لاہور : وزیر تعلیم رانا سکندر حیات خان نے اسکولوں کی چھٹیوں میں اضافے کی وجہ بتادی،   چھٹیوں میں یکم ستمبر تک توسیع کی گئی ہے۔

تفصیلات کے مطابق حکومت پنجاب نے صوبہ بھر میں اسکولوں کی چھٹیوں میں یکم ستمبر تک توسیع کردی، وزیر تعلیم پنجاب رانا سکندر حیات خان نے چھٹیوں میں توسیع کی وجہ بتا دی۔

تفصیلات کے مطابق پنجاب کے وزیر تعلیم رانا سکندر حیات خان نے صوبے کے اسکولوں کی موسم گرما کی تعطیلات میں یکم ستمبر تک توسیع کی وجوہات بیان کر دیں۔

محکمہ تعلیم پنجاب نے گرمیوں کی چھٹیوں کو بڑھا کر یکم ستمبر تک کرنے کا اعلان صوبائی وزیر تعلیم کے سوشل میڈیا پیغام کے ذریعے کیا۔

رانا سکندر حیات کا کہنا تھا کہ یہ فیصلہ گرمی کی لہر کے پیش نظر بچوں کی صحت کے تحفظ کے لیے کیا گیا ہے۔

مزید پڑھیں : 31 اگست تک تعطیلات کا فیصلہ مسترد، اسکولوں کا اہم بیان سامنے آگیا

ان کا کہنا تھا کہ میں قبول کرتا ہوں کہ چھٹیوں میں اضافے سے بچوں کی تعلیم کا نقصان ہوگا تاہم ہمارے لیے بچوں کی صحت کو ترجیح دینا ضروری ہے۔

خیال رہے آل پاکستان پرائیویٹ اسکولز مینجمنٹ ایسوسی ایشن نے پنجاب میں گرمیوں کی تعطیلات میں 31 اگست تک توسیع کے حکومتی فیصلے کو غیر ضروری اور بلاجواز قرار دیا تھا۔

ایسوسی ایشن کے مرکزی صدر ابرار احمد خان نے اپنے بیان میں کہاتھا کہ "گرمیوں کی تعطیلات میں توسیع کا فیصلہ فوری طور پر واپس لیا جائے، کیونکہ اس سے طلبہ کا تعلیمی نقصان ہو رہا ہے، خاص طور پر میٹرک کی کلاسز بری طرح متاثر ہوں گی۔”

ابرار احمد خان کا کہنا تھا اسلام آباد میں نجی تعلیمی ادارے 4 اگست سے معمول کے مطابق کھل چکے ہیں جبکہ پاکستان کے دیگر صوبوں میں بھی اسکولز معمول کے مطابق تعلیمی سرگرمیوں کا آغاز کر چکے ہیں۔

واضح رہے کہ پنجاب کے اسکولوں میں موسم گرما کی تعطیلات 14 اگست تک رکھی گئی تھیں۔