہنچ رہا ہے۔

ڈی جی خان، ملتان،سرگودھا میں چالیس اورلاہور میں سینتیس سینٹی گریڈ رہنے کا امکان ہے۔

لاہور : پاکستان سپر لیگ کے میچز کے دوران اسکولوں میں کب چھٹی ہوں گی؟ اس حوالے سے شیڈول جاری کردیا گیا۔

تفصیلات کے مطابق پاکستان سپر لیگ کرکٹ سیریز شروع ہونے والی ہے، جس کے پیش نظر اسکولوں کے اوقات کار میں تبدیلی کردی گئی اور نوٹیفیکیشن جاری کر دیا گیا۔

تبدیل شدہ تدریسی اوقات کا اطلاق قذافی اسٹیڈیم اور ملحقہ علاقوں میں قائم 50 تعلیمی اداروں پر ہوگا۔

پی ایس ایل میچز کی وجہ سے ان اسکولز کے اوقات تدریسی اب صبح 7 بجے سے 12 بجے تک ہوں گے، فیصلے کا اطلاق ایونٹ کے اختتام تک تمام سرکاری و نجی اسکولز پر ہوگا۔

گلبرگ، ماڈل ٹاؤن، اچھرہ، جیل روڈ، فیروز پور روڈ، شادمان، کینال روڈ، اپر مال اور ظہور الٰہی روڈ سمیت قذافی سٹیڈیم کے قریب کے علاقوں کے اسکولز شامل ہیں۔

اس تبدیلی سے متاثرہ علاقوں میں ٹریفک کی روانی کو یقینی بنانے میں مدد ملے گی۔

یاد رہے کہ لاہور میں پی ایس ایل کے میچز 24 اپریل سے 18 مئی تک مختلف دنوں میں کھیلے جائیں گے۔

محکمہ تعلیم نے گزشتہ روز مرد وخواتین اساتذہ کے لباس سے متعلق ضابطہ اخلاق جاری کیا تھا جس کی اب وضاحت کر دی گئی ہے۔

محکمہ تعلیم سندھ کی جانب سے گزشتہ روز مرد وخواتین اساتذہ کے لیے ایک ضابطہ اخلاق جاری کیا گیا تھا جس میں خواتین اساتذہ کو زیادہ میک اپ کرنے، زیادہ زیورات اور ہائی ہیل سینڈل پہننے سے گریز کرنے کا کہا گیا تھا۔

اسی طرح مرد اساتذہ کو اسکول میں جینز اور ٹی شرٹ پہن کر نہ آنے کا کہا گیا تھا۔
اب اس حوالے سے محکمہ تعلیم سندھ کی جانب سے وضاحت سامنے آ گئی ہے۔ اس میں کہا گیا ہے کہ اسکولوں میں کسی بھی لباس پر پابندی عائد نہیں کی گئی۔

ترجمان محکمہ تعلیم کے مطابق اساتذہ کے لیے گزشتہ روز جاری کیا گیا ضابطہ اخلاق کوئی حکم نامہ نہیں بلکہ رہنما اصول ہیں۔

محکمہ تعلیم کی جانب سے اپنے وضاحتی بیان میں کہا گیا ہے کہ ضابطہ اخلاق جاری کرنے کا مقصد معیاری تعلیم، تعلیمی ماحول کی بہتری اوروسائل کا درست استعمال ہے۔

مزید کہا گیا ہے کہ اساتذہ بچوں کے مستقبل کے معمار اور ان کی سماجی ونفسیاتی رہنمائی کرتے ہیں۔ جاری کیا گیا ضابطہ اخلاق اساتذہ تنظیموں، وکلا اور سول سوسائٹی کی مشاورت سے مرتب کیے گئے۔

محکمہ تعلیم کا کہنا ہے کہ اس ضابطہ اخلاق میں مرد وخواتین اساتذہ کو لباس اور طرزِ عمل سے متعلق صرف مشورے دیے گئے ہیں، نہ کہ کوئی سخت پابندیاں عائد کی گئی ہیں۔

ترجمان محکمہ تعلیم نے یہ بھی واضح کیا کہ اسکولوں میں گٹکا، ماوا، چھالیہ اور سگریٹ کے استعمال پر مکمل پابندی عائد کی گئی ہے تاکہ تعلیمی ماحول کو محفوظ رکھا جا سکے۔

https://urdu.arynews.tv/female-teachers-makeup-ban-code-of-conduct/