Tag: اشیائے خورونوش

اسلام آباد: صدر آل پاکستان انجمن تاجران اجمل بلوچ نے کہا ہے کہ ملک بھرمیں سامان کی ترسیل رک چکی، اشیائے خورونوش کی قلت کا خدشہ ہے۔

تفصیلات کے مطابق آل پاکستان انجمن تاجران کے صدر کا کہنا تھا کہ ملک بھرمیں سامان کی ترسیل کرنے والے کنٹینرز سڑکوں پر پڑے ہیں، میڈیکل اسٹورز پر دواؤں کا پہنچنانا، مریضوں کی اسپتالوں تک رسائی ناممکن ہوچکی ہے۔

اجمل بلوچ نے کہا کہ خدارا ملک میں سیاسی افراتفری کا سیاسی حل نکالا جائے، اس وقت ملک بھر میں افراتفری کا عالم ہے عوام پریشان ہیں، راستوں کی بندش سے صنعتیں بند ہوگئی ہیں۔

انھوں نے کہا کہ ایمبولینس میں لوگ مررہے ہیں انھیں بھی راستہ نہیں دیا جارہا، ملک بھر کی سبزی منڈیاں بند پڑی ہیں، دودھ کی سپلائی بند ہوچکی ہے۔

صدر آل پاکستان انجمن تاجران کا مزید کہنا تھا کہ پھل اور سبزیاں راستوں میں گل سڑرہی ہیں، شہری اپنے شہروں میں محصور ہوگئے ہیں، اپیل کرتا ہوں اگر ملک چلانا ہے تو کوئی حل نکالا جائے۔

اجمل بلوچ نے کہا کہ دہاڑی دار طبقے کیلئے روٹی کا حصول مشکل ہوچکا ہے، کاروباری پہیہ بالکل رک چکا ہے جس سے تاجر برادری پریشانی کا شکار ہے۔

کوئٹہ: ڈپٹی کمشنر و چیئرمین پرائس کنٹرول کمیٹی کی جانب سے دوکانداروں کے لیے اشیائے خورونوش کے نئے نرخ مقررکردیے گئے ہیں۔

تندور کی سنگل روٹی 20 جبکہ 330 گرام کی روٹی کی قیمت 40 روپے مقرر کردی گئی ہے، 20 کلو آٹے کا تھیلا فلور مل پر 1770 روپے میں ملے گا جبہ پرچون کی دکان پر 1800 روپے میں فروخت ہوگا۔

بناسپتی گھی کی قیمت فی کلو 460 روپے جبکہ کھلے گھی کی قیمت 360 روپے فی کلو ہوگی، کوکنگ آئل کی قیمت 390 روپے فی لیٹر مقرر کی گئی ہے۔

باسمتی چاول فی کلو 250 روپے میں دستیاب ہوگا جبکہ سیلہ چاول کی فی کلوقیمت 290 روپے مقرر کی گئی ہے، دال چنا فی کلو 320 روپے قیمت رکھی گئی ہے، دال مونگ کی فی کلو قیمت 285 جبکہ دال ماش کی فی کلو قیمت 450 روپے مقرر کی گئی ہے۔

بکرے کا گوشت 1900 روپے کلو کے حساب سے بیچا جائے گا، گائے کا گوشت ہڈی والا فی کلو 925 روپے جبکہ بغیر ہڈی والا فی کلو گوشت کی قیمت 1050 روپے ہوگی۔

ڈپٹی کمشنر کوئٹہ نے اشیائے خورونوش کے نئے نرخ نامے جاری کرنے کے بعد ہدایت کی ہے کہ پرائس لسٹ اپنی دکانوں میں واضح چسپاں کریں۔

چیئرمین آل کراچی تاجر اتحاد عتیق میر نے کہا ہے کہ لوگ بھوک کے ہاتھوں مررہے ہیں اور انھوں نے اشیائے خورونوش پر ٹیکس بڑھا دیا۔

تاجر رہنما عتیق میر کا کہنا تھا کہ مہنگائی کی وجہ سے لوگ پریشان ہیں جبکہ حکمرانوں کو لاشیں پسند ہیں، چیئرمین ایف بی آر نے تاجر دوست اسکیم پر بات کرنے کیلئے بلایا ہے، بدقسمتی ہے ایف بی آر میں پالیسی بنائی جاتی ہے اور آخر میں ترمیم کردی جاتی ہے۔

