اسلام آباد : افغان صدر اشرف غنی نے وزیراعظم نواز شریف کو ٹیلیفون کرکے باہمی دلچسپی کے امور اور دوطرفہ تعلقات پر بات چیت کی۔
وزیراعظم نواز شریف نے افغان صدر اشرف غنی سے افغانستان میں حالیہ دھماکوں کی مذمت کی اور دھماکے کے باعث انسانی جانوں کے ضیاع پر دکھ اور افسوس کا اظہار کیا ۔
دونوں رہنماؤں کے درمیان بات چیت دس منٹ تک جاری رہی۔دونوں رہنماؤں نے طالبان اور افغان حکومت کے درمیان مفاہمت پر بھی بات چیت کی۔ اس دوران خطے کی مجموعی صورتحال پر بھی تبادلہ خیال کیا گیا۔
واشنگٹن: امریکی صدر باراک اوباما کی دعوت پر افغان صدر اشرف غنی اور چیف ایگزیکٹو عبداللہ عبداللہ چوبیس مارچ کو واشنگٹن کا دورہ کریں گے۔
امریکی میڈیا رپورٹ کے مطابق امریکی صدر باراک اوباما نے افغان صدراشرف غنی اور چیف ایگزیکٹوعبداللہ عبداللہ کو امریکہ کے دورے کی دعوت دی ہے، جسے قبول کرتے ہوئے افغان صدر اور چیف ایگزیکٹو ایک بڑے وفد کے ہمراہ چوبیس مارچ سے امریکہ کا دورہ کریں گے۔
جس میں باہمی دلچسپی کے امورسمیت افغان امریکہ اسٹریٹیجک ڈائیلاگ کا دور بھی شامل ہوگا، جس میں امریکی وفد کی سربراہی وزیرِ خارجہ جاری کیر ی کریں گے۔
امید کی جارہی ہے کہ اس ملاقات میں امریکی صدر باراک اوباما افغانستان سے امریکی فوج کے فوری انخلاء کو موخر کرنے کا اعلان بھی کریں گے۔
لندن:وزیراعظم نواز شریف ، افغان صدر اشرف غنی اور برطانوی وزیراعظم ڈیوڈ کیمرون کے درمیان لندن میں ملاقات کے دوران افغانستان سمیت خطے کی صورت حال پر تبادلہ خیال کیا گیا۔
وزیراعظم نواز شریف اور افغان صدر اشرف غنی برطانوی وزیراعظم کی ٹین ڈاؤننگ اسٹریٹ پر واقع رہائش گاہ پہنچے، جہاں ڈیوڈ کیمرون نے ان کا استقبال کیا۔
تینوں رہنماؤں کی ناشتے کےمیز پر ملاقات ہوئی۔ ملاقات کے دوران دوطرفہ تعلقات اور خطے کی صورت حال پربات چیت ہوئی۔ ملاقات میں باہمی دلچسپی،خطے کی سیکیورٹی اوردوطرفہ امو رپربھی تبادلہ خیال کیا گیا۔
افغانستان کے چیف ایگزیکٹو عبداللہ عبداللہ بھی ملاقات میں شریک تھے۔ وزیراعظم نواز شریف اورافغان صدراشرف غنی ان دنوں برطانیہ میں افغانستان سے متعلق منعقدہ کانفرنس میں شرکت کے لئے لندن میں موجود ہیں۔
کابل :اشرف غنی نے افغانستان کے نئے صدر اورعبداللہ عبداللہ نے چیف ایگزیکٹو کا حلف اٹھالیا ہے، تقریبِ حلف برداری دارالحکومت کابل میں صدارتی محل میں ہوئی، صدر ممنون حسین نے تقریب میں پاکستان کی نمائندگی کی۔
افغانستان کے دارالحکومت کابل کے صدارتی محل میں نئے صدر کی تقریب حلف برداری ہوئی، جس میں صدرممنون حسین سمیت دوسو اہم شخصیات نے شرکت کی، حلف برداری سے قبل سبکدوش ہونے والے صدر حامد کرزئی کو الوداعی گارڈ آف آنر پیش کیا گیا، افغانستان کے چیف جسٹس نے حلف لیا۔
اشرف غنی نے صدرجبکہ عبداللہ عبداللہ نے چیف ایگزیکٹو کے عہدے کا حلف اٹھایا ہے ۔
حامدکرزئی نے الوداعی خطاب میں کہا کہ پُرامن انتقالِ اقتداراطمینان کی بات ہے، بیرونی مداخلت نہ ہوتو افغانستان کے حالات بہتر ہوسکتے ہیں، عوام امن واستحکام کے لئے نئی حکومت کا ساتھ دیں۔ انہوں نے افغانستان کی مدد کرنے والے ملکوں کا شکریہ ادا کیا۔
حلف برداری کی تقریب میں اسفند یار ولی، محمود اچکزئی اور آفتاب شیرپاؤ نے بھی شرکت کی، اس موقع پر کابل میں سیکورٹٰی کے سخت انتظامات کئے گئے تھے اور شہر کے داخلی اور خارجی راستوں کو سیل کردیا گیا تھا۔
کابل: افغانستان میں صدارتی منصب کیلئے لڑائی پانچ ماہ بعد ختم ہوگئی ۔اشرف غنی اور عبداللہ عبداللہ کے درمیان شراکتِ اقتدار کامعاہدہ طے پا گیا، اشرف غنی صدر اور عبداللہ عبداللہ چیف ایگزیکٹو ہونگے۔
افغانستان کے قصر صدارت پر کون بیٹھے بالاخر پانچ ماہ بعد فیصلہ ہو ہی گیا ہے، امریکا کی افغانستان میں مخلوط حکومت کی خواہش پوری ہوئی اور صدارتی کرسی کی لڑائی کا اختتام ایک معاہدے پر ہوگیا ہے، افغانستان کی صدارت کے خواہشمند دونوں امیدواروں نے شراکتِ اقتدار کے معاہدے پر دستخط کردیئے ہیں ۔
معاہدے کے تحت افغانستان میں صدر حامد کرزئی کی کرسی اشرف غنی سنبھالیں گے جبکہ عبداللہ عبداللہ چیف ایگزیکٹو ہوں گے، جن کا عہدہ وزیراعظم کے برابر ہوگا۔
واضح رہے اس سے پہلے دونوں امیدواروں نے ایک دوسرے پر انتخابات میں دھاندلی کے الزامات لگائے تھے۔
