Tag: اعلیٰ سطح کے اجلاس

کراچی: ڈی جی رینجرز سندھ کی زیرِ صدارت ہونے والے اعلیٰ سطح کے اجلاس میں ٹارگٹڈ آپریشن کو جاری رکھنے پر اتفاق کیا گیا ہے۔

رینجرز ہیڈ کوارٹرز میں ڈی جی رینجرز سندھ میجر جنرل بلال اکبر کی زیرِ صدارت اجلاس میں سیکٹر کمانڈرز سمیت رینجرز کے اعلیٰ افسران شریک تھے۔

اجلاس میں شہر کی موجودہ امن و امان کی صورتحال کا جائزہ لیا گیا اور شہر میں جاری رینجرز کے ٹارگٹڈ آپریشن کو بلا تفریق جاری رکھنے پر اتفاق کیا گیا۔

ڈی جی رینجرز کا کہنا تھا کہ کراچی کی شہریوں بالخصوص تاجر، صنعتکار اور ڈاکٹرز سمیت دیگر شعبوں سے وابستہ شہریوں کی حفاطت کو یقینی بنایا جائے گا، انھوں نے شہریوں سے اپیل ہے کہ وہ کسی بھی مشکوک سرگرمی، ٹارگٹ کلرز کی موجودگی یا دیگر جرائم کی اطلاع رینجرز ہیلپ لائن ون ون زیرو ون پر دیں۔

یاد رہے کہ گزشتہ روز کراچی میں ایم کی ایم نے سہیل احمد کے ماورائے عدالت قتل پر یومِ سوگ کا اعلان کیا، کراچی سمیت سندھ کے بیشتر شہروں میں ہڑتال رہی۔

کارکن کے ماورائے عدالت قتل پر قائد الطاف حسین کا کہنا تھا کہ آپریشن کی آڑ میں ایم کیو ایم کو نشانہ بنایا جارہا ہے، انھوں نے کہا کہ آئندہ کارکن شہید ہوا تو اگلےدن پہیہ جام ہوگا۔

اس سے قبل وزیرِاعظم نواز شریف نے ایم کیوایم کے کارکن سہیل احمد کا قتل کا نوٹس لیا اور وزیرِاعلیٰ سندھ نےتحقیقات کیلئے جوڈیشل کمیشن بنانے کا اعلان کیا۔