Tag: اعجاز چوہدری

اسلام آباد: پی ٹی آئی سینیٹر اعجاز چوہدری نے تحریک لبیک سے تصادم میں پولیس شہادتوں کی انوکھی وجہ بتا دی ہے، انھوں نے کہا کہ جب پولیس والوں سے 24 گھنٹے ڈیوٹی لیں گے تو یہی حال ہوگا۔

تفصیلات کے مطابق سینیٹر اعجاز چوہدری نے اے آر وائی نیوز سے گفتگو میں کہا کہ پولیس والوں سے 24 گھنٹے ڈیوٹی لیں گے تو یہی حال ہوگا، 24 گھنٹے جگائے رکھنے کے بعد ایسی قوت کے سامنے لائیں گے تو ان کا کیا ہوگا۔

انھوں نے کہا پولیس والوں سے مجھے زیادہ ہمدردی ہے، جس پر اے آر وائی نیوز نے سوال کیا کہ آپ کو ہمدردی ہے تو کیا ان کے گھر گئے، انھوں نے جواب دیا جی نہیں، میں پولیس والوں کے گھر نہیں گیا۔ اعجاز چوہدری سے سوال کیا گیا کہ آپ اس معاملے میں پولیس والوں کے خاندانوں کو کیسے مطمئن کریں گے، انھوں نے جواب دیا میں نے پولیس افسران سے بات کی ہے، اب آپ اس پر بات نہ کریں۔

اعجاز چوہدری کا کہنا تھا کہ میں تو مسلسل کہتا رہا طاقت سے اس کا حل نہیں نکلے گا، فواد چوہدری کے حوالے سے سوال پر کہا کہ میں ان کا جواب نہیں دینا چاہتا کیوں کہ فواد چوہدری نے غیر مہذب زبان استعمال کی، ان کو سوچ سمجھ کر بولنا چاہیے ایسی زبان سے انتہا پسندی بڑھتی ہے، برائی کو بھلائی سے ہی دور کیا جا سکتا ہے۔

ایک سوال کے جواب میں اعجاز چوہدری نے کہا ہم مجبور ہو جاتے ہیں اس لیے ان سے بھی بات کرتے ہیں جو ناقابل قبول ہوں، میں نے ٹی ایل پی سے کسی سیاسی اتحاد کی بات نہیں کی ہے، سعدرضوی کو اپنی مرضی سے پھول دیے تھے۔

انھوں نے کہا بات چیت اورگفت و شنید ہی ہر مسئلے کا حل ہے، اے آر وائی نیوز نے اس پر سوال کیا کہ کیا اسی لیے آپ ٹی ٹی پی سے بھی بات چیت کر رہے ہیں؟ انھوں نے جواب دیا یہ ہماری مجبوری ہے، وہ سوسائٹی کا حصہ ہیں۔

اس سوال پر کہ کیا آپ پریانتھا کو جلانے والوں سے بھی یہی رویہ اپنائیں گے؟ انھوں نے جواب دیا آپ دونوں معاملات کو غلط ملا رہے ہیں۔

لاہور: پاکستان تحریک انصاف کے رہنما اعجاز چوہدری کا کہنا ہے کہ فاسشٹ مودی کی مسلمانوں کے خلاف قانون سازی کو مسترد کرتے ہیں۔

تفصیلات کے مطابق پی ٹی آئی رہنما اعجاز چوہدری نے کہا کہ بھارت نے مقبوضہ وادی میں انسانی حقوق کی دھجیاں اڑا دیں، 128 روز سے جاری کرفیو نے کشمیریوں کی زندگی کو اجیرن بنا دیا ہے۔

تحریک انصاف کے رہنما نے کہا کہ بھارت نے مقبوضہ کشمیرمیں ظلم وستم کے ریکارڈ توڑ دیے، عالمی برادری مقبوضہ وادی پر بھارت کےغاصبانہ قبضے کا فی الفور نوٹس لے۔

اعجاز چوہدری نے مزید کہا کہ فاسشٹ مودی کی مسلمانوں کے خلاف قانون سازی کو مسترد کرتے ہیں، متنازع قانون سازی نے بھارت کا مکروہ چہرہ بے نقاب کردیا۔

مسلمانوں کے سوا تارکین وطن کو بھارتی شہریت دینے کا ترمیمی بل منظور

واضح رہے کہ بھارتی لوک سبھا میں شہریت کا متنازع بل بھارتی وزیرداخلہ امیت شاہ نے پیش کیا۔ اس قانون کے تحت مسلمانوں کے سوا 6 مذاہب کے غیرقانونی تارکین وطن کو بھارتی شہریت دینے کی تجویز پیش کی گئی، جس کے حق میں 293 ووٹ آئے جبکہ 82 اراکین اسمبلی نے اسے مسترد کردیا۔

ترمیمی شہریت بل سے آسام میں کئی دہائیوں سے رہائش پذیرلاکھوں بنگالی مسلمان سب سے زیادہ متاثرہوں گے۔