ARYNews.tv | Urdu – Har Lamha Bakhabar

Tag: اسکول وین

  • اسکول وین کے نیچے آکر ڈیڑھ سالہ اریبہ جاں بحق

    اسکول وین کے نیچے آکر ڈیڑھ سالہ اریبہ جاں بحق

    بھارت میں ڈیڑھ سالہ معصوم بچی اریبہ اتفاقی طور پر اسکول وین کے نیچے آکر زندگی کی بازی ہار گئی۔

    غیر ملکی ذرائع ابلاغ کے مطابق تلنگانہ کے جگتیال ضلع میں اسکول وین کے نیچے آکر ڈیڑھ سالہ معصوم بچی اریبہ جاں بحق ہوگئی۔

    افسوسناک واقعہ تلنگانہ کے ضلع جگتیال کے ملیال منڈل کے مدھوٹلہ گاوں میں منگل کی صبح اُس وقت پیش آیا جب معصوم بچی پرائیویٹ اسکول وین کے نیچے اتفاقی طور پر آگئی۔

    رپورٹ کے مطابق بچی کی ماں اسے اسکول وین میں بٹھانے کے لئے پہنچی تھی، اریبہ وین کے پیچھے کھڑی تھی کہ اچانک اس کی زد میں آکر زندگی کی بازی ہار گئی۔

    پولیس نے موقع پر پہنچ کر لاش کو پوسٹ مارٹم کے لیے جگتیال کے سرکاری اسپتال منتقل کیا۔ جبکہ مقدمہ درج کرکے مزید تحقیقات کا آغاز کردیا گیا ہے۔

    دوسری جانب ٹیکساس میں ایک اور افسوسناک واقعے میں ایک تالاب سے ماں اور کمسن بیٹی کی لاشیں برآمد ہوئی ہیں۔

    اس حوالے سے رابنسن پولیس حکام کا کہنا ہے کہ ابتدائی طور پر ماں بیٹی کی لاشیں ملنے کا واقعہ ایک کار کا حادثہ معلوم ہوتا ہے تاہم مزید تفتیش کی جارہی ہے۔

    گزشتہ روز رابنسن پولیس ڈیپارٹمنٹ نے اتوار کو اپنے سوشل میڈیا اکاؤنٹ پر ایک پوسٹ کی جس میں 33 سالہ لارین بونویلین اور اس کی بیٹی4 سالہ سوانا باگلی کو تلاش کرنے میں مدد کی درخواست کی گئی تھی۔

    مبینہ طور پر ان دونوں ماں بیٹی کو آخری بار 14 اپریل کو کورسیکا کے علاقے سے رابنسن کی طرف جاتے ہوئے دیکھا گیا تھا۔

    ’باپ 5 سال تک کمسن بیٹیوں کو زیادتی کا نشانہ بناتا رہا‘

    بعد ازاں ہل کاؤنٹی پولیس نے تصدیق کی کہ الرٹ جاری کرنے کے بعد ایک گاڑی میں ماں بیٹی مردہ پائے گئے، حکام نے بتایا کہ انہیں شبہ ہے کہ بونویلین کی گاڑی ہائی وے سے ہٹ کر حادثاتی طور پر ایک تالاب میں جا گری جس سے وہ دونوں اندر پھنس کر ہلاک ہوگئے۔

  • اسکول وین اور ٹریکٹر ٹرالی میں خوفناک تصادم، 4 بچے جاں بحق ، درجن سے زائد زخمی

    اسکول وین اور ٹریکٹر ٹرالی میں خوفناک تصادم، 4 بچے جاں بحق ، درجن سے زائد زخمی

    پیر محل: اسکول وین کی ٹریکٹر ٹرالی کے تصادم کے نتیجے میں 4بچے جاں بحق ہو گئے جبکہ درجن سے زائد بچے زخمی ہو گئے ہیں۔

    تفصیلات کے مطابق ٹوبہ ٹیک سنگھ کی تحصیل پیرمحل میں شورکوٹ روڈ پر موٹر وے پل کے قریب اسکول وین ٹریکٹر ٹرالی سے ٹکرا گئی، حادثے میں 4 بچے جاں بحق ہو گئے جبکہ درجن سے زائد بچے زخمی ہو گئے ہیں۔

