لاہور: پاکستان کرکٹ ٹیم کے ون ڈے کپتان اظہرعلی کہتے ہیں کہ دورہ انگلینڈ ہمیشہ ہی ٹف رہا ہے۔ پہلے جو ہوا ماضی کا حصہ ہے، عامر سے متعلق کوئی مسئلہ ہوا تو سب مل کر ہینڈل کریں گے۔
اسکلز کیمپ کے دوسرے روز کھلاڑیوں کی بھرپور تیاریاں جاری ہیں۔ انگلینڈ کی کنڈیشنز سے ہم آہنگ ہونے کے لیے سیمنگ وکٹوں پر بیٹنگ اور بولنگ پر مینجمنٹ کا زور ہے۔ چیف سلیکٹر انضمام الحق نے بلے بازوں کی صلاحیتوں میں نکھار لانے کے لیے بیٹنگ ٹپس بھی دیں۔
اس موقع پر ون ڈے کپتان اظہر علی کا کہنا تھا کہ دورہ انگلینڈ ہمیشہ ہی مشکل رہا ہے لیکن بھرپور تیاری کے ساتھ جا رہے ہیں۔ انہوں نے کہا کہ محمد عامر سے متعلق کوئی مسئلہ ہوا تو مل کر ہینڈل کریں گے۔ انگلینڈ میں عامر پر پریشر ہوگا لیکن عامر پہلے بھی کم بیک کر چکے ہیں۔
واضح رہے کہ فاسٹ بولرعمران خان بیٹنگ کے دوران گیند ہاتھ پر لگنے سے انجرڈ ہوگئے۔ ڈاکٹرز کا کہنا ہے کہ انجری معمولی نوعیت کی ہے، جلد فٹ ہوجائیں گے۔
چیئرمین پی سی بی بھی سلیکشن کمیٹی سے ملاقات کے لیے اسٹیڈیم پہنچے۔ شہریار خان نے ٹیم مینجمنٹ سے کھلاڑیوں کی کارکردگی کی رپورٹ بھی لی۔
