کراچی: ایران میں پھنسے پاکستانی اشک آباد سے اسلام آباد پہنچ گئے ہیں۔
تفصیلات کے مطابق پاکستانیوں کو لے کر قومی ایئر لائن کی خصوصی پرواز ترکمان کے شہر اشک آباد سے اسلام آباد پہنچ گئی، پی آئی اے کی خصوصی پرواز سے 107 پاکستانی وطن پہنچے ہیں۔
ایرانی فضائی حدود کی بندش پر پاکستانی شہری زمینی راستے سے اشک آباد منتقل کیے گئے تھے، اس سلسلے میں ایرانی و ترکمان حکام سے رابطے میں رہ کر پاکستانی سفارتخانوں نے کلیدی کردار ادا کیا۔
پھنسے پاکستانیوں کو واپس لانے کے لیے پی آئی اے کی خصوصی پرواز حکومت پاکستان کی ہدایت پر بھیجی گئی تھی، مسافروں نے بر وقت اقدام پر حکومت اور پی آئی اے کا شکریہ ادا کیا۔
امریکا نے اپنے شہریوں کو ایران جانے سے روک دیا
واضح رہے کہ پاکستان اور برطانیہ نے خطے میں امن کے لیے سفارتی کوششیں جاری رکھنے پر اتفاق کیا ہے، وزیر خارجہ اسحاق ڈار نے برطانوی ہم منصب سے رابطہ کر کے خطے کی بگڑتی سیکیورٹی صورت حال پر تشویش کا اظہار کیا، اسحاق ڈار نے کہا اسرائیل کے ایران پر بلاجواز حملوں سے علاقائی و عالمی امن کو شدید خطرات لاحق ہیں۔
وزیر خارجہ اسحاق ڈار نے اماراتی ہم منصب کو ٹیلی فون کر کے اس مسئلے پر بات چیت کی، پاکستان اور متحدہ عرب امارات نے قیام امن کے لیے سفارتی کوششوں کی حمایت پر اتفاق کیا۔
خیال رہے کہ ایران اسرائیل جنگ آج چھٹے روز میں داخل ہو گئی ہے، ایران نے رات گئے تل ابیب پر میزائلوں سے بڑا حملہ کیا، اسرائیل کا آئرن ڈوم ایرانی میزائلوں کو روکنے میں ناکام ہو گیا، تل ابیب میں مسلسل سائرن بجنے لگے، اسرائیلی حکام نے شہریوں کو بنکر میں جانے کی ہدایت جاری کی، ایرانی میڈیا کے مطابق میزائلوں نے اسرائیلی فوجی اڈوں کو نشانہ بنایا۔