    ریسکیو 1122 نے زخمیوں اور لاشوں کو ہسپتال منتقل کر دیا ہے، ذرائع نے بتایا کہ اسکول وین مختلف دیہات سے بچوں کو لے کر پیرمحل کی طرف آ رہی تھی کہ موٹر وے پل کے قریب ٹریکٹر ٹرالی نے ٹکرا گئی۔

    اسکول وین ٹریکٹر ٹرالی سے ٹکرانے کے بعد الٹ گئی، جس سے 3بچے موقع پر ہی جاں بحق ہو گئے۔

    ریسکیو نے موقع پر پہنچ کر زخمیوں اور لاشوں کو ٹی ایچ کیو اسپتال منتقل کر دیا، جہاں تشویشناک حالت کے باعث 4بچوں کو ڈی ایچ کیو ریفر کر دیا گیا ہے جبکہ جہاں ایک اور بچہ زخموں کی تاب نہ لاتے ہوئے جاں بحق ہوگیا۔

    اطلاع ملتے ہی شہریوں کی بڑی تعداد بھی اسپتال پہنچ گئی جبکہ ٹریکٹر ٹرالی ڈرائیور موقع سے فرار ہو گیا۔

    باقی زخمی بچوں کی حالت تسلی بخش بتائی جا رہی ہے تاہم جاں بحق ہونیوالوں میں 4سالہ معیز 4سالہ احمد اور 14سالہ بچی حسنہ شامل ہیں۔

    ایم ایس نے بتایا کہ اسکول وین حادثے میں 14افرادکو ٹی ایچ کیو لایا گیا، زخمیوں اورلاشوں کی ابتدائی رپورٹ اعلیٰ افسران کوبھجوادی گئی، رپورٹ کےمطابق 7زخمیوں کو طبی امداد کے بعد گھر بھیج دیا گیا جبکہ 3 شدید زخمیوں کو ڈی ایچ کیو ٹوبہ ٹیک سنگھ ریفر کیا گیا، اور ایک زخمی کو ٹی ایچ کیو اسپتال میں داخل کیا گیا ہے۔

    طالب علم کا کہنا تھا کہ حادثے کی شکار اسکول وین میں 18 بچے سوار تھے۔

  • راولپنڈی : بچوں کی اسکول وین پر نامعلوم افراد کی فائرنگ ، ڈرائیور زخمی

    راولپنڈی : بچوں کی اسکول وین پر نامعلوم افراد کی فائرنگ ، ڈرائیور زخمی

    راولپنڈی : بچوں کی اسکول وین پر نامعلوم افراد کی فائرنگ سے ڈرائیور زخمی ہوگیا، تاہم گاڑی میں سوار بچے محفوظ رہے۔

    تفصیلات کے مطابق راولپنڈی میں اڈیالہ روڈ ڈھوک راجگان میں نامعلوم ملزمان کی جانب سے بچوں کی اسکول وین پر فائرنگ کی گئی ،فائرنگ سے اسکول وین کا ڈرائیور شدیدزخمی ہوگیا جبکہ وین میں سوار بچے محفوظ رہے۔

    پولیس کا کہنا ہے کہ ملزمان فائرنگ کے بعد موقع سے فرار ہوگئے، فائرنگ سے زخمی ہونے والے ڈرائیور کو پیٹ میں چار گولیاں لگیں جسے تشویشناک حالت میں ڈسٹرکٹ ہیڈ کوارٹرز اسپتال منتقل کردیا گیا ہے۔

    پولیس کے مطابق ابتدائی طور پر معاملہ ذاتی دشمنی کا معلوم ہوتا ہے، سی سی ٹی وی فوٹیج سے بھی مدد لی جارہی ہے۔

    آئی جی پنجاب نے راولپنڈی میں اسکول وین پرفائرنگ کا نوٹس لیتے ہوئے آر پی او راولپنڈی سے واقعےکی رپورٹ طلب کرلی اور ملزمان کو جلد گرفتار کرکے سخت قانونی کارروائی کا حکم دے دیا۔

