ایرانی میڈیا کا کہنا ہے کہ اسرائیل نے اصفہان میں نیوکلیئر سائٹ کونشانہ بنایا ہے تاہم اسرائیلی حملے کے باعث کسی خطرناک مواد کا اخراج نہیں ہورہا۔
غیر ملکی ذرائع ابلاغ کے مطابق اسرائیل نے مبینہ طور پر ایران میں اصفہان میں نیوکلیئر سائٹ کو نشانہ بنایا ہے، بین الاقوامی جوہری توانائی ایجنسی (IAEA) کے سربراہ نے ایران کے جوہری پاور پلانٹ پر حملوں کے خلاف خبردار بھی کیا تھا۔
اس سے قبل اقوام متحدہ کی سلامتی کونسل کے ہنگامی اجلاس سے خطاب کرتے ہوئے اقوام متحدہ کے جوہری نگراں ادارے آئی اے ای اے کے سربراہ رافیل گروسی نے ایران کے جوہری ری ایکٹرز پر حملوں کے خلاف خبردار کیا تھا۔
اُن کا اپنے خطاب میں کہنا تھا کہ میں بالکل اور مکمل طور پر واضح کرنا چاہتا ہوں کہ جوہری پاور پلانٹ پر حملے کی صورت میں تابکاری کا اخراج ہوگا اور اس کے بہت زیادہ اثرات مرتب ہوسکتے ہیں۔
واضح رہے کہ گزشتہ شب ایران اسرائیل جنگ کے دوران شمالی ایران میں ایک بار پھر زلزلہ محسوس کیا گیا جس کے سبب شہری خوفزدہ ہوگئے۔
غیر ملکی میڈیا رپورٹس کے مطابق گزشتہ شب ایران کے صوبہ سمنان کے جنوبی مغربی علاقے سورکھیا میں 5.1 شدت کے زلزلے کے جھٹکے محسوس کیے گئے تھے۔
یو ایس جی ایس کا کہنا ہے کہ سمنان کے جنوب مغرب میں تقریباً 37 کلومیٹر (23 میل) دور 10 کلومیٹر (6 میل) کی گہرائی میں زلزلہ آیا۔
ایران اسرائیل جنگ سے متعلق تازہ ترین خبریں
ایرانی سرکاری خبر رساں ایجنسی کے مطابق زلزلہ 20 جون کو مقامی وقت کے مطابق رات 9:19 پر آیا۔ تاہم زلزلے کے نتیجے میں کوئی جانی نقصان نہیں ہوا۔
زلزلے کے جھٹکے دارالحکومت تہران میں بھی محسوس کیے گئے جو سورکھیا سے تقریباً 150 کلومیٹر (90 میل) دور ہے۔
