روم: اطالوی وزیراعظم جوزیپے کونتے نے 4 مئی سے ملک بھر میں لاک ڈاؤن میں نرمی کا اعلان کر دیا۔
تفصیلات کے مطابق اطالوی وزیراعظم جوزیپے کونتے نے اگلے ماہ 4 مئی سے اٹلی میں لاک ڈاؤن میں نرمی کا اعلان کیا ہے۔انہوں نے کہا کہ 4مئی سے مینوفیکچرنگ،تعمیراتی انڈسٹری کا کاروبار کھولیں گے، کمپنیوں کو صحت سے متعلق سخت اقدامات کرنے ہوں گے۔
اطالوی وزیراعظم جوزیپے کونتے کا اخبار کو دیے گئے انٹرویو میں کہنا تھا کہ اٹلی میں اسکول ستمبر میں کھولے جائیں گے۔
اٹلی میں گزشتہ 24 گھنٹوں کے دوران 415 افراد جاں بحق ہوئے ہیں جس کے بعد ہلاکتوں کی مجموعی تعداد 26 ہزار 384 تک جا پہنچی ہے۔اٹلی میں متاثرہ مریضوں کی تعداد 1 لاکھ 95 ہزار سے زائد ہے جبکہ 63 ہزار افراد اب تک موذی مرض سے صحت یاب ہوچکے ہیں۔
واضح رہے کہ دنیا بھر میں مہلک وائرس سے جاں بحق افراد کی مجموعی تعداد 2 لاکھ ایک ہزار 671 تک جا پہنچی ہے جبکہ متاثرہ افراد کی تعداد 28 لاکھ سے زائد ہے۔ کرونا وائرس سے صحت یاب ہونے والے افراد کی تعداد 8 لاکھ 25 ہزار 75 ہے۔