  • راولاکوٹ میں اسکول وین کو خوف ناک حادثہ، 3 بچے جاں بحق

    راولاکوٹ میں اسکول وین کو خوف ناک حادثہ، 3 بچے جاں بحق

    آزاد کشمیر: ضلع پونچھ کے شہر راولاکوٹ میں ایک اسکول وین کھائی میں گر گئی، حادثے میں 3 بچے جاں بحق ہو گئے ہیں۔

    تفصیلات کے مطابق راولاکوٹ میں کھائیگلہ کے قریب تولی پیر روڈ پر اسکول وین کھائی میں گرنے سے 3 بچے جاں بحق، جب کہ 15 زخمی ہو گئے۔

    زخمی بچوں کو طبی امداد کے لیے شیخ زید راولاکوٹ اسپتال منتقل کر دیا گیا ہے۔

    عینی شاہدین کا کہنا ہے کہ ہائی ایس اسکول وین ایک لوڈ ٹرک سے ٹکرا گئی تھی، جس کے باعث وہ کھائی میں جا گری۔

    اطلاعات کے مطابق وین میں 30 کے قریب طلبہ طالبات سوار تھے، حادثے میں کئی بچے شدید زخمی ہو گئے ہیں۔

  • اسکول وین میں اچانک آگ بھڑک اٹھی، 4 بچے جھلس کر ہلاک

    اسکول وین میں اچانک آگ بھڑک اٹھی، 4 بچے جھلس کر ہلاک

    نئی دہلی: بھارت میں ہولناک حادثے کے نتیجے میں اسکول کے 4 بچے جھلس کر ہلاک ہوگئے۔

    بھارتی میڈیا کی رپورٹ کے مطابق ریاست پنجاب کے علاقے سنگرر میں اسکول وین اچانک آگ میں لپیٹ میں آگئی، جس کے نتیجے میں چار بچے زندہ جھلس کر ہلاک ہوگئے۔ گاڑی میں 12 طالب علم سوار تھے۔

    پولیس کا کہنا ہے کہ اس خطرناک حادثے کی وجہ تاحال واضح نہیں ہوسکی تاہم یہ خیال کیا جارہا ہے کہ گاڑی میں آگ شارٹ سرکٹ یا پھر گیس سیلنڈر پھٹنے کے باعث لگی ہوگی، البتہ اس ضمن میں تحقیقات جاری ہے۔

    پولیس کے مطابق اس واقعے میں بچوں کو بچانے کے چکر میں گاڑی کا ڈرائیور بھی زخمی ہوا، ہلاک ہونے والے بچوں میں ایک تین سالہ طالبہ بھی شامل ہے۔ ڈرائیور کی شناخت دلبر سنگھ کے نام سے ہوئی۔

    بھارتی پولیس نے بتایا کہ یہ واقعہ اسکول اوقات کے بعد پیش آیا جب وین ڈرائیور بچوں کو چھوڑنے ان کے گھر جارہا تھا۔ اسکول وین میں سوار بچوں کی عمریں تین سے 12 سال کے درمیان تھیں۔ اس واقعے میں 8 بچے شدید زخمی بھی ہوئے ہیں۔ جان لیوا حادثے کے بعد اسکول انتظامیہ کے خلاف ایف آئی آر درج کرلیا گیا ہے۔

  • کراچی‌ میں اسکول وین میں آگ لگ گئی، معجزانہ طور پر بچے محفوظ

    کراچی‌ میں اسکول وین میں آگ لگ گئی، معجزانہ طور پر بچے محفوظ

    کراچی: شہر قائد کے علاقے کورنگی زمان ٹاؤن کلوچوک کےقریب اسکول وین میں آگ لگ گئی، واقعے میں معجزانہ طور پر بچےمحفوظ رہے جبکہ ایک بچی اورڈرائیورزخمی ہوگئے۔

    تفصیلات کے مطابق کراچی میں اسکول وین بچوں کے لئے خطرہ بننےلگیں، وین ڈرائیورزکی لاپرواہی سے بچوں کی جانیں داؤ پر لگ گئی ہیں، کراچی میں ایک ماہ میں اسکول وین میں آگ لگنے کا دوسرا واقعہ پیش آیا، کورنگی واقعے میں معجزانہ طور پر بچےمحفوظ رہے۔