کہا جاتا ہے کہ تاجروں کو ریفنڈز دینگے لیکن ان لوگوں پر کون بھروسہ کریگا، ہڑتال کیوں کامیاب ہوئی کیونکہ ہر شخص بجلی بلوں سے پریشان ہے، بجلی کے بلز نے اس حد تک پریشان کردیا کہ لوگ ادائیگیوں سے معذور ہیں۔

عتیق میر نے کہا کہ حکمرانوں سے کہتا ہوں خدارا بجلی بلز میں ناجائز ٹیکسز کا خاتمہ کریں، بنگلہ دیش میں صرف کوٹہ سسٹم پر احتجاج ہوا تھا اور پھردیکھ لیں کیا ہوا۔

چیئرمین آل کراچی تاجر اتحاد نے کہا کہ یہ مفروضہ ہے کہ تاجر کہتے ہیں ٹیکس نہیں دیں گے، تاجر کہتے ہیں کہ پہلے فائلر بننے دیں، تاجروں کو کہیں ٹریپ تو نہیں کیا جارہا ہے تاجروں کے تحفظات ہیں۔

انھوں نے کہا کہ حکومتی پالیسی اور ایف بی آر کے رویے کو درست کرنے کی ضرورت ہے، معاشی طور پر تاجر بھی نقصان کا شکار ہے اور ٹیکسز کی بھرمار ہے۔

دریں اثنا ماہرمعیشت اشفاق تولہ نے کہا ہے کہ تاجر دوست اسکیم میری نظر میں انتہائی بےوقوفانہ تھی، وہ مثال ہے موت کے فرشتے کو کوئی گھرکا دروازہ نہیں دکھاتا ورنہ باربار آتا ہے۔

اشفاق تولہ نے کہا کہ ایف بی آر پر جب بھی دباؤ آتا ہے اس قسم کی اسکیم لے آتی ہے، چیلنج کرتا ہوں تاجروں کا مسئلہ 3 دن میں حل کراسکتا ہوں۔

اسلام آباد : بجٹ میں پیکٹ والی دالوں،چاول سمیت تمام بنیادی اشیاءپراٹھارہ فیصد سیلز ٹیکس لگا دیا گیا۔

تفصیلات کے مطابق چیئرمین ایف بی آر امجد زبیر ٹوانہ نے سینیٹ کی قائمہ کمیٹی برائےخزانہ کے اجلاس میں بتایا کہ بڑے جنرل اسٹورز پر اشیائے خورونوش کی تمام اشیاء پر اٹھارہ فیصد سیلز ٹیکس عائد ہوگا۔

امجد زبیر ٹوانہ کا کہنا تھا کہ عام دکانوں پر فروخت ہونےوالی کھلی اشیاء پر اضافی ٹیکس نہیں لگایا گیا۔

قائمہ کمیٹی نے بچوں کے بند فارمولہ دودھ پر عائد جی ایس ٹی میں کمی کی سفارش کی، جس پر چئیرمین ایف بی آر نے کہا بچوں کا ڈبہ پیک دودھ فروخت کرنے والی کمپنی کے ڈیلرز، ڈسٹری بیوٹرز غیر رجسٹرڈ ہیں۔

فاروق نائیک کا کہنا تھا کہ غیررجسٹرڈ کمپنی کو ٹیکس چوری پربلیک لسٹ کردیں۔

سلیم مانڈوی والا نے بھی کہا کہ خواتین کی اکثریت بچوں کیلئے فارمولہ دودھ استعمال کرتی ہیں ، جس پر چیئرمین ایف بی آر نے بتایا ڈبہ پیک دودھ تیار کرنے والی کمپنیز نے ڈبے کی قیمت آٹھ سو تک کردی ہے اور یہ ٹیکس میں کمی کا مطالبہ کررہے ہیں۔

ان کا کہنا تھا کہ کمپنی اگر ڈبہ دودھ کی قیمت کم کرے تو ہم ٹیکس میں کمی پرغور کریں گے، 600 روپے قیمت پر اٹھارہ فیصد جی ایس ٹی کے حساب سے قیمت میں کمی کی جائے گی۔