چیئرمین فیڈرل بیورو آف ریونیو (ایف بی آر) راشد لنگڑیال کا کہنا ہے کہ اس وقت عالمی اداروں کا ہم پر اتنا اعتماد نہیں جتنا ہونا چاہیے۔
اے آر وائی نیوز کے مطابق چیئرمین ایف بی آر راشد لنگڑیاں نے وزیر مملکت برائے خزانہ بلال اظہر کیانی کے ہمراہ اسلام آباد میں پریس کانفرنس کرتے ہوئے کہا ہے کہ اس وقت عالمی اداروں کا ہم پر اتنا اعتماد نہیں ہے جتنا ہونا چاہیے۔ ایف بی آر میں ایمانداری کے کلچر کو فروغ دینا ہے اور اس کے لیے بہت ساری اصلاحات بھی کیں۔ جن افسران کی کارکردگی اچھی نہیں تھی، انہیں ہٹا دیا گیا جب کہ کارکردگی کی بنیادی پر تنخواہیں مقرر کیں۔
چیئرمین ایف بی آر نے کہا کہ ہمارے لیے ٹیکس دہندگان بہت اہم ہیں اور جو ٹیکس دے رہا ہے وہ معاشرے اور حکومت کیلیے سر کا تاج ہے۔ وزیراعظم کی بھی ہدایت ہیں کہ ٹیکس دینے والوں کا اعتماد بحال کرنا ہے۔ اصلاحات اور نگرانی کے نام پر ٹیکس دہندگان کو ہراساں کرنے کی اجازت نہیں ہوگی، کیونکہ وہ ہی ملک کے نظام کو چلانے میں اہم کردار ادا کرتے ہیں۔ تاہم ٹیکس چوری کرنے والوں سے قانون کے مطابق نمٹا جائے گا۔
ان کا کہنا تھا کہ گزشتہ سال ریونیو کے حوالے سے بڑا اچھا گزرا۔ گزشتہ سال انفورسمنٹ سے 1.5 بلین آئے تھے۔ ہم نے ایف بی آڑ میں ڈیجیٹل اور ایچ آر سائٹ پر بھی کام کیا ہے۔
راشد لنگڑیال نے ٹیکس پیئر کو پیغام دیا کہ ایف بی آر کے دروازے آپ کے لیے کھلے ہیں۔ انہیں ملاقات کے لیے پیشگی وقت لینے کی ضرورت نہیں، وہ جب چاہیں مل سکتے ہیں۔ ہماری کوشش ہے کہ ٹیکس دہندگان کو تنگ نہ کیا جائے اور اس حوالے سے ٹیم کو بھی بتا دیا ہے کہ اگر کوئی بھی افسر اختیارات کا غلط استعمال کرے گا تو اس کو معاف نہیں کیا جائے گا۔
https://urdu.arynews.tv/fbr-unable-to-achieve-annual-tax-target-record-shortfall/