    ایس ایس پی کورنگی کا کہنا تھا کورنگی زمان ٹاؤن نمبر4 کلو چوک پر اسکول وین میں آگ بھڑک اٹھی، جس سے ایک بچی اورڈرائیور زخمی ہوگئے، وین میں سوار دیگر تمام بچے محفوظ ہیں۔

    قریب موجودشہریوں نے بروقت مدد کرکے بچوں کی جان بچائی، شہری پانی کی بالٹی بھر بھر کر لاتے رہے اور آگ بجھاتےرہے جبکہ حادثےکے وقت وین میں مقررہ تعداد سے زائد بچے سوار تھے۔

    پولیس کےمطابق آگ لگتےہی پولیس کی جانب سےفوری رسپانس دیاگیا، وین میں دس بچے سوار تھے، ڈرے سہمے بچوں کو بحفاظت گھر پہنچا دیاگیا تاہم آگ لگنےسےمتعدد بچوں کےاسکول بیگ جل گئے جبکہ حادثے کا شکار ہونے والی وین کو تھانے منتقل کردیا ہے۔

    ٹریفک پولیس اہلکار کا کہنا ہے کہ جس اسکول وین کو آگ لگی وہ سی این جی نہیں پیٹرول پر تھی ،واقعہ شارٹ سرکٹ کے باعث پیش آیا۔

    مزید پڑھیں : کراچی: اسکول وین میں آگ لگ گئی، 14 بچے جھلس کر زخمی

    یاد رہے 6  جنوری کو کراچی کے علاقے اورنگی ٹاؤن میں ایک نجی اسکول کے وین میں اچانک آگ بھڑک اٹھی تھی، جس کے باعث 14 بچے جھلس کر زخمی ہوگئے تھے۔

    بعد ازاں پولیس نے وین ڈرائیور رشید کو سہراب گوٹھ کے علاقے سے گرفتار کر کے زخمی طالب علم کے والد کی مدعیت میں غفلت، لاپرواہی کی دفعات کے تحت مقدمہ درج کیا تھا۔

    خیال رہے اسکول کی گاڑیوں میں سی این جی اور ایل پی جی سلنڈر لگانے پر پابندی ہے اور سپریم کورٹ آف پاکستان کے حکم پر اسکول وین میں سلینڈر استعمال کرنے کیخلاف کریک ڈاون کا سلسلہ جاری ہے۔

    کریک ڈاون کے باعث  اسکول وینز مالکان نے ہٹ دھرمی کا مظاہرہ کرتے ہوئے ہڑتال کردی  تھی، مالکان کا کہنا تھا کہ بچوں کی جان داؤ پرلگائیں گے،سی این جی سلنڈرزنہیں ہٹائیں گے جبکہ والدین نے  حکومت سے وین ڈرائیورز کے خلاف ایکشن لینے کامطالبہ کیا تھا۔

  • کراچی: اسکول وین میں آگ لگنے کے واقعے کا مقدمہ درج

    کراچی: اسکول وین میں آگ لگنے کے واقعے کا مقدمہ درج

    کراچی: شہرِ قائد کے علاقے اورنگی ٹاؤن میں اسکول وین میں آگ لگنے کے واقعے کا مقدمہ ایک متاثرہ بچے کے والد کی مدعیت میں درج کر لیا گیا۔

    تفصیلات کے مطابق گزشتہ روز کراچی کے علاقے اورنگی ٹاؤن میں ایک نجی اسکول کے وین میں اچانک آگ بھڑک اٹھی تھی جس کے باعث 14 بچے جھلس کر زخمی ہوگئے تھے۔

    [bs-quote quote=”مقدمے میں وین ڈرائیور کے خلاف غفلت اور لا پروائی کی دفعات لگائی گئیں۔” style=”style-7″ align=”left” color=”#dd3333″][/bs-quote]

    اسکول وین میں آتش زدگی کے مقدمے میں وین کے ڈرائیور رشید کو نامزد کیا گیا ہے، مقدمے میں غفلت اور لا پروائی کی دفعات لگائی گئیں۔

    ادھر محکمہ ٹرانسپورٹ نے سندھ کے تعلیمی اداروں کی اسکول وینز کو کمرشل کرنے کا فیصلہ کر لیا ہے، سیکریٹری ٹرانسپورٹ کا کہنا ہے کہ تعلیمی اداروں کی گاڑیاں پرائیویٹ ہیں۔

    سیکریٹری ٹرانسپورٹ نے بتایا کہ اسکول وینز کا کوئی ڈیٹا موجود نہیں ہے، اسکول گاڑیوں کو کمرشل کرانے کے قانون پر سختی سے عمل کرایا جائے گا۔

    واضح رہے کہ وین میں جھلس کر زخمی ہونے والے بچوں کو فوری طور پر اسپتال منتقل کر دیا گیا تھا، جہاں ڈاکٹروں نے ان کی حالت خطرے سے باہر قرار دی۔

    یہ بھی پڑھیں:  کراچی: اسکول وین میں آگ لگ گئی، 14 بچے جھلس کر زخمی

    عینی شاہدین کے مطابق گاڑی ریت میں پھنس کر رک گئی تھی، ڈرائیور اور کچھ بچوں نے نیچے اتر کر گاڑی کو دھکا لگایا، اسی دوران ڈرائیور کے ساتھ والی سیٹ سے چنگاریاں نکلیں اور آگ بھڑک اٹھی۔

    پولیس کا کہنا تھا کہ وین میں آگ شارٹ سرکٹ کے باعث لگی، وین میں سلنڈر ٹھیک حالت میں موجود تھا، فائر بریگیڈ کی گاڑی نے موقع پر پہنچ کر آگ پر قابو پایا۔

  • کراچی: اسکول وین میں آگ لگ گئی، 14 بچے جھلس کر زخمی

    کراچی: اسکول وین میں آگ لگ گئی، 14 بچے جھلس کر زخمی

    کراچی: صوبہ سندھ کے دارالحکومت کراچی میں اسکول وین میں اچانک آگ بھڑک اٹھی، حادثے میں وین میں سوار 14 بچے جھلس کر زخمی ہوگئے۔

    تفصیلات کے مطابق واقعہ کراچی کے علاقے اورنگی ٹاؤن میں پیش آیا جہاں نجی اسکول کی وین میں آگ لگ گئی۔

    عینی شاہدین کے مطابق بچے ناظم آباد کے نجی اسکول میں پڑھتے ہیں، آگ لگنے سے پہلے گاڑی اچانک ریت میں پھنس کر رک گئی تھی۔

    عینی شاہدین کا کہنا ہے کہ گاڑی رکنے کے بعد ڈرائیور اور کچھ بچوں نے نیچے اتر کر گاڑی کو دھکا لگایا، اسی دوران ڈرائیور کے ساتھ والی سیٹ سے چنگاریاں نکلیں اور آگ بھڑک اٹھی۔

    افسوسناک واقعے میں وین میں موجود تمام 14 بچے جھلس کر زخمی ہوگئے۔ زخمی بچوں کو فوری طور پر اسپتال منتقل کر دیا گیا۔

    پولیس کا کہنا ہے کہ وین میں آگ شارٹ سرکٹ کے باعث لگی، وین میں سلنڈر ٹھیک حالت میں موجود ہے۔ فائر بریگیڈ کی گاڑی نے آگ پر قابو پالیا ہے۔

    دوسری جانب سول اسپتال کے انچارج برنس وارڈ ڈاکٹر احمر کا کہنا ہے کہ جھلسنے والے 5 بچے سول اسپتال کے برنس وارڈ لائے گئے، 3 بچوں کو فوری طبی امداد کے بعد گھر بھیج دیا گیا۔

    انچارج کے مطابق برنس وارڈ میں موجود دونوں بچوں کی حالت خطرے سے باہر ہے۔

    وزیر تعلیم کا نوٹس

    وزیر تعلیم سندھ سردار شاہ نے اسکول وین میں آگ لگنے کا نوٹس لیتے ہوئے ڈائریکٹر پرائیوٹ اسکولز کو فوری طور پر زخمی بچوں کی عیادت کی ہدایت کردی۔

    وزیر تعلیم نے سیکریٹری اسکولز سے رپورٹ بھی طلب کرلی۔ انہوں نے کہا کہ اسکول وین میں آگ لگنے کی انکوائری کروائی جائے۔

  • نارووال: اسکول وین ٹرین کی زد میں آگئی، متعدد بچے زخمی

    نارووال: اسکول وین ٹرین کی زد میں آگئی، متعدد بچے زخمی

    نارووال: صوبہ پنجاب کے شہر نارووال میں پھاٹک عبور کرتے ہوئے اسکول وین ٹرین کی زد میں آگئی جس سے متعدد بچے زخمی ہوگئے۔

    تفصیلات کے واقعہ تیجو والی اسٹیشن کے قریب پیش آیا جس میں پھاٹک عبور کرتے ہوئے اسکول وین لاثانی ایکسپریس کی زد میں آگئی۔

    ریسکیو ذرائع کے مطابق حادثے میں متعدد بچے زخمی ہوئے ہیں جنہیں فوری طور پر اسپتال منتقل کر دیا گیا ہے۔ زخمی بچوں میں سے ایک کی حالت تشویشناک ہے۔

    خیال رہے کہ صرف 2 ماہ قبل ہی سرگودھا میں تیز رفتار بس اور اسکول وین میں تصادم کے نتیجے میں 5 طالبات اور وین ڈرائیور سمیت 7 افراد جاں بحق ہوگئے تھے۔

    پولیس کا کہنا تھا کہ حادثہ تیز رفتاری کے باعث پییش آیا، حادثہ اس قدر شدید تھا کہ متعدد طالبات کو وین کاٹ کر نکالنا پڑا۔

    حادثے کے بعد مشتعل افراد نے بس کو آگ لگا دی تاہم بس ڈرائیور موقع سے فرار ہونے میں کامیاب رہا۔

  • سرگودھا: بس اور اسکول وین میں تصادم‘ 7 افراد جاں بحق

    سرگودھا: بس اور اسکول وین میں تصادم‘ 7 افراد جاں بحق

    سرگودھا : صوبہ پنجاب کے شہرسرگودھا میں تیزرفتار بس اور اسکول وین میں تصادم کے نتیجے میں 5 طالبات اور ڈرائیور سمیت 7 افراد جاں بحق ہوگئے۔

    تفصیلات کے مطابق سرگودھا کی تحصیل بھلوال میں اسکول وین طالبات کو لے کر جا رہی تھی کہ سالم انٹرچینج کے قریب تیز رفتار بس سے ٹکرا گئی۔

    افسوس ناک حادثے کے نتیجے میں 5 طالبات اور وین ڈرائیورسمیت 7 افراد جان کی بازی ہار گئے۔

    حادثے کی اطلاع ملتے ہی پولیس اور ریسکیو ٹیمیں جائے وقوعہ پرپہنچیں اور زخمی ہونے والی طالبات کو ٹی ایچ کیو بھلوال پہنچا دیا گیا جہاں انہیں طبی امداد دی جا رہی ہے۔

    پولیس حکام کا کہنا ہے کہ حادثے کے فوری بعد مشتعل افراد نے بس کو آگ لگا دی تاہم بس ڈرائیور موقع سے فرار ہونے میں کامیاب ہوگیا۔

    پولیس کا کہنا ہے کہ حادثہ تیزرفتاری کے باعث پیش آیا، حادثہ اس قدر شدید تھا کہ متعدد طالبات کو وین کاٹ کر نکالنا پڑا۔

    پولیس نے حادثے کی تحقیقات شروع کردی ہیں اور بس اور وین کو قبضے میں لے لیا ہے۔

    ڈسکہ میں مسافر بس واٹر ٹینکرسے ٹکرا گئی‘ درجنوں افراد زخمی

    واضح رہے کہ صوبہ پنجاب کےعلاقے ڈسکہ میں تیز رفتارمسافربس واٹرٹینکر سے ٹکرا گئی تھی جس کے نتیجے میں 40 سے زائد افراد زخمی ہوگئے تھے۔